މީގެ 20 ވަރަަކަށް އަހަރު ކުރިން ވެސް ސާފިން އާއި ބޮޑީބޯޑިން ފަދަ މޫދު ކުޅިވަރުގައި އަންހެނުން ބައިވެރިވެ އުޅުނެވެ. ރަސްމީ ސިފައެއްގައި ސާފިން އާއި ބޮޑީބޯޑިންގައި ވެސް މި ފަހުން ވަނީ ވާދަވެރިކޮށް ރާޅާއެޅުމަށްޓަކައި އަންހެން ޑިވިޝަނެއް ހިމަނައިފަ އެވެ. ތާރީހީ މި ބަދަލުގައި، ވަނީ އުންމީދުގެ ކުލަވަރު ޖެހިފަ އެވެ. ދާދި ފަހުން ނިމުނު އެމްޓީސީސީ ބުރުނު ޝިކާރު ޗެލެންޖް 2022، ގައި ވަނީ އަންހެން ޑިވިޝަނެއް ފުރަތަމަ ފަަހަރަށް ހިމަނައި، ފުރަތަމަ ޗެމްޕިއަން ވެސް ހޮވައިފަ އެވެ.
ހަތަރު ބޮޑީބޯޑަރުން ވާދަކުރި އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖްގެ މި ޑިވިޝަނުގެ ޗެމްޕިއަންކަން ހޯދީ ލުޖެއިން ހަސަން އެވެ. ދެން ވާދަކުރީ ދަފީނާ ހަސަން އިބްރާހިމް (ދަފީ)، ލުޖެއިން އަދި ޝާޒިޔާ ސައީދު (ސާޒު) އެވެ. މީގެ ތެރޭގައި މި ތިބީ މަދުވެގެން ފަސް އަހަރަށް ވުރެ ގިނަ ދުވަހު މޫދު ކުޅިވަރުގައި، ސާފިން އާއި ބޮޑީބޯޑިންގައި އުޅެފައިވާ މިކަމުގެ ހުނަރު ހުރި ފަރާތްތަކެވެ.
މޫދު ކުޅިވަރުގައި ގިނަ އަހަރުތަކެއް ވަންދެން ބައިވެރިވެ، އުޅުނު ލުޖެއިން އަށް ލިބުނު މި ތާރީހީ ކާމިޔާބީގައި އޭނާ އަށް އޮތް ހިތްހަމަޖެހުމަކީ އެކުގައި މިކަމުގައި އުޅޭ ބޮޑީބޯޑަރުންނާ އެކު ވަރަށް އެކުވެރި ރޫހެއްގައި މުބާރާތެއްގައި ރާޅާ އަޅާލަން ލިބުމެވެ.
"ވަރަށް އުފާވޭ، ވަކިން ކެޓަގަރީއެއް ބޭއްވީމަ ވެސް. ބައިވެރިވި ކުދިން، ޝާޒު، ދަފީ، އަދި ރައު ވަރަށް ވަރަށް މަޖާ އަސްލު އެ ކުދިންނާ އެކު (ރާޅާ) އަޅާލެވުނީމަ،" އެމްޓީސީސީ ބުރުނު ޝިކާރު ޗެލެންޖްގެ ނިންމުމުގެ ރަސްމިއްޔާތަށް ފަހު "އަދަދު" އަށް ލުޖެއިން ބުންޏެވެ.
އަންހެން ޑިވިޝަންގައި ވާދަކުރި ހަތަރު ބޮޑީބޯޑަރުން: (ކ.ވ) ލުޖެއިން، ސާޒު، ދަފީ އަދި ރައު.-- ފޮޓޯ: އަބްދުﷲ އިޔާން/ އަދަދު
ބުރުނު ޝިކާރު އަލުން މި ބޭއްވީ ހަތް އަހަރު ފަހުންނެވެ. މީގެ ކުރިން އަންހެން ޑިވިޝަނެއް މި މުބާރާތުގައި ނެތްއިރު ވެސް މިއީ ބޮޑީބޯޑަރުންގެ "އީދެއް" ގޮތަށް އަހަރު ފަށަން އޮންނަ އިވެންޓެއް ކަމަށްވާތީ މި ކަމަށް ޝައުުގުވެރިކަން ހުންނަ އެންމެން ބައިވެރިވެ އެވެ. ބުރުނު ޝިކާރު ފަދަ ބޮޑީބޯޑިންގެ ޝަރަފްވެރި މުބާރާތަކުން އަންހެން ޑިވިޝަން ފެށުމަކީ ވެސް ލުޖެއިން އަށް ލިބުނު އުފަލެކެވެ.
