މިއަދު ފަށާ ގޮތަށް ހަަމަޖެހިފައި އޮތް އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖް މި މަހު 23 ވަނަ ދުވަހު ފަށާ ގޮތަށް މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން ބަދަލުކޮށްފި އެވެ.
އެމްބީބީއޭ އިން ހަތް އަހަރަށް ފަހު ބުރުުނު ޝިކާރު ބޮޑީބޯޑިން ޗެލެންޖް އަލުން ބާއްވާއިރު، މި މުބާރާތަކީ މި އަހަރު އަލަށް ފަށާ ބޮޑީބޯޑިން ގައުމީ ލީގުގެ ފުރަތަމަ މުބާރާތެވެ.
އެމްބީބީއޭ އިން ބުނީ ރާޅު އެންމެ ރަނގަޅު ދުވަސްތަކަށް ބަލާފައި މުބާރާތް ފެށުމަށް ބޭނުންވާތީ މިހާރު އޮތްގޮތުން ބުރުނު ޝިކާރު މުބާރާތް ފަށާނީ އަންނަ ބުދަ ދުވަހު ކަމަށެވެ. މުބާރާތް ކުރިއަށްދާނީ ރާޅުގަނޑު ސަރަހައްދުގަ އެެވެ.
އެންމެ ފުރަތަމަ އެމްބީބީއޭ އިން 2013 ވަނަ އަހަރު ބުރުނު ޝިކާރު ބާއްވައި ދެން އައި ތިން އަހަރު ވެސް އެ މުބާރާތް ކުރިއަށްގެންދިޔަ އެވެ. އެކަމަކު، އޭގެ ފަހުން މިވީ ހަތް އަހަރު ފަހުން ފުރަތަމަ ފަހަރަށް ބާއްވާ މި މުބާރާތުގެ ފޯރި ފެންނަނީ ގަދަކޮށެވެ.
ބުރުނު ޝިކާރު ޗެލެންޖްގެ ވާދަވެރިކަން ބޮޑުވާނެ އެންމެ ބޮޑު އަނެއް ސަބަބަކީ މި މުބާރާތާއި މެއި މަހު ފަށާ ލަބޭރާ ބޮޑީބޯޑިން ޗެލެންޖް ނިމުމުން ގައުމީ ބޮޑީބޯޑިން ޓީމެއް އެކުލަވާލާނެ އެވެ. އެއީ އެ ދެ މުބާރާތުގެ ސްކޯރިން އަށް ބަލައިފަ އެވެ.
މި ވަގުތު އޮތީ 2019 އިން ފެށިގެން ވެސް އޮތް ގައުމީ ބޮޑީބޯޑިން ޓީމެވެ. އެހެންކަމުން، ބުރުނު ޝިކާރާއި ލަބޭރާ ބޮޑީބޯޑިން ޗެލެންޖަށް ފަހު ދެން ފެންނާނީ އާ ގައުމީ ބޮޑީބޯޑަރުންގެ ޓީމެވެ. އެ ގައުމީ ސްކޮޑު މި އަހަރުގެ ފަހު ބޮޑީބޯޑިން މުބާރާތާ ހަމައަށް އޮންނާނެ އެވެ. އޭގެ ފަހުން އަންނަ އަހަރަށް ބޮޑީބޯޑިން ގައުމީ ޓީމު ނަގާނީ މި އަހަރުގެ ގައުމީ ލީގުގެ ހަ އިވެންޓް ނިމުމުންނެވެ.
ބޮޑީބޯޑިންގެ ގައުމީ ޖޫނިއާ ސްކޮޑެއް ވެސް ގެންގުޅެން އެމްބީބީއޭ އިން ވަނީ ނިންމައިފަ އެވެ. އެ މަސައްކަތުގެ ފެށުމެއްގެ ގޮތުން ބުރުނު ޝިކާރާއި ލަބޭރާ ޗެލެންޖް ނިމުމުން ޖޫނިއާ ސްކޮޑެއް އެކުލަވާލައި، އެ ކުދިންނަށް ވެސް ފުރުސަތު ފަހިކޮށްދިނުމުގެ މަސައްކަތް ފަށާނެ އެވެ. އެ ސްކޮޑު އަންނަ އަހަރަށް ބަދަލުވާނީ މި އަހަރުގެ ބޮޑީބޯޑިން ލީގު ނިމުމުން ޖުމްލަ ސްކޯރިން އަށް ބަލައިފަ އެވެ.
މި އަހަރު ފުރަތަމަ ފަހަރަށް ބޮޑީބޯޑިން އިން ޑިޖިޓަލް ސްކޯރިން ސިސްޓަމެއް ބޭނުކުރާއިރު، ދާދި ފަހުން ވަނީ ބޮޑީބޯޑިންގެ ރަސްމީ ވެބްސައިޓް ވެސް ލޯންޗްކޮށްފަ އެވެ. ބޮޑީބޯޑިން އެސޯސިއޭޝަންގެ ޑިޖިޓަލް ޕާޓްނަރެއްގެ ގޮތުގައި ހަމަޖައްސާފައިވަނީ ދިރާގު އެވެ.
