ރާއްޖެއަކީ ރައީސެއްގެ ބެއްލެވުމުގެ ދަށުން ކޮވިޑް މެނޭޖްކޮށް ބަލިމަޑުކަމުން އަރައިގައިގެން އެއް ގައުމު ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެ އެވެ.
ދުނިޔޭގެ ސިއްހަތު ދުވަސް ފާހަގަކުރުމަށް ބޭއްވި ޖަލްސާގައި ވާހަކަދައްކަމުން ނަސީމް ވިދާޅުވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވެރިކަމާ ހަވާލުވެވަޑައިގެން އިރުވެސް ސިއްހީ ދާއިރާއަކީ، ގޮންޖެހުންތައް ގިނަ، ތަފާތު މައްސަލަތައް ފުނިޖެހިފައިވާ، ވަރަށް ބޮޑެތި އިސްލާހީ ބަދަލުތައް ގެނެސްގެން ނޫނީ، ހިދުމަތްތައް ރަނގަޅު ނުކުރެވޭނެ ހާލަތުގައި އޮތް ދާއިރާއެއް ކަމަށެވެ.
މި ހާލަތުގައި އޮއްވާ، ގައުމު ކުރިމަތިލާންޖެހުނީ، ކޮވިޑުގެ ބަލިމަޑުކަމުގެ ބުރަ މަސައްކަތާ ކަމަށް މިނިސްޓަރު ވިދާޅުވި އެވެ. ނަތީޖާ އަކަށްވީ ސިއްހީ ހިދުމަތް ދިނުމުގައި މަސައްކަތްކުރަމުން ދިޔަ ބިދޭސީ ސިއްހީ ހިދުމަތްތެރިން އެމީހުންގެ ގައުމުތަކަށް އެނބުރި ދާން ފެށުމާ ބޭރުން އިތުރަށް މީހުން ލިބުން ދަތިވެ އަދި ހިދުމަތުގައި ދެމި ތިބި މީހުންވެސް ކޮވިޑް ބައްޔަށް ހުށަހެޅެމުންދިޔުން ކަމަށް މިނިސްޓަރުގެ ވާހަކައިގައި ފާހަގަ ކުރެއްވި އެވެ.
"ރާއްޖޭގެ ކޭސްލޯޑް މައްޗައް ދިޔުން. ޓެސްޓް ކުރުމާ ސއްިހީ ފަރުވާއާއި، ރައްކާތެރިކަމަށް ބޭނުންވާ ބޭހާއި އެހެނިހެން ސާމާނު، އިމްޕޯޓް ކުރާ ގައުމަކަށް ރާއްޖެ ވީއިރު، އެތަކެތި ލިބުން އިންތިހާ އަށް ދަތިވެ ރާއްޖެ ގެނެވޭނެގޮތް ނެތުމުން ދިމާވާނެ ގޮންޖެހުން ތަކަކީވެސް ފަސޭހައިން އިހުސާސް ކުރެވެން އޮތް ހަގީގަތެއް،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ފަތުރުވެރިކަމަށް ބަރޯސާ ވެފައިވާ އިގްތިސޯދެއްގައި، ފަތުރުވެރިކަން އެއްކޮށް ހުއްޓުމުން ކުރިމަތިވާނޭ މާލީ ދަތިތަކާ އިޖްތިމާއީ ގޮންޖެހުން ތަކާ ކުރިމަތިލާން ޖެހުނު ނަމަވެސް އެ ހާލަތުގައި ވެސް ރާއްޖެ ވަނީ، ދުނިޔެއަށް ނަމޫނާ ދައްކައި ދީފައި ކަމަށެވެ.
"ރައީސް ސޯލިހުގެ ސީދާ ބެއްލެވުމުގެ ދަށުން މިއީ ކޮވިޑްގެ ކަންކަން އެންމެ ރަނަގަޅަށް 'މެނޭޖް" ކުރި އެއް ގައުމު. އެންމެ އަވަހަށް ބޯޑަރު ހުޅުވާ އިގްތިސޯދީ އަދި އިޖްތިމާއީ ހަރަކާތްތަކަށް ރުޖޫ ވި ގައުމު. ކޮވިޑް ގެ އެންމެ ނުރައްކާ ހާލަތުން އެންމެ އަވަހަށް އަރައިގަން އެއް ގައުމަކީ ރާއްޖެ،" މިނިސްޓަރު ނަސީމް ވިދާޅުވި އެވެ.
ރާއްޖޭގައި ކޮވިޑް ފެތުރޭ މިންވަރު ކުޑަވެ ބަލި ކޮންޓްރޯލް ކުރެވިފައިވާތީ، ކޮވިޑާ ގުޅިގެން އިއުލާންކޮށްފަ އޮތް ސިއްހީ ކުއްލި ނުރައްކަލުގެ ހާލަތު ދެ އަހަރަށް ފަހު ވަނީ އުވާލާފަ އެވެ. އަދި ރައްކާތެރިކަމުގެ ގޮތުން އަޅާފައިވާ ގިނަ ފިޔަވަޅުތަކެއް މިދިޔަ މަހު ވަނީ ނިމުމަކަށް ގެނެސް އާންމު ހާލަތަށް ރުޖޫއަވެފަ އެވެ.
