ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހްމީ (އިންތި) އަށް ރައީސް މުހައްމަދު ނަޝީދު ކުރައްވާ ކަމަށް ރައީސް އިބްރާހިމް މުހައްމަދު ސޯލިހުޗވެސް ކުރައްވާ ކަމަށް އޭނާ ވިދާޅުވެއްޖެ އެވެ.
އަންނަ މެއި މަހުގެ 14 ވަނަ ދުވަހު ބާއްވާ އެމްޑީޕީގެ އެތެރޭގެ އިންތިހާބު ބެލެވެނީ ރައީސް ނަޝީދާއި ރައީސް އިބްރާހީމް މުހައްމަދު ސޯލިހްއާ ދެމެދު އޮތް ގަދަހިފުމެއްގެ ގޮތުގަ އެވެ. އިންތިއަކީ ނަޝީދުގެ ތާއީދު އޮތް ކެންޑިޑޭޓެވެ. ދެން ވާދަކުރައްވަނީ ރައީސްގެ ތާއީދު އޮތް އިކޮނޮމިކް މިނިސްޓަރު ފައްޔާޒު އިސްމާއީލެވެ.
"ސަންގުޓީވީ" އިން ކުރިއަށް ގެންދިޔަ ބަހުސްގައި އެމްޑީޕީގެ ޗެއާޕާސަން ކަމުގެ މަގާމަށް ވާދަ ކުރުމަށް އެއްވެސް އިރަކު ރައީސް ނަޝީދު ވިދާޅުވިތޯ ކުރި ސުވާލުތަކުގެ ޖަވާބުގައި އިންތި ވިދާޅުވީ އޭނާ އަކީ އެއްވެސް ކަމެއްގައި އެއްވެސް މީހެއްގެ ދަށުވެފައިވާ މީހެއް ނޫން ކަމަށެވެ.
ހުރިހާ ކަމެއްވެސް ކުރައްވަނީ އަމިއްްލަ އިހުތިޔާރުގައި ކަމަށާއި ޗެއާޕާސަން ކަމުގެ މަގާމަށް ވާދަ ކުރައްވަން ނިންމެވީވެސް ރައީސް ނަޝީދުގެ އެދުމަކަށް ނޫން ކަމަށް އިންތި ފާހަގަ ކުރެއްވި އެވެ.
"އަޅުގަނޑަކީ އެއްވެސް މީހެއްގެ ދަށުވެފައިވާ މީހެއް ނޫން. އެއްވެސް ޕްރޮޖެކްޓެއްގެ ދަށުވެފައިވާ މީހެއް ނޫން. އެއްވެސް ވަޒީފާއެއްގައި ދަށުވެފައިވާ މީހެއް ނޫން. އެއްވެސް މަންފާއެއް ރިސޯޓެއް ފަޅުރަށެއް ހޯދުމަށް ދަށުވެފައިވާ މީހެއް ނޫން. ވަރަށް މިނިވަން މީހެއް. ވަރަށް މިނިވަންކަމާ އެކުގަ،" އޭނާ ވިދާޅުވި އެވެ.
"ޗެއާޕާސަން ކަމަށް ވާދަ ކުރައްވަން ނިންމެވީ އެމްޑީޕީގެ ވަރަށް ގިން މެމްބަރުންގެ ނިންމެވުމަށް. މާޔޫސްވެ ފެޔަށްޖެހި ޕާޓީއަށް ގުރުބާންވި ވަރަށްގިނަ ލޭ އޮހޮރުވުންތައް އޮހޮރުވާފައިވާ މީހުން އަޅުގަނޑު ގާތު ވިދާޅުވަމުން ގެންދެވީ މި ފުރުސަތު ނަގާ ނުލާށޭ. މިއީއޭ ޕާޓީ ސަލާމަތް ކުރަން ލިބޭނެ ފަހު ފުރުސަތަށް ވެދާނޭ."
މީގެ ކުރިންވެސް އޭނަގެ ތެރުވެރިކަން ސާބިތުވެފައިވާނެ ކަމަށާއި މައްސޫލިޔަތުތައް އަދާ ކުރުމުގައި އަބަދުވެސް "ނަމްބާ ވަން" އަށް ވާނެ ކަމަށް އިންތި ޔަގީންކޮށްދެއްވި އެވެ.
އިންތި ވިދާޅުވީ ޗެއާޕާސަން ކަމަށް ކުރިމަތި ލެއްވުމަކީ އަމިއްލަ އިސް ނަސްނަގައިގެން ކުރި ކަމެއް ނަމަވެސް ރައީސް ނަޝީދު ތާއީދު ލިބުމުން ވަރަށް އުފާވާ ކަމަށެވެ.