"ބުރުނު ޝިކާރު އަލުން ބޭއްވީމަ ވެސް އުފާވޭ، އަހަރުން އެންމެން ވެސް ވަރަށް ކުރިއްސުރެ ވެސް ބޭނުންވެފަ ހުރީ (މި މުބާރާތުގެ ތެރެއިން ފުރުސަތެއް). ވަރަށް ވަރަށް އުފާވެއްޖެ އަސްލު. ފުރަތަމަ އަންހެން ކެޓަގަރީއެއް މި މުބާރާތުގައި އިނީމަ ވެސް ވަރަށް ކޫލް،" ލުޖެއިން ބުންޏެވެ.
"އޭގެ އިތުރުން ލުޖެއިން އުންމީދުކުރަން އެންމެން އެއްކޮށް (އަންހެން އަދި ފިރިހެން ޑިވިޝަން) ރާޅާ އަޅާނެ ފުރުސަތެއް ވެސް ލިބޭނެ ކަމަށް، މަށަށް ހީވަނީ އޭރު ވެސް ވަރަށް ސަޅިވާނެހެން،"
ލުޖެއިންގެ ބޮޑީބޯޑިން އަށް ބޭނުންކުރާ ބޯޑުގައި ވަނީ މުހިންމު މެސެޖްތަކެއް ޖަހައިފަ އެވެ. އެއީ ފަރުތައް ހަލާކުކުރުމާއި ރާޅު ސްޕޮޓްތައް ހިމާޔަތް ކުރަން ދީފައިވާ މެސެޖްތަކެކެވެ.
އާއިލާއެއް ފެށުމަށް ފަހު ދަރިން ލިބުމުން ވެސް މޫދު ކުޅިވަރަށް ލުޖެއިން ޖެހިފައިވާ ލޯބި މަދެއްނުވި އެވެ. އޭނާ ދެކެނީ މޫދުކުޅިވަރަށް މިހާރަށް ވުރެ ބޮޑަށް ފަހި ފުރުސަތުތަކެއް އޮތުމެވެ. އެ ފުރުސަތުތަކުގައި ބޭނުންވާ މިސްރާބަށް ދެވެން އޮތީ ރާޅުތައް ހިމާޔަތްކޮށްގެންނެވެ. ސާފް ޕޮއިންޓްތަކަށް ރައްކާތެރިކަން ލިބިގެންނެވެ.
"ލުޖެއިން ވަރަށް އުންމީދުކުރަން މި އުޅޭ ކުދިން މިތަންތާ (ރާޅާ) އަޅާތަން ފެންނާނެ ކަމަށް. އަންހެން ކުދިން ނޫނަސް، ކުޑަ ފިރިހެން ކުދިން ވިޔަސް، (މޫދަށް) އެރި އުޅޭތަން ފެނޭ،" ލުޖެއިން ބުންޏެވެ.
"އެންމެ ބޮޑަށް، އަހަރެމެން ރާޅާ އަޅާމީހެއްގެ ހައިސިއްޔަތުން މަށަށް އިންނަ ކޮންސާނަކީ (ކަންބޮޑުވުމަކީ) ވަރަށް ގިނަ ރާޅުތައް ގެއްލިގެން އަދި ނެތިގެން އެބަދޭ އަސްލު. އެކަމާ އެންމެ ކަންބޮޑުވަނީ. މިކުދިން ބޮޑުވެގެން އަޅާލާނެ ރާޅެއް ނެތީއާ ދެން ކިހިނެއް ހަދާނީ ދޯ،"
