ހަތް އަހަރުގެ މެދުކެނޑުމަކަށް ފަހު ރާއްޖޭގެ ބޮޑީބޯޑިންގެ ހައްސަ މުބާރާތް، އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖް އިއްޔެ، ރާޅުގަނޑު ސަރަހައްދުގައި ކުރިއަށްދާއިރު، ފުރަތަމަ ދެ ދުވަހު ވެސް މިހާތަނަށް ވަނީ ފޯރިގަދަ ހީޓްތަކެއް ކުރިއަށް ގޮސްފަ އެވެ.
އިއްޔެ ވަނީ މެންސް އޯޕަން ޑިވިޝަނުގެ ފުރަތަމަ ރައުންޑްގެ ނުވަ ހީޓަކާއި ޖޫނިއާ މެންސް ޑިވިޝަނުގެ ފުރަތަމަ ރައުންޑުގެ ހަތަރު ހީޓެއްގެ އިތުރުން މެންސް އޯޕަން ޑިވިޝަނުގެ ދެ ވަނަ ރައުންޑްގެ ރީކޮލިފައިން ތިން ހީޓެއް ކުރިއަށްދިޔަ އެެވެ.
ފިރިހެނުންގެ އޯޕަން ޑިވިޝަނާއި ޖޫނިއާ މެންސް ޑިވިޝަނުގައި އިއްޔެ ވަނީ 18 ހީޓެއް ޖުމްލަ އެއްކޮށް ކުރިއަށް ގޮސްފަ އެވެ. ހީޓެއްގެ ދިގުމިނަކީ 20 މިނިޓެވެ. މީގެއިން ކޮންމެ ހީޓެއްގައި 15 ރާޅު އަޅަން ކޮންމެ ބޮޑީބޯޑަރަކު ފުރުސަތު އޮންނައިރު، އޭގެއިން ޖަޖުން ހޮވާނީ އެންމެ ގިނަ ޕޮއިންޓް ދެވޭނެ ދެ ރާޅެއްގެ ޕޮއިންޓްތަކެވެ.
އިއްޔެ ވަނީ އަންހެން ޑިވިޝަނުގެ ދެ ހީޓެއް ވެސް ވަނީ ކުރިއަށް ގޮސްފަ އެވެ. މި މުބާރާތަކީ ރާއްޖޭގެ ބޮޑީބޯޑިންގައި އަންހެން ޑިވިޝަނެއް ހިމެނި ފުރަތަމަ ފަހަރެވެ.
އެމްޓީސީސީ ބުރުނު ޝިކާރު ޗެލެންޖްގެ އަންހެން ޑިވިޝަނުގެ ހީޓެއްގެ ތެރެއިން.-- ފޮޓޯ: އެމްބީބީއޭ/ ހޫޕާ
ހީޓްތައް ކުރިއަށްދިޔަ ގޮތަށް ބަލާއިރު އެންމެ ފޯރިގަދަކޮށް ދިޔައީ މެންސް އޯޕަން ޑިވިޝަންގެ ފުރަތަމަ ރައުންޑުގެ ތިން ވަނަ ހީޓާއި ހަތަރު ވަނަ ހީޓެވެ. ތިން ވަނަ ހީޓުގައި ވާދަވެރިކޮށް ގޮސް، އަބްދުﷲ ޝިމާލް ޝަމީމް އެއް ވަނަ ހޯދީ 9.53 ޕޮއިންޓުންނެވެ. ދެ ވަނަ އަށް ދިޔައީ، ބައިނަލްއަގުވާމީ މުބާރާތްތަކުގައި ވެސް ވަރުގަދަ ބޮޑީބޯޑަރެއްގެ ގޮތުގައި ފެނުނު އަލީ ޝާމް ރާފިއު 6.06 ޕޮއިންޓް ހޯދިއިރު، ތިން ވަނަ އަށް ދިޔަ މި ވަގުތު ރާއްޖޭގެ ރޭންކިންގެ ދެ ވަނައިގައި އޮތް، އަސްވާން މުހައްމަދު ވަނީ 5.66 ޕޮއިންޓް ސްކޯކޮށްފަ އެވެ. މި ހީޓުގައި ދެން ހިމެނުނު އިބްރާހިމް ޝިމާންގެ ސްކޯރިން އެއް ނުހިމަނަ އެވެ.
