މިނިސްޓްރީ އޮފް އާޓްސް އެންޑް ކަލްޗާގެ ޑިރެކްޓަރު ޝަމްއޫން "ލޫކަސް" ޖަލީލާ ދިމާލަށް ހަޑިހުތުރު ބަހުން މުއާމަލާތްކޮށް ސޯޝަލް މީޑިއާ ޕްލެޓްފޯމް ޓުވިޓާގައި އޭނާގެ އެކައުންޓުން ލިޔުނީ އެހެން މީހަކު، އޭނާގެ އެކައުންޓުގެ ކޮންޓްރޯލް ވަގަށް ހޯދައިގެން ކަމަށް ރައީސް އޮފީހުގެ ޗީފް އޮފް ސްޓާފް އަލީ ޒާހިރު މިއަދު ވިދާޅުވެއްޖެ އެވެ.
އަލީ ޒާހިރު ވިދާޅުވީ، ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ޗެއާޕާސަންގެ އިންތިހާބާމެދު ޝަމްއޫން ފާޅު ކުރެއްވި ހިޔާލެއްގެ ރައްދުގައި، އޭނާގެ އެކައުންޓުން ހުތުރު އެއްޗެހި ކިޔާފައި ވަނީ މީހަކު އެއަށް "އެކްސެސްވެގެން" ކަމަށެވެ.
"އެހެން ކޮންމެވެސް ގޮތަކުން އެކްސެސްވެވިފަ އެއިނީ. އަޅުގަނޑަށް ވެސް ސީދާ ބުނާކަށް ނޭނގެ. ފަހުން އެކައުންޓް ރިކަވާ ވެސް ކުރެވުނު. އެއީ ޕާސްވޯޑު ރީސެޓްކުރަން ހަމަ އަޅުގަނޑަށް އައީ އީމެއިލްއަށް،" އަލީ ޒާހިރު ވިދާޅުވި އެވެ.
އެކައުންޓުން ކޮށްފައި ހުރި ޓުވީޓުތައް ޑިލީޓް ކުރުމަށްފަހު އަލީ ޒާހިރު ކުރެއްވި އިތުރު ޓުވީޓެއްގައި އިނގިރޭސި ބަހުން ވިދާޅުވެފައި އޮތީ"މިއީ ކުރިއަށް އޮތް އެމްޑީޕީގެ އެތެރޭގެ އިންތިހާބުގައި އަޅުގަނޑު ރޯލެއް އޮތްކަން ދެއްކުމުގެ ބޭނުމުގައި ކޮށްފައި އޮތް އަމަލެއް ކަމަށް ބެލެވޭ" ކަމަށެވެ.
އަލީ ޒާހިރުގެ ޓުވީޓުތަކުގެ ސްކްރީންޝޮޓް ނެގުމަށްފަހު އެމްޑީޕީއަށް ނިސްބަތްވާ ވަރަށް ގިނަ ބަޔަކު ދަނީ އޭނާއަށް ފާޑުކިޔަމުންނެވެ. އޭގެ ތެރޭގައި ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ އާއި އުނގޫފާރު ދާއިރާގެ މެމްބަރު މުހައްމަދު ވަހީދުގެ އިތުރުން ވެސް ބައެއް އެހެން މެމްބަރުން ހިމެނިވަޑައިގަންނަވަ އެވެ.
