ކޮވިޑް-19 ޕެންޑަމިކާ ގުޅިގެން އާސަންދަ ސްކީމުގެ ދަށުން ބޭސް ފަރުވާ ކުރަން ދިން ލުއިތައް އެ ކުންފުނިން މިއަދު އުވާލައިފި އެވެ.
ކޮވިޑާ ގުޅިގެން އާސަންދަ ސްކީމް މެދުވެރިކޮށް ޑޮކްޓަރަށް ދެއްކުމާއި ބޭސް ނެގުމުގައި ލުއި ގޮތްތަކެއް އާސަންދައިން ހަމަޖައްސައިދިނެވެ. ނަމަވެސް މިއަދު ވަނީ އެ ލުއިތައް އުވާލާފަ އެވެ. އޭގެ ތެރޭގައި ދިގު މުއްދަތަށް ބޭސް ބޭނުން ކުރާ މީހުންނަށް ގަނޑުކޮށް ބޭސް ދޫކުރުން ހިމެނެ އެވެ.
އާސަންދައިން ބުނީ ސިއްހީ ކުއްލި ނުރައްކަލުގެ ހާލަތު އުވާލުމާ ގުޅިގެން އާސަންދަ ސްކީމްގެ ހިދުމަތް ހޯދުމުގައި އާންމު ރައްޔިތުންނަށް ދިމާވެފައިވާ ދަތިތައް ހައްލު ކުރުމުގެ ގޮތުން، އެހާލަތުގައި ދީފައިވާ ލުއިތައް އުވާލާ ކުރީން އާސަންދަ ސްކީމްގެ ދަށުން ހިދުމަތް ފޯރުކޮށްދެމުން ގެންދިޔަގޮތަށް ހިދުމަތްތައް ބަދަލު ކޮށްފައިވާ ކަމަށެވެ.
އޭގެ ތެރޭގައި ދިގު މުއްދަތަކަށް ބޭސްކުރަން ޖެހޭ ބަލިތަކަށް ބޭސްފަރުވާ ކުރާ މީހުންނަށް ކުރިއެކޭ އެއްފަދައިން، ކޮންމެ ބޭސްސިޓީ އަކަށް ވެސް ބޭސް ދޫކުރާނީ އެއް ފަހަރު ކަމަށް އެ ކުންފުނިން ބުންޏެވެ. އަދި އަލުން ބޭސް ނަގަން ޖެހޭނަމަ އާ ބޭސް ސިޓީއެއް ހޯދަން ޖެހޭނެ ކަމަށް ވެސް އެ ކުންފުނިން ބުންޏެވެ.
ދެން އެ ކުންފުނިން އޮންލައިން ޑޮކްޓަރަށް ދެއްކުމުގެ ހިދުމަތް ފޯރުކޮށް ދޭނީ ހަމައެކަނި "ވިނަވި" ޕޯޓަލް މެދުވެރިކޮށް ހިދުމަތް ފޯރުކޮށްދޭ މަރުކަޒުތަކުންނެވެ.
އޮންލައިން ކޮންސަލްޓޭޝަންގެ ތެރެއިން ބަލިމީހާއަށް އިތުރު އެއްވެސް ހިދުމަތެއް ނަގަން "ވިނަވި" ޕޯޓަލް މެދުވެރިކޯށް ރިކުއެސްޓް ކުރުމަށާއި އެ ޕޯޓަލްއިން ރިކްއެސްޓް ނުކުރާނަމަ ހިދުމަތް ނުދޭނެ ކަމަށް ވެސް އާސަންދައިން ބުންޏެވެ.
"އާސަންދަ ސްކީމުގެ ދަށުން ބޭސް ދޫކުރާނީ މައެކަނި އީ-ޕްރިސްކްރިޕްޝަނަށް. އަތުން ލިޔެފައިވާ ބޭސް ސިޓީތަކަށް ދެން ބޭސް ދޫނުކުރާނެ،" އާސަންދައިން ބުންޏެވެ.
އާސަންދައިން ގެނައި ބަދަލާ އެކު އާސަންދަ ސްކީމުގެ ކަވަރޭޖް ދެވޭނީ އައިޑީކާޑު/ ޕާސްޕޯޓްގެ އަސްލު ނުވަތަ ސޮފްޓް ކޮޕީއެއް ހުށަހަޅައިގެންނެވެ.
