ދައުލަތުގެ ބަޖެޓުން ޕީޕީއެމަށް ދޫކުރަން ޖެހޭ ފައިސާއިން 50،000 ރ. އުނިކުރުމަށް ފަހު މިދިޔަ ހަފުތާ ގައި ދޫކޮށްފި އެވެ.
ގާނޫނުގައި ކަނޑައަޅާފައިވާ 10،000 މެމްބަރުންގެ ޝަރުތު ފުރިހަމަ ވަނީ އިދިކޮޅު ޕީޕީއެމްގެ އިތުރަށް ވެރިކަން ކުރާ ކޯލިޝަންގައި ހިމެނޭ އެމްޑީޕީ، ޖުމްހޫރީ ޕާޓީ، އަދި އަދާލަތު ޕާޓީއަށެވެ.
ޕީޕީއެމް ފިޔަވައި އެހެން ޕާޓީތަކަށް މި މަހުގެ ހަތްވަނަ ދުވަހު ފައިސާ ދޫކުރިއިރު، އެ ޕާޓީއަށް ފައިސާ ދޫކުރީ މިދިޔަ ހަފުތާގެ ހޯމަ ދުވަހުގަ އެވެ.
ފިނޭންސް މިނިސްޓްރީން ބުނި ގޮތުގައި، ޕީޕީއެމަށް ފައިސާ ދޫކުރުން ލަސްވީ ވެސް ސިވިލް ކޯޓުގައި މައްސަލައެއް އޮވެގެންނެވެ. އެކަމަކު އޭގެ ހުކުމް އައުމުން ފައިސާ ދޫކުރީ އެވެ.
އެނގިފައިވާ ގޮތުގައި ޕީޕީއެމަށް ދޫކުރަން ޖެހޭ ފައިސާއިން 50،000 ރުފިޔާ އުނިކުރުމަށް ފަހު ފައިސާ ދޫކުރީ ވެސް އެ ކަމުގެ ހުކުމް އައި ގޮތަކުންނެވެ.
ބަޖެޓުން ޕީޕީއެމަށް ދޫކުރަން އޮތީ 9.2 މިލިއަން ރުފިޔާ އެވެ. ނަމަވެސް، ޕީޕީއެމަށް ފިނޭންސުން ދޫކުރީ 8.9 މިލިއަން ރުފިޔާ އެވެ.
ޕީޕީއެމްގެ ތަރުޖަމާނު ހީނާ ވަލީދު ވިދާޅުވި ގޮތުގައި، ސިވިލް ކޯޓުން ކުރި ހުކުމަކީ 2018 ގެ ރިޔާސީ އިންތިހާބުގައި އެ ޕާޓީން ފައިސާ ދައްކާ ގޮތަށް ތަކެތި ހޯދި ބަޔަކަށް ފައިސާ ނުދީ އޮތް މައްސަލައެއްގައި ކުރި ހުކުމެކެވެ.
"ފިނޭންސް މިނިސްޓްރީން ފައިސާ އުނިކޮށްފައި ވަނީ އެ ފައިސާއިން،" ހީނާ ވިދާޅުވި އެވެ.
ދޫކުރި ފައިސާގެ އަަދަދު:
1. އެމްޑީޕީ: 15.02 މިލިއަން ރުފިޔާ (54،660 މެމްބަރުން)
2. ޕީޕީއެމް: 8.9 މިލިއަން ރުފިޔާ (34،237 މެންބަރުން)
3. ޖޭޕީ: 5.53 މިލިއަން ރުފިޔާ (20،107 މެންބަރުން)
4. އަދާލަތު ޕާޓީ: 2.9 މިލިއަން ރުފިޔާ (10،554 މެންބަރުން)
