މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއާޕާސަންގެ މަގާމަށް އަލަށް އިންތިހާބުވި، އިކޮނޮމިކް މިނިސްޓަރު ފައްޔާޒް އިސްމާއީލާ އެކު އެމްޑީޕީން އިތުރު ކާމިޔާބީތައް ހޯދާނެކަމާ މެދު ނުކުރައްވާ ކަމަށް އެ ޕާޓީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އެމްޑީޕީގެ ދެ ފެކްޝަންގެ ވާދަވެރިކަމުގެ ތެރޭގައި ނަޝީދުގެ ތާއީދާއެކު ވާދަކުރެއްވި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ އިންތިހާބުގައި ނާކާމިޔާބުވެވަޑައިގަތީ ބޮޑު ތަފާތަކުންނެވެ.
"ފަޔާގެ ޗެއާޕާސަން ކަމުގައި އެމްޑީޕީއަށް އިތުރު ކާމިޔާބީތައް ހޯދާނެ ކަމީ އަޅުގަނޑުގެ ހިތުގައި ޝައްކު ހިނގާ ކަމެއް ނޫން،" އިންތިހާބުގައި ވާދަކުރި ދެ ކެންޑިޑޭޓުންނަށް ވެސް މަރުހަބާ ވިދާޅުވެ ނަޝީދު ކުރެއްވި ޓްވީޓުގައި ވިދާޅުވި އެވެ.
އެމަނިކުފާނަށް ޖަވާބު ދެއްވަމުން ފައްޔާޒް ވިދާޅުވީ ލީޑަރުންގެ އިރުޝާދާއެކު މަސައްކަތް ކުރައްވާނީ ޑިމޮކްރެސީ ފައްކާކޮށް، ގައުމު ކުރި އެރުވުމަށް ކަމަށެވެ.
ފައްޔާޒަށް ނަޝީދު މަރުހަބާ ވިދާޅުވީ އިންތިހާބުގެ ނަތީޖާ ގަބޫލުކުރައްވައި، އިމްތިޔާޒް ކުރެއްވި ޓްވީޓު ރީޓްވީޓު ކުރެއްވި އިރު ލިއުއްވި ލިއުއްވުމެއްގަ އެވެ. ބަލި ގަބޫލުކުރެއްވުމަށް އިމްތިޔާޒް ކުރެއްވި ޓްވީޓުގައި އޭނާ ވިދާޅުވީ އެމްޑީޕީގެ ހިފައިގެން ޕާޓީއާއެކު ދެގޮތެއްނުވެ ދެމި ހުންނާނެ ކަމުގެ ޔަގީން ކަން ދެއްވާ ކަމަށެވެ.
އެމްޑީޕީގެ އެތެރޭގެ އިންތިހާބު ފައްޔާޒް ކާމިޔާބުކުރައްވާފައިވަނީ 58 ޕަސެންޓު ވޯޓާއެކުގަ އެވެ. އިމްތިޔާޒަށް ލިބިވަޑައިގެންނެވީ 42 ޕަސެންޓު ވޯޓެވެ.
