މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ޗެއާޕާސަންގެ އިންތިހާބުގެ ކެމްޕޭނަށް އެ އިންތިހާބުގައި ވާދަކުރައްވާ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ގެ ޓީމުން އަންނަ ހަފްތާތެރޭ ހުވަދޫ އަތޮޅަށް ދަތުރުކުރަން ނިންމައިފި އެވެ.
އިމްތިޔާޒްގެ ކެމްޕޭން ޓީމުން ހުވަދޫ އަތޮޅަށް މިސްރާބު ޖަހާނެ ކަމަށް ވިދާޅުވަމުން އެ ކެމްޕޭނުގެ ތަރުޖަމާނު އަދި ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވީ ހުވަދޫ އަތޮޅަށް އެ ޓީމުން ކުރާ ދަތުރުގައި ވެސް އެހެން ދަތުރުތަކެކޭ އެއްގޮތަށް ވީހާ ވެސް ގިނަ ރަށްރަށަށް ދަތުރުކުރަން ހަމަޖެހިފައިވާ ކަމަށެވެ.
"އެ ދަތުރުތަކުގައި އަޅުގަނޑުމެން އެމްޑީޕީގެ މެމްބަރުންނާ ބައްދަލުކުރައްވައި ކެމްޕޭން ހަރަކާތްތައް ކުރިޔަށް ގެންދާނެ. މިވަގުތު ކެމްޕޭން ޓީމު އުޅެނީ ހއ އަދި ހދ. އަތޮޅުގަ. އެ އަތޮޅުގެ ވެސް ގިނަ ރަށްތަކަށް ދެވިއްޖެ މިހާރު،" ވަހީދު ވިދާޅުވި އެވެ.
އިމްތިޔާޒްގެ ޓީމުން މިވަގުތު ހއ. އަދި ހދ. އަތޮޅުގައި ކެމްޕޭން ކުރަމުންދާއިރު، އެ ދެ އަތޮޅުގެ ޖުމްލަ 12 ރަށަކަށް މިހާރު ދަތުރުކޮށްފައިވާ ކަމަށް ވަހީދު ވިދާޅުވި އެވެ. މިވަގުތު ކެމްޕޭން ޓީމު ދަނީ ހދ. ވައިކަރަދޫގައި ހަރަކާތްތެރިވަމުން ކަމަށް ވެސް އޭނާ ވިދާޅުވި އެވެ.
އެޓީމުން އަދި އެ އަތޮޅު ނެއްލައިދޫ، ކުޅުދުއްފުށި ސިޓީ، ކުރިނބީ އަދި ނޮޅިވަރަމަށް ދަތުރުކުރާނެ ކަމަށް ވަހީދު ވިދާޅުވި އެވެ.
ވަހީދު ވިދާޅުވީ އެ ރަށްރަށުގެ އެމްޑީޕީގެ މެމްބަރުންގެ ފަރާތުން ވެސް އެހެން ރަށްތަކެކޭ އެއްގޮތަށް އިމްތިޔާޒް ފަހުމީއަށް އޮތް ލޯތްބާއި ގަދަރު ސާފުކޮށް ފެނިގެންދާ ކަމަށެވެ.
"ހަމަ މީހުންގެ މޫނު މަތިން ފެނިގެންދޭ ލޯތްބާއި އިހްތިރާމް އިމްތިޔާޒް އަށް. ދެން އާދޭ ވަރަށް ކަންބޮޑުވުންތައް ވެސް. އެމްޑީޕީގެ ސަރުކާރެއް އޮވެ ކަންކަން ނުވާ ކަމުގެ. އަޅުގަނޑުމެން މިދަނީ އިމްތިޔާޒް ޗެއާޕާސަންކަމަށް ހޮވިއްޖެނަމަ، ރައްޔިތުންގެ ހުރި ކަންބޮޑުވުންތަކަށް އެޑްރެސްކޮށް، އެކަންކަން ހައްލުކުރާނެ ގޮތުގެ ސިޔާސަތުތަކެއް ވަރަށް އަވަހަށް ނެރެން ތައްޔާރުވަމުން،" ވަހީދު ވިދާޅުވި އެވެ.
ވަހީދު އިތުރަށް ވިދާޅުވީ ވަގުތުގެ ދަތިކަމާ ހެދި ރާއްޖޭގެ ހުރިހާ ރަށަކަށް ދަތުރު ނުކުރެވުނު ނަމަވެސް، އިމްތިޔާޒްގެ ޓީމުން ގައިމު ވެސް ހުރިހާ އަތޮޅަކަށް ދަތުރުކުރާނެ ކަމަށެވެ. އަދި ނުދެވޭ ރަށްތަކުގައި މެމްބަރުންނާ ޒޫމް ފަދަ ވަސީލަތްތައް މެދުވެރިކޮށްގެން ވެސް ބައްދަލުކުރާނެ ކަމަށް އޭނާ ވިދާޅުވި އެވެ.
"މަޖިލިސްގެ މަސައްކަތްތައް ވެސް އޮންނާތީވެ، ދަތުރުކުރުމުގައި ޝެޑިއުލް ވަރަށް ޓައިޓްކޮށް އޮތީ. އެކަމަކު އިރާދަކުރެއްވިއްޔާ ހުރިހާ އަތޮޅަކަށް ދާނެ. ދެން ނުދެވޭ ރަށްތަކުގެ މެމްބަރުންނާ ޒޫމްއިން ކަހަލަ ގޮތަކަށް ވެސް ބައްދަލުކުރާނެ،" ވަހީދު ވިދާޅުވި އެވެ.
