ލަންޑަން (އޭޕްރީލް 25) - މި ސީޒަނުގެ ނިޔަލަށް ޗެލްސީގެ ކޮންޓްރެކްޓްގައި ހުރި ޖަރުމަނުގެ ޑިފެންޑަރު އެންޓޯނިއޯ ރުޑިގާ ހިލޭ ޓްރާންސްފާއެއްގައި ސްޕެއިނުގެ ގަދަބާރު ރެއާލް މެޑްރިޑަށް ބަދަލުވާން ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.
މި ސީޒަނުގެ ކުރީކޮޅުގައި ޗެލްސީން ވަނީ އުމުރުން 29 އަހަރުގެ ރުޑިގާ އަށް އާ ކޮންޓްރެކްޓެއް ދޭން ގިނަ މަޝްވަރާތަކެއް ކޮށްފަ އެވެ. އެކަމަކު، އޭރު ރުޑިގާ ބޭނުންވާ މުސާރަ ދޭން ޗެލްސީން ދެކޮޅު ހަދަމުންދާތީ، ކޮންޓްރެކްޓްގެ ކަންކަން ދިގުލައިދިޔައީ އެވެ. އަދި ދާދި ފަހުން ރަޝިއާ އާއި ޔޫކްރެއިންގެ މައްސަލައިގައި ޗެލްސީގެ ވެރިޔާ ރޯމަން އަބްރަމޮވިޗް އަށް އެޅި ފިޔަވަޅުތަކުގެ ތެރެއިން ޗެލްސީ ހިންގުމަށް ވެސް ހުރަސްތަކެއް ކުރިމަތިވެފައިވާއިރު، އުސޫލުތަކުގެ ތެރެއިން ރުޑިގާ ބޭނުންވާ ކޮންޓްރެކްްޓް ދީގެން އެއްބަސްވުން އާ ކުރެވެން ނެތީ އެވެ.
އިނގިރޭސި ޕްރިމިއާ ލީގުގައި ރޭ ވެސްޓް ހޭމް ޔުނައިޓެޑް އަތުން ޗެލްސީ މޮޅުވި މެޗަށް ފަހު އެ ޓީމުގެ ކޯޗު ތޯމަސް ޓުޗެލް ވެސް ވަނީ އޭނާ ގާތުގައި ރުޑިގާ، ޗެލްސީ ދޫކޮށްލަން ނިންމާފައިވާކަން ހިއްސާކޮށްފައިވާ ކަމަށް ބުނެފަ އެވެ.
"އަހަރެމެންނަށް އަޅާފައިވާ ފިޔަވަޅުތަކުގެ ސަބަބުން މި ތިބީ އަތްބަދެވިފައި. އެހެންވީމަ، ރުޑިގާ ބޭނުންވާ ގޮތަށް ކޮންޓްރެކްޓް އާ ކުރެވެން ނެތީމަ، ދެން އިތުރު ގޮތެއްނެތި، ރުޑިގާ އަށް ޖެހެނީ ކްލަބުން ދާން،" ޓުޗެލް ބުންޏެވެ.
އޭއެސް ރޯމާ ދޫކޮށް 2017 ވަނަ އަހަރު ޗެލްސީ އަށް ބަދަލުވި ރުޑިގާ ހޯދަން މެންޗެސްޓާ ޔުނައިޓެޑާއި ބަޔާން މިއުނިކް އަދި ޕީއެސްޖީން ވެސް މަސައްކަތްކުރި އެވެ. ފަސް އަހަރު ޗެލްސީ އަށް ކުޅެދިން ރުޑިގާ ވަނީ އެ ޓީމާ އެކު ޗެމްޕިއަންސް ލީގު، ޔޫރޮޕާ ލީގު، އެފްއޭ ކަޕް، ޔުއެފާ ސުޕަ ކަޕް އަދި ފީފާ ކްލަބް ވޯލްޑް ކަޕް ކާމިޔާބުކޮށްފަ އެވެ.
އެކަމަކު، ރުޑިގާ ބޭނުންވާ މުސާރަ ދޭން އެއްބަސްވީ ރެއާލް މެޑްރިޑުންނެވެ. ރުޑިގާ ބޭނުންވަނީ ހަފްތާ އަކު 400،000 ޑޮލަރުގެ މުސާރަ އެކެވެ.