ހަތަރު ވަނަ ހީޓަށް ބަލާއިރު، 11.00 ޕޮއިންޓް ސްކޯކޮށްގެން އެއް ވަނަ އަށް ދިޔަ މުހައްމަދު ރީޝާން އަކީ މިދިޔަ އަހަރުތަކަށް ބަލާއިރު، ކާމިޔާބު ބޮޑީބޯޑަރެކެވެ. ދެ ވަނަ އަށް ދިޔައީ ގައުމީ ޓީމުގައި ހިމެނޭ އަހުމަދު ނަޒްމީން އެވެ. އޭނާ ވަނީ 9.33 ޕޮއިންޓް ސްކޯކޮށްފަ އެވެ. ތިން ވަނަ އަށް ދިޔަ ދާއޫދު ފަޒީހް ވަނީ 7.66 ޕޮއިންޓް ސްކޯކޮށްފަ އެވެ. މީގެ އިތުރުން މިދިޔަ އަހަރުތަކުގައި ރަނގަޅު ވާދައެއް ކުރި އިނާޝް ނައީމް މި ހީޓުގެ ހަތަރަކަށް ދިޔައިރު، އޭނާގެ ސްކޯރިން އަކީ 5.10 ޕޮއިންޓެވެ.
ރާއްޖޭގެ އެއް ވަނަ ބޮޑީބޯޑަރު އަލީ ހުޝްރުވާން (ކުޑައައްޔަ) ވަނީ 11.63 ޕޮއިންޓް ސްކޯކޮށް، އޭނާ ވާދަކުރި، ފުރަތަމަ ރައުންޑުގެ ހީޓް ފަހެއްގެ އެއް ވަނަ ހޯދައި އަނެއް ބުރަށް ދަތުރުކޮށްފަ އެވެ. މި ހީޓުގެ ދެ ވަނަ އަށް ދިޔަ މުހައްމަދު ނިފާޒް ވަނީ 5.94 ޕޮއިންޓް ސްކޯކޮށްފަ އެވެ. އަދި ތިން ވަނަ އަށް ދިޔަ ރިޒްވާން އަހުމަދު މުހައްމަދުގެ ސްކޯ އުޅެނީ 2.27 ޕޮއިންޓުގަ އެވެ.
އިއްޔެގެ ހީޓެއްގެ ތެރެއިން ކުޑަ އައްޔަ ރާޅާއަޅަނީ.-- ފޮޓޯ: އެމްބީބީއޭ/ ހޫޕާ
މި މުބާރާތަކީ މި ފަހަރު މޯލްޑިވްސް ބޮޑީބޯޑިން އެސޯސިއޭޝަނުން މުޅިން އަލަށް ފެށި ގައުމީ ލީގުގެ ފުރަތަމަ މުބާރާތެވެ. މި މުބާރާތާއި އަންނަ މެއި މަހު ފަށާ ލަބޭރާ ބޮޑީބޯޑިން ޗެލެންޖް ނިމުމުން ގައުމީ ބޮޑީބޯޑިން ޓީމެއް އެކުލަވާލާނެ އެވެ. އެއީ މި ދެ މުބާރާތުގެ ސްކޯރިން އަށް ބަލައިފަ އެވެ.
މީގެ އިތުުރުން މި ދެ މުބާރާތަށް ބަލާފައި ގައުމީ ޖޫނިއާ ސްކޮޑެއް ވެސް ނަގާނެ އެވެ. އެއީ މުސްތަގުބަލަށް ރަނގަޅު ގައުމީ ޓީމެއް އެކުލަވާލުމަށްޓަކައި ކުރެވޭ މަސައްކަތެކެވެ.
އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖްގައި މިއަދު ހަތެއް ޖަހާއިރު ފަށާފައިވާއިރު، ފުރަތަމަ އޮތީ މެންސްގެ ރައުންޑް ޓޫ ރިކޮލިފައިންގެ ހަތަރު ވަނަ ހީޓެވެ. އޭގެ ފަހުން ޖޫނިއާ މެންސްގެ ހީޓްތަކާއި މެންސް އޯޕަންގެ އިތުރު ހީޓްތަކާ އެކު ފޯރިގަދަ އަދި ވާދަވެރި ހީޓްތަކެއް އެކި ޑިވިޝަންތަކުން ފެނިގެންދާނެ އެވެ.
