ދިވެހިރާއްޖޭގައި މާލެ ފިޔަވައި، ސީޓީ ސްކޭން ހެދެނީ ފަސް ހޮސްޕިޓަލަކުން ކަމަށާއި އެމްއާރްއައި ހެއްދެނީ ދެ ހޮސްޕިޓަލަކުން ކަމަށް ހެލްތު މިނިސްޓްރީން ބުނެފި އެވެ.
މައުލޫމާތު ހޯޯދުމާއި ލިބުމުގެ ހައްގުގެ ދަށުން "އަދަދު" އިން ހޯދި މައުލޫމާތުތަކަށް ބަލާއިރު، މާލެ ފިޔަވައި ރާއްޖޭގައި އެމްއާރްއައި ހެއްދެނީ ގައުމުގެ އެންމެ އުތުރުގައި ހުރި ކުޅުދުއްފުށީ ރީޖަނަލް ހޮސްޕިޓަލާއި އެންމެ ދެކުނުގައި ހުރި އައްޑޫ އިކުއިޓޯރިއަލް ހޮސްޕިޓާލުން އެކަންޏެވެ.
އެއާ ހިލާފަށް އަތޮޅުތެރޭގެ ފަސް ހޮސްޕިޓަލަކުން ސީޓީ ސްކޭންގެ ހިދުމަތް ދެމުން ގެންދާކަން ހެލްތު މިނިސްޓްރީން ބުންޏެވެ. ސީޓީ ސްކޭންގެ ހިދުމަތް ދެމުން ގެންދަނީ އައްޑޫ އިކުއިޓޯރިއަލް ހޮސްޕިޓަލާއި ތިނަދޫ އަބްދުއްސަމަދު މެމޯރިއަލް ހޮސްޕިޓަލާއި ގަން ރީޖަނަލް ހޮސްޕިޓަލުގެ އިތުރުން އުނގޫފާރު ރީޖަނަލް ހޮސްޕިޓަލް އަދި ކުޅުދުއްފުށީ ރީޖަނަލް ހޮސްޕިޓަލުންނެވެ.
ހަމައެއާއެކު، ޔޫއެސްޖީ ސްކޭން ނުވަތަ އަލްޓަރާސައުންޑް ސްކޭން ސަރުކާރުގެ ހުރިހާ ހޮސްޕިޓަލްތަކުގެ އިތުރުން ށ. މިލަންދޫގައި ގާއިމްކޮށްފައި ކަމަށް ހެލްތު މިނިސްޓްރީން ބުނެ އެވެ. އެ މިނިސްޓްރީން ބުނީ ސަރުކާރުގެ ހުރިހާ ހޮސްޕިޓަލްތަކެއްގައި ވެސް އެކްސްރޭގެ ހިދުމަތް ގާއިމްކޮށްފައިވާ ކަމަށެވެ.
ރާއްޖޭގެ ސިއްހީ ނިޒާމު ލާމަރުކަޒު ކުރުމުގެ ގޮތުން އަތޮޅުތެރޭގައި ރީޖަނަލް ހޮސްޕިޓަލްތަކެއް ގާއިމްކޮށް، މިފަދަ ހިދުމަތްތަކެއް އެ ހޮސްޕިޓަލްތަކުން ހަމަޖެއްސުމުގެ މަސައްކަތް ސަރުކާރުން ދަނީ ކުރަމުންނެވެ. ކުރިން ގާއިމްވެފައި ނެތް މި ހިދުމަތްތައް ރީޖަނަލް ހޮސްޕިޓަލްތަކުން ދޭން ފެށުމުން ރާއްޖޭގެ ސިއްހީ ނިޒާމަށް ކުރިމަވެފައި އޮތް މަރުކަޒީކަން ފަނޑުވެ، ލާމަރުކަޒު ވަމުންދާކަން ފާހަގަކޮށްލެވެ އެވެ.
