މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން ހަތް އަހަރަށް ފަހު އަލުން ބުރުނު ޝިކާރު ބޮޑީބޯޑިން ޗެލެންޖް ބާއްވަން ނިންމައި، ބައިވެރިވުމުގެ ފުރުސަތު ހުޅުވާލައިފި އެވެ.
އެމްބީބީއޭގެ ހަރަކާތްތައް ރަސްމީ ސިފައެއް ޖެހިގެން ފެށުނުއިރު، އެންމެ ފުރަތަަމަ ބޭއްވި އެއް މުބާރާތަކީ ބުރުނު ޝިކާރު ބޮޑީބޯޑިން ޗެލެންޖް އެވެ. އެ ގޮތުން 2013 ވަނަ އަހަރު ފަށައި، އޭގެ ތިން މުބާރާތް ޖެހިޖެެހިގެން ތިން އަހަރު ބޭއްވި އެވެ. އެކަމަކު، ފަހުން އެކި ސަބަބުތަކާ ހުރެ އެ މުބާރާތް އޮތީ ހުއްޓިފަ އެވެ.
މި އަހަރު އެ މުބާރާތް އަލުން އެ ބާއްވަނީ ހަތް އަހަރުގެ މެދުކެނޑުމަކަށް ފަހު އެވެ. މި ފަހަރުގެ މުބާރާތަކީ އެމްޓީސީސީ ބުރުނު ޝިކާރު ޗެލެންޖް 2022 އެވެ. އަލުން ފަށާއިރު، މުބާރާތް އޮތީ ތާރީހީ ކަމަކާ ވެސް ގުޅިފަ އެވެ. އެ މުބާރާތަކީ ރާއްޖޭގައި މުޅިން އަލަށް މި ފަހަރު ފަށާ، ގައުމީ ބޮޑީބޯޑިން ލީގުގެ ފުރަތަމަ މުބާރާތެވެ. އެހެންކަމުން، މިއީ ކޮންމެ ގޮތެއް ވިޔަސް ތާރީހީ މުބާރާތަކަށް ވާނެ އެވެ.
ރާޅުގަނޑު ސަރަހައްދުގައި މި މަހުގެ 20-30 އަށް ބާއްވަން ޝެޑިއުލްކޮށްފައިވާ މި މުބާރާތުގައި ބައިވެރިވުމުގެ ފުރުސަތު އެމްބީބީއޭ އިން އޮތީ މި މަހު 13 ވަނަ ދުވަހާ ހަމައަށް ހުޅުވާލައިފަ އެވެ. މެންސް އޯޕަންސް އާއި ޖޫނިއާ ޑިވިޝަންގައި ވާދަކުރެވޭނެ އެެވެ.
މި އަހަރުގެ ކަލަންޑަރުގައި ބޮޑީބޯޑިން ލީގެއްގެ ގޮތުގައި ޖުމްލަ ހަ އިވެންޓެއް ވަނީ ހިމަނައިފަ އެވެ. އެއީ މި މަހު 20-30 އަށް އޮތް ބުރުނު ޝިކާރު ބޮޑީބޯޑިން ޗެލެންޖް، މެއި 26 އިން ޖޫން 4 އަށް އޮތް ލަބޭރާ ބޮޑީބޯޑިން ޗެލެންޖް، ޖުލައި 14-23 އަށް ބާއްވާ ގައުމީ ބަނޑުފިލާ ޗެލެންޖް، ސެޕްޓެމްބަރު 10 ގައި އޮންނަ ސުލްޓާން އޮފް ތަނބުރުދޫ، އޮކްޓޫބަރު 6-15 އަށް ބާއްވާ އަދަހުކުރު ގޮންޖެހުން އަދި އޮކްޓޫބަރު 6-15 އަށް ބާއްވާ މުލަ ބޮޑީބޯޑިން ޗެލެންޖް އެވެ.
މި އިވެންޓްތައް ރޭވިފައިވާ ގޮތަށް ބަލާއިރު، ފަސް މުބާރާތް އޮންނާނީ މާލޭ ރާޅުގަނޑު ސަރަހައްދުގަ އެވެ. އަދި އެއް އިވެންޓް، ކ.ތަނބުރުދޫގައި ކުރިއަށްދާނެ އެވެ.
އެމްބީބީއޭ އިން ބޭއްވި އިވެންޓެއްގެ ތެރެއިން ބޮޑީބޯޑަރުން އިވެންޓެއް ނިންމުމަށް ފަހު ބޭއްވި އުފާފާޅުކުރުމެއްގެ ތެރެއިން.-- ފޮޓޯ: އެމްބީބީއޭ/ ލިކުއިފައި މޯލްޑިވްސް
އެމްބީބީއޭ އިން މައުލޫމާތު ދޭ ގޮތުގައި ރާއްޖޭގެ އެކި ކަންކޮޅުތަކުގައި އިވެންޓައް ބޭއްވުމުގެ ހުށަހެޅުންތައް ލިބެމުންދާތީ ކުރިއަށް އޮތްތަނުގައި ރަށްރަށުގައި ބާއްވާ އިވެންޓްތައް އިތުރުވުމުގެ ފުރުސަތު އެބައޮތެވެ.
ބޮޑީބޯޑިންގެ ފޯރި އިތުރަށް ވަރުގަދަކޮށްލުުމުގެ ބޭނުމުގައި ފަށާ ގައުމީ ލީގުގައި ކުރިއަށްދާ އުސޫލަށް ބަލާއިރު، ކޮންމެ ލީގުގައި ހިމެނޭ ކޮންމެ އިވެންޓަކުން ނޫނީ މުބާރާތަކުން ޕޮއިންޓް ލިބޭނެ އެވެ. ޖުމްލަ ރޭންކިން ކަނޑައެޅޭނީ ހަ މުބާރާތް ނިމުމުންނެވެ. އަހަރު ނިމޭއިރު ރޭންކިންގެ އެންމެ ކުރީގައި އުޅޭނީ އަހަރުގެ އެއް ވަނަ ބޮޑީބޯޑަރެވެ. އަދި ރޭންކިންގެ ގަދަ ހަތަރެއްގައި އޮންނަ ބޮޑީބޯޑަރުން ވާނީ ޖެހިގެން އަންނަ އަހަރުގެ ގައުމީ ބޮޑީބޯޑިން ޓީމަށެވެ.
ގައުމީ ބޮޑީބޯޑިން ލީގު ހާއްސަވަނީ ހަމައެކަނި ސީނިއާ ކެޓަގަރީ އަކަށް ނޫނެވެ. ޖޫނިއާ ކެޓަގަރީން ވެސް އެންމެ ކުރިން ނިންމާ ހަތަރު ބޮޑީބޯޑަރުން ނަގައި، ޖޫނިއާ ޓީމެއް ނަގާ ގޮތަށް ވެސް ބޮޑީބޯޑިން އެސޯސިއޭޝަނުން ވަނީ ނިންމައިފަ އެވެ. ބޮޑީބޯޑަރުންނާއި އެމްބީބީއޭ އަށް އެހީތެރިވެދޭ ފަރާތްތަކުގެ އަގުވަޒަންކުރުމަށް އަހަރު ފަހުކޮޅުގައި އެސޯސިއޭޝަންގެ ހާއްސަ އިވެންޓެއް ބާއްވަން ވެސް އަންނަނީ މަސައްކަތް ކުރަމުންނެވެ.