"ވަރަށް އުފާވޭ ރައީސް ނަޝީދު އަޅުގަނޑަށް ތާއީދު ކުރާތީ. އަޅުގަނޑު ޔަގީން ކުރަން ރައީސް ސޯލިހުވެސް އަޅުގަނޑަށް އިތުބާރު ކުރައްވާނެ ކަން. ރައީސް ސޯލިހް އެންމެ ފަހުންވެސް ވިދާޅުވެފައި ވަނީ ނަޒާހަތްތެރި ބަޔަކު މަޖިލީހުގައި ތިބޭނަމަ ލިސްޓުގެ އެންމެ ކުރީގަ އޮންނާނެ ނަމަކަށް ވާނީ އިންތިގެ ނަމޭ،" އިންތި ވިދާޅުވި އެވެ.
އިންތުގެ ވާހަކައިގައި އިތުރަށް ވިދާޅުވީ ޕާޓީގެ ކަންކަމާއި އެހެން ހަރަކަތްތަކުގައި އެކަނި ހުރެ މަސައްކަތް ކުރަން ޖެހުނު ނަމަވެސް އެކަން ކުރާނީ އޭނާ ކަމަށް ރައީސް ވިދާޅުވެފައިވާ ކަމަށެވެ.
"އަޅުގަނޑަށް އެ ބޭފުޅުން އިތުބާރު ކުރައްވާނެ. އަޅުގަނޑަށް ހަމަ 100 ޕަސެންޓު ޔަގީން، ދެ ބޭފުޅުންވެސް އިތުބާރު ކުރައްވާނެ. ހުރިހާ ބޭފުޅުންވެސް އަޅުގަނޑަށް އިތުބާރު ކުރައްވާނެ،" އޭނާ ވިދާޅުވި އެވެ.
ނަޒާހަތްތެރިއެއް ކަމަށް ވިދާޅުވެ އިންތި ހައްދަވަނީ ދޮގު ކަމަށް ވެސް ފައްޔާޒު ވިދާޅުވެފައިވެ އެވެ. ވަޒީފާގެ ބޭނުމަށް އިންތި ވެސް އޭނާއަށް ގުޅުއްވާފައިވާ ކަމަށް ފައްޔާޒު މިރޭ ވިދާޅުވި އެވެ. މި ކަންކަން އިންތި ދޮގު ކުރައްވައި އޭނާ ދިފާއު ކުރައްވަން މަސައްކަތް ކުރައްވާފައި ވެސް ވެ އެވެ.
ފޯރިގަދަ ބަހުސެއް މިރޭ ފެނިގެން ދިޔައިރު، އަންނަ ހޮނިހިރު ދުވަހު ބާއްވާ އިންތިހާބު ކާމިޔާބު ކުރާ ޗެއާޕާސަން އެމްޑީޕީގެ ދެން އޮންނަ ކޮންގްރެސްގެ ރިޔާސަތު ބަލަހައްޓަވާނެ އެވެ. "ދެވަނަ އުކުޅަސް ކޮންގްރެސް" އަށް ޕާޓީގެ ރައީސް މުހައްމަދު ނަޝީދުގެ ގިނަ ހުށަހެޅުއްވުންތަކެއް ހުރިއިރު، މި އިންތިހާބުގެ ފޯރިގަދަ ވެފައި ވަނީ މި ސަބަބުތަކާ ހުރެ އެވެ.
އެމްޑީޕީގެ އެތެރޭގައި ރައީސް އިބްރާހީމް މުހައްމަދު ސޯލިހްގެ ފެކްޝަނަކާއި ރައްޔިތުންގެ ރައީސް ނަޝީދުގެ ފެކްޝަނެއް ވެސް އުފެދި، މި އިންތިހާބުގައި ވެސް މި ފެންނަނީ މި ދެ ފެކްޝަންގެ ވާދަވެރިކަމެވެ. ރައީސްގެ ތާއީދު އޮތީ ފައްޔާޒަށެވެ. އަދި ނަޝީދު ތާއީދު އޮތީ އިންތިއަށެވެ.
އެމްޑީޕީގެ އެތެރޭގެ އިންތިހާބަކީ ސިޔާސީ ޕާޓީއަކުން ރާއްޖޭގައި ބާއްވާ އެންމެ ބޮޑު އެއް އިންތިހާބެވެ. އެ އިންތިހާބުގައި ވޯޓުލުމުގެ ހައްގު ލިބޭ މެމްބަރުންގެ އަދަދު 90،000 އަށް ވުރެ އިތުރެވެ. ނަމަވެސް މީގެ ކުރީގެ އިންތިހާބުތަކުގައި ވޯޓު ދީފައި ވަނީ ހައްގު ލިބޭ މީހުންނާ އަޅާބަލާއިރު އެވްރެޖްކޮށް މަދުންނެވެ.
