ޔޫކްރެއިންގެ އިރުމަތީގައި އޮންނަ ޑޮންބާސް ސަރަހައްދުގައި ރަޝިއާއިން ކެމިކަލް ހަތިޔާރު ބޭނުންކޮށްފައިވާ ކަމަށް ޔޫކްރެއިނުން ތުހުމަތުކޮށްފި އެވެ.
އާއްމުން ގިނަ އަދަދަކަށް ދިރިއުޅޭ ހިސާބުތަކުގައި "ވައިޓް ފޮސްފޮރަސް" ކެމިކަލް ހިމެނޭ ހަތިޔާރު ބޭނުން ކުރުން ބައިނަލްއަގްވާމީ ގާނޫނުން މަނާކުރެ އެވެ.
ލުހާންސްކް ސިޓީއާ 100 ކިލޯމީޓަރު ހުޅަނގުން އޮންނަ ޕޮޕްސާނާ ފުލުހުންގެ ވެރިޔާ އޮލެކްސީ ބިލޮޝިޓްސްކީ ވިދާޅުވީ އެ ހިސާބުގައި ރަޝިއާގެ ފައުޖުން ކެމިކަލް ހަތިޔާރު ބޭނުންކުރި ކަމަށެވެ.
ޔޫކްރެއިން ސަރުކާރުން ރަސްމީކޮށް އެއްޗެއް ބުނެފައި ނުވާ އިރު، ރަޝިއާއިން ވެސް މިހާތަނަށް އެ ވާހަކަ ދޮގުކޮށްފައެއް ނުވެ އެވެ.
އޭގެ އިތުރުން ޔޫކްރެއިންގެ ދެކުނުގައި ހާހަކަށް ވުރެ ގިނަ މީހުން ރައްކާތެރިކަން ހޯދަން ވަދެ ތިބި ފައްޅިއަކަށް ވެސް ވަނީ ހަމަލާ ދީފަ އެވެ. އެ ހަމަލާގައި 30 މީހުންނަށް އަނިޔާވި އެވެ.
ޑޮންބާސް ނުވަތަ ލުހާންސްކް އާއި ޑޮނެސްކް ހިމެނޭ އިރުމަތީ ޔޫކްރެއިން ބައެއް ހިސާބުތައް 2014 ވަނަ އަހަރުން ފެށިގެން ކޮންޓްރޯލް ކުރަނީ ރަޝިއާއަށް ތާއީދު ކުރާ ގްރޫޕުތަކުންނެވެ.
ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށުމުން ކުރިން ލުހާންސްކް އާއި ޑޮނެސްކް މިނިވަން ދައުލަތްތަކެއްގެ ގޮތުގައި ބަލައިގަންނަން ރަޝިއާއިން ނިންމި އެވެ.
