ޑްރަގް ކޮންޓްރޯލް ކުރުމާ ގުޅޭ ނޭޝަނަލް ސްޓްރަޓެޖިކް ޕްލޭން ޖޫން މަހު ލޯންޗުކުރުމަށް ނިންމާފައިވާ ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެ އެވެ.
ދުނިޔޭގެ ސިއްހަތު ދުވަސް ފާހަގަކުރުމުގެ ގޮތުން ބޭއްވި ޖަލްސާގައި ވާހަކަ ދައްކަވަމުން މިނިސްޓަރު ވިދާޅުވީ މި މުޖުތަމައުގައި އިތުރު ބަލިމަޑުކަމެއް އާލާވެ ފެތުރެމުން ދާކަމަށެވެ. އެއީ މަސްތުވާތަކެތީގެ ބަލިމަޑުކަމެވެ.
މިނިސްޓަރު ވިދާޅުވީ މިދިޔަ އަހަރުގެ މެއި މަހު ހެލްތު މިނިސްޓްރީން، ޑްރަގުން ރައްކާތެރިވުމާ ގުޅޭ މަސައްކަތާ ހަވާލުވިފަހުން ކުރަމުންދާ މަސައްކަތުގެ ތެރެއިން ޑަބްލިޔޫއެޗްއޯ ގެ އެހީތެރިކަމާއެކު ކަމާ ގުޅުންހުރި ގިނަ ދިރާސާތަކެއް ކޮށް، ޑްރަގް ކޮންޓްރޯލް ކުރުމާ ގުޅޭ ނެޝަލް ސްޓްރަޓެޖިކް ޕްލޭން ޖޫން މަހު ލޯންޗުކުރުމަށް ތާވްލްކޮށްފައިވާކަމަށެވެ.
މިނިސްޓަރުގެ ވާހަކައިގައި ވިދާޅުވީ ރައީސް އިބްރާހިމް މުހައްމަދު ސޯލިހް އެންމެ އިސް ކަމެއް ދެއްވަނީ ތިމާވެއްޓާ އިންސާނުންގެ ސިއްހަތު ރައްކާތެރިކުރުމަށް ކަމަށެވެ.
ވަކިން ހާއްސަކޮށް، "ހަށިހެޔޮ ދުޅަހެޔޮ" ރައްޔިތެއް ބިނާ ކުރުމަށާ، ރައްޔިތުންގެ ސިއްހީ ރައްކާތެރިކަމާ، ބޭސްފަރުވާގެ ކަންކަން ކަށަވަރުކުރުމަށް، މި ސަރުކާރުން އަލަށްފެށި މަޝްރޫއުތަކުގެ ކާމިޔާބުން ސިއްހީ ދާއިރާއަށް އިންގިލާބީ ބަދަލުތަކެއް އަންނަމުން ދާ ކަމަށް މިނިސްޓަރު ވިދާޅުވި އެވެ.
ރާއްޖޭގައި މަސްތުވާތަކެތީގެ ހާލަތު ބޮއްސުންލާފައިވާ މިންވަރަކީ އެންމެ އަށް އަހަރުގެ ކުދިން އިން ފެށިގެން އުމުރުން 50 އަހަރުން މަތީގެ މީހުންވެސް މިކަމުގައި އަންމުކޮށް އުޅޭ ކަމެވެ. އަދި މަސްތުވާ ކެފޭތަކުން ހިދުމަތް ހޯދާކަމެވެ.
