ގައުމީ ސްކޮޑުގައި ހިމެނުމުގެ ފުރުސަތު ލިބޭ ގޮތަށް، އަންނަ މަހު މާލޭގައި ބާއްވާ ބައިނަލްއަގުވާމީ ބޮޑީބޯޑިން މުބާރާތް، އައިބީސީ ވޯލްޑް ޓުއާގެ މޯލްޑިވްސް ޕްރޯގެ ޓްރަޔަލްސް ބާއްވަން މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން ނިންމައިފި އެވެ.
އެމްބީބީއޭ އިން މިހާރު ވަނީ މި މަހު 23-25 އަށް ޓްރަޔަލްސް ކުރިއަށް ގެންދާނެކަން އިއުލާނުކޮށް ރަޖިސްޓްރީވާން ހުޅުވާލައިފަ އެވެ. ރަޖިސްޓްރީވުމުގެ މުއްދަތު ހަމަވާނީ މި މަހު 21 ވަނަ ދުވަހު (އަންނަ އަންގާރަ ދުވަހު)ގެ މެންދުރު ފަހު 15:00 އާ ހަމައަށެވެ. ކޮންމެ ޑިވިޝަނެއްގައި ރަޖިސްޓްރީ ވުމަށް ވެސް ކަނޑައެޅިފައިވާ ފީއެއް ނެގޭނެ އެވެ.
ޖުމްލަ ހަތަރު ޑިވިޝަނެއް އޮންނައިރު، އެއީ މެންސް އޯޕަން، ވިމެންސް އޯޕަން، ޖޫނިއާ މެންސް އޯޕަން އަދި ޑްރޮޕްނީ ޑިވިޝަން އެވެ.
އައިބީސީގެ ވިސްނުމަކީ ހޯސްޓްކުރާ ގައުމަކަށް ދެ ވައިލްޑްކާޑް ސްލޮޓް ދިނުމެވެ. އެއީ ކޮންމެ ޑިވިޝަނަކަށް ދެ ސްލޮޓް ދޭ ގޮތަށެވެ. ވައިލްޑްކާޑް ސްލޮޓް ލިބޭ އެތުލީޓެއް ވާދަކުރާނީ ގަދަ 32 ބޮޑީބޯޑަރުން ވާދަކުރަން ފަށާ ހިސާބުންނެވެ. އެ ގޮތުން ވައިލްޑްކާޑް ދޭނީ ބޮޑީބޯޑިން ލީގުގެ ރޭންކިން އެއް ވަނަ އަދި ދެ ވަނަ އަށެވެ. އައިބީސީން ދޭ ވައިލްޑްކާޑް ސްލޮޓްގައި ރާއްޖޭން ވާދަކުރާނީ ސީނިއާ ޑިވިޝަނުގައި ދެ ބޮޑީބޯޑަރުންނާއި ޖޫނިއާ މެންސް ޑިވިޝަންގައި ދެ ބޮޑީބޯޑަރުންނާއި ޓްރަޔަލްސް އިން ކުރިހޯދާ ޑްރޮޕްނީ ކެޓަގަރީގެ ދެ ބޮޑީބޯޑަރުންނަށެވެ.
ހުނަރުހުރި ލެވަލާއި މުބާރާތުގެ ލެވަލަށް ބަލާފައި، ވައިލްޑްކާޑް އެންޓްރީއެއް ދިނުމުގެ ބަދަލުގައި، ވިމެންސް ޑިވިޝަނުން ވައިލްޑް ކާޑްގެ ބަދަލުގައި އެމްބީބީއޭ އިން ދޭނީ ފްރީ ޕާސް އެވެ. ޕްރީ ޕާސް ދިނުމަށް ހަމަޖެހިފައިވަނީ މެންސް އޯޕަން ކެޓަގަރީ އާއި ޖޫނިއާ މެންސް ކެޓަގަރީން ހަތަރު ޖާގަ، ވިމެންސް އޯޕަން ޑިވިޝަން އަދި ޑްރޮޕްނީ ޑިވިޝަން، ކޮންމެ ޑިވިޝަނަކުން ދެ ޖާގަ އެވެ.
ޓްރަޔަލްސް އަކީ ހަމައެކަނި އައިބީސީ މޯލްޑިވްސް ޕްރޯ އިން ލިބޭ ޖާގަ ވުރެ، މާ މުހިންމު ފުރުސަތެއް ވެސް ފަހިވެފައި އޮތް އިވެންޓެެކެވެ. ޓްރަޔަލްސްގައި ބައިވެރިވެ ހޯދާ މާކްސް މި އަހަރު މުޅިން އަލަށް ފެށި މޯލްޑިވްސް ބޮޑީބޯޑިން ލީގަށް ގުނާނެ އެވެ.
މީގެ އިތުރުން މި ޕޮއިންޓްތަކާއި ދާދިފަހުން ނިމުނު އެމްޓީސީސީ ބުރުނު ޝިކާރުގެ ޕޮއިންޓްތައް ހިމެނޭ ގޮތަށް، ޖުމްލަ އަދަދަށް ބަލައި، މި އަހަރުގެ ނިޔަލަށް ސީނިއާ އަދި ޖޫނިއާ ގައުމީ ޓީމެއް ނެގޭނެ އެވެ. އެއީ ސީނިއާ ހަތަރު ބޮޑީބޯޑަރުންނާއި ދެ އޮފިޝަލުންގެ އިތުރުން ޖޫނިއާ ގައުމީ ޓީމަށް ހަތަރު ބޮޑީބޯޑަރުންނާއި ދެ އޮފިޝަލުންނެވެ. މިއީ 2019 ވަނަ އަހަރުގެ ފަހުން ގައުމީ ސްކޮޑެއް ނެގޭނެ ފުރަތަަމަ ފަހަރު ވެސް މެ އެވެ.
ޓްރަަޔަލްސް އަށް ފަހު ނެގޭ ގައުމީ ޓީމުތައް މި އަހަރުގެ ނިޔަލަށް ދެމި އޮންނާނެ އެވެ. ދެން އާ ގައުމީ ޓީމެއް ނަގާނީ މި އަހަރުގެ ބޮޑީބޯޑިން ސީޒަން ނިމުމުންނެވެ.
