މި އަހަރު އަލަށް ފެށި، ގައުމީ ބޮޑީ ބޯޑިން ލީގުގެ ފުރަތަމަ މުބާރާތް ކަމަށްވާ އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖްގައި މުޅިން އަލަށް ކުރިއަށްގެންދިޔަ އަންހެން ޑިވިޝަންގެ ޗެމްޕިއަންކަން ހޯދައި ލުޖެއިން ހަސަން ހޯދައި ތާރީހުން ޖާގަ ހޯދައިފި އެވެ.
ހަތް އަހަރުގެ މެދު ކެނޑުމަކަށްފަހު މި އަހަރު ބުރުނު ޝިކާރު ފެށީ ކުރިން ހިމެނުނު އޯޕަން ބަޔާއި، ޖޫނިއާ ބައިގެ އިތުރުން އަންހެން ބައި ވެސް ހިމަނައިގެންނެވެ. އަލަށް ބޭއްވި އަންހެން ބައިގައި މި އަހަރު ހަތަރު ބޮޑީބޯޑަރުން ވާދަކުރި އެވެ. އެއީ ދަފީނާ ހަސަން އިބްރާހިމް، ރައުފާ، ލުޖެއިން އަދި ޝާޒިޔާ ސައީދު (ޝާޒު) އެވެ.
އަންހެން ޑިވިޝަނުގައި ވާދަކުރި ހަަތަރު ބޮޑީބޯޑަރުން: (ކ.ވ) ލުޖެއިން، ޝާޒް، ދަފީނާ އަދި ރައުފާ.-- ފޮޓޯ: އަބްދުﷲ އިޔާން/ އަދަދު
ފައިނަލުގައި ވާދަކުރީ ފުރަތަމަ ދެ ހީޓުން ކުރި ހޯދި ދެ ބޮޑީބޯޑަރުންނެވެ. އެ ގޮތުން ފައިނަލުގައި މިއަދު ހަވީރު ދަފީނާ އާއި ވާދަކޮށް ކުރި ހޯދައި ރާއްޖޭގެ ފުރަތަމަ އަންހެން ބޮޑީބޯޑިން ޗެމްޕިއަންގެ ޝަރަފް ހޯދީ ލުޖެއިން އެވެ. ލުޖެެއިން ވަނީ ފައިނަލްގައި 6.84 ޕޮއިންޓްގެ ސްކޯއެއް ހޯދައިފަ އެވެ. ވާދަވެރި ފައިނަލުގައި ދަފީނާ އަށް ސްކޯ ކުރެވުނީ 5.76 ޕޮއިންޓެވެ.
ތިން ވަނަ ހޯދީ 6.27 ގެ ސްކޯއަކުން ރައުފާގެ މައްޗަށް ކުރި ހޯދި ތަޖުރިބާކާރު ރާޅާ އެޅުންތެރިޔާ ޝާޒު އެވެ. ތިން ވަނަ ހޮވަން ކުރިއަށްދިޔަ ހީޓުގައި ރައުފާ އަށް ހޯދުނީ 2.24 ޕޮއިންޓުގެ ސްކޯ އެކެވެ. އަދި ތިން ވަނަ މަގާމު ހޯދި ޝާޒު އަކީ މިދިޔަ އަހަރު ކުރިއަށްދިޔަ ގައުމީ ސާފިން މުބާރާތުގެ ރަނަރަޕް އެވެ.
އަންހެން ކެޓަގަރީ އަށް ބަލާއިރު ހުރިހާ ބޮޑީބޯޑަރުން ވެސް ވަނީ ހީޓަކަށް ފަހު ހީޓެއްގައި ސްކޯ ރަނގަޅުކޮށްފަ އެވެ. އަދި ފައިނަލާއި ތިން ވަނަ ހޮވަން ކުރިއަށްދިޔަ ހީޓުގައި ހޯދި ސްކޯ އެކޭ އެއްގޮތަށް އެޅި ރާޅުގެ އަދަދު ވެސް އިތުރެވެ.
އަންހެން ޑިވިޝަނުގެ ފައިނަލް ހީޓުގެ ތެރެއިން ލުޖެއިން ރާޅާއަޅަނީ.--- ފޮޓޯ: އަބްދުﷲ އިޔާން/ އަދަދު
އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖްގެ ނިންމުމުގެ ރަސްމިއްޔާތު ޝަރަފްވެރިކޮށްދެއްވީ ކުޅިވަރާ ބެހޭ ވަޒީރު އަހުމަދު މަހުލޫފް އެވެ. މަހުލޫފް ވިދާޅުވީ އަންހެން ޑިވިޝަން ތައާރަފްކުރުމަކީ މަރުހަބާ ކިޔަންޖެހޭ ކަމެއް ކަމަށާއި މި ފަަދަ އާ ކަންތައްތައް ކޮށް އެސޯސިއޭޝަންތަކުގެ މަސައްކަތްތައް ފުޅާކުރަމުންދާ ވަރަކަށް މިނިސްޓްރީން ދޭ އެއްބާރުލުން ވެސް ދާނީ ފަހަރަކަށް ވުރެ ފަހަރެއް ރަނގަޅުވަމުން ކަމަށެވެ.
މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ)ގެ ވިސްނުމަކީ އަންހެން ބޮޑީބޯޑަރުންނަށް ހާއްސަ ޑިިވިޝަނެއް ބާއްވައި، ޑިވެލޮޕްކުރުމެވެ.
އެމްބީބީއޭ އިން މައުލޫމާތު ދޭ ގޮތުގައި ރާއްޖޭގެ އެކި ކަންކޮޅުތަކުގައި އިވެންޓައް ބޭއްވުމުގެ ހުށަހެޅުންތައް ލިބެމުންދާތީ ކުރިއަށް އޮތްތަނުގައި ރަށްރަށުގައި ބާއްވާ އިވެންޓްތައް އިތުރުވުމުގެ ފުރުސަތު އެބައޮތެވެ.
ބޮޑީބޯޑިންގެ ފޯރި އިތުރަށް ވަރުގަދަ ކުރުމުގެ ބޭނުމުގައި ފަށާ ގައުމީ ލީގުގައި ކުރިއަށްދާ އުސޫލަށް ބަލާއިރު، ކޮންމެ ލީގުގައި ހިމެނޭ ކޮންމެ އިވެންޓަކުން ނޫނީ މުބާރާތަކުން ޕޮއިންޓް ލިބޭނެ އެވެ. ޖުމްލަ ރޭންކިން ކަނޑައެޅޭނީ ހަ މުބާރާތް ނިމުމުންނެވެ. އަހަރު ނިމޭއިރު ރޭންކިންގެ އެންމެ ކުރީގައި އުޅޭނީ އަހަރުގެ އެއް ވަނަ ބޮޑީބޯޑަރެވެ.
ބޮޑީބޯޑިން އެސޯސިއޭޝަންގެ އޮންލައިން މީޑިއާ ޕާޓްނަރަކީ "އަދަދު" އެވެ.
