އޭޝިއަން ބޮޑީބޯޑިން ފެޑެރޭޝަން (އޭބީސީ)ގެ އޮފީސް ރާއްޖޭގައި ހުޅުވުމާއި ގުޅޭގޮތުން އިންޓަނޭޝަނަލް ބޮޑީބޯޑިން ކޮންފެޑެރޭޝަން (އައިބީސީ)އާ އެކު މަޝްވަރާކޮށްފި އެވެ.
ސަރަހައްދީ ބޮޑީބޯޑިންގެ ފުރުސަތުތަކުގެ ދޮރު ރާއްޖެ އަށް ހުޅުވިގެންދާނީ އަންނަ ހޮނިހިރު ދުވަހު މާލޭގެ ރާޅުގަނޑު ސަރަހައްދުގައި ފެށުމަށް ހަމަޖެހިފައިވާ "ވިޒިޓް މޯލްޑިވްސް ޕްރޯ"އާ އެކުގަ އެވެ. މުބާރާތުގެ އެންމެ ފަހުގެ ތައްޔާރީތައް މިހާރު ކުރަމުން އަންނައިރު، މުބާރާތުގައި ވާދަކުރާ އެތުލީޓުން މިހާރު ވަނީ ރާއްޖެ އަންނަން ފަށައިފަ އެވެ. މީގެ އިތުރުން މުބާރާތް ހިންގުމުގައި އިސްކޮށް ހަރަކާތްތެރިވާ ޓެކްނިކަލް ޓީމުގެ މެންބަރުންވެސް ރާއްޖެ އަންނަމުން އެބަ ދެ އެވެ.
އެ ގޮތުން އިންޓަނޭޝަން ބޮޑީބޯޑިން ކޮންފެޑެރޭޝަންގެ ސީއީއޯ އަދި އައިބީސީ ވޯލްޑް ޓުއާ މެނޭޖަރު ގްލެން ކުއެވޭސް މިހާރު ހުރީ ރާއްޖޭގަ އެވެ. އޭނާ ވަނީ މުބާރާތުގެ ތައްޔާރީތައް ބަލާލައި މުބާރާތުގެ އިންތިޒާމްތަކާ މެދު ހިތްޖަމަޖެހުން ވެސް ފާޅުކޮށްފަ އެވެ.
ގްލެންގެ މި ދަތުރުގައި ކުރިއަށްދިޔަ އެންމެ މުހިންމު އެއް ކަމަކީ ބޮޑީބޯޑިން އިން ރާއްޖެ އަށް ބައިނަލްއަގްވާމީ މައިދާނުގައި ހުރި ފުރުސަތުތައް ދެނެގަނެ އެކަންކަން މަގު ފަހި ކުރުމެވެ.
ދާދިފަހު ކުޅިވަރާ ބެހޭ ވަޒީރު، މަހުލޫފު ވެސް ވަނީ ގްލެން އާ ބައްދަލުކުރައްވައިފަ އެވެ.
މި ބައްދަލުކުރެއްވުމުގައި ވިޒިޓް މޯލްޑިވްސް ޕްރޯ 2022ގެ އެކި އެކި ކަންކަމާއި ގުޅޭގޮތުން މަޝްވަރާ ކުރެވުނުއިރު، ފުރުސަތު ލިބިއްޖެ ނަމަ އޭޝިއާ ސަރަހައްދުގެ މައި އޮފީސް ރާއްޖޭގައި ހުޅުވުމަށް ތައްޔާރަށް އޮތްކަމަށް މިނިސްޓަރު މަހުލޫފު ވަނީ ވިދާޅުވެފަ އެވެ.
އެމްބީބީއޭގެ އިސް ވެރިންނާއި ގްލެން އަދި ކުޅިވަރާބެހޭ ވުޒާރާގެ އިސް ފަރާތްތައް ބޭއްވި ބައްދަލުވުމުގެ ތެރެއިން.---
ރާއްޖޭގެ ބޮޑީބޯޑިން އެސޯސިއޭޝަންގެ އިސްވެރިންނާ އެކު ކުރިއަށްދިޔަ މި ބައްދަލުވުމުގައި ފުރަތަމަ ފަހަރަށް އައިބީސީ ވޯލްޑް ޓުއާގެ ލެގެއް ރާއްޖެ އަށް ގެނައުމަށް ކުރެވުނު މަސައްކަތްތަކާއި ގުޅޭގޮތުން ވެސް މަޝްވަރާ ކުރެވުނެވެ.
ގްލެން ވަނީ އެމްބީބީއޭއިން މެދުނުކެނޑި މިދިޔަ ދޮޅު އަހަރު ކުރި މަސައްކަތް ފާހަގަކޮށް ރާއްޖޭގެ އެތުލީޓުންގެ ކުރިއެރުމަށް ކުރެވެމުން އަންނަ މަސައްކަތަށް ތައުރީފުކޮށްފަ އެވެ.
ވިޒިޓް މޯލްޑިވްސް ޕްރޯ 2022ގައި ވާދަކުރުމަށް ދުނިޔޭގެ ޗެމްޕިއަނުން ރާއްޖެ އަށް އަންނަން ފަށާފައިވާއިރު، ބައިނަލްއަގްވާމީ އެތުލީޓުން މިމުބާރާތުގައި ބައިވެރިވުމުގެ ސުންގަޑި ހަމަވާނީ އަންނަ ބުދަ ދުވަހުގަ އެވެ. މުބާރާތުގައި ވާދަކުރާ ދިވެހި ގައުމީ ޓީމް ހޮވުމަށް ކުރިއަށް ގެންދިޔަ ޓްރަޔަލްތައް ނިމި ގައުމީ ޓީމު ވެސް އަންނަނީ މިހާރު ޕްރެކްޓިސްތައް ކުރިއަށް ގެންދަމުންނެވެ.
