މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން އެ ޖަމިއްޔާގެ އަހަރީ ކަލަންޑަރު ސީޒަނެއްގެ ކުލަޖައްސައި، ފުރަތަމަ ފަހަރަށް ގައުމީ ބޮޑީބޯޑިން ލީގެއް ފަށަން ނިންމައިފި އެވެ.
މި އަހަރުގެ ކަލަންޑަރުގައި ބޮޑީބޯޑިން ލީގެއްގެ ގޮތުގައި ޖުމްލަ ހަ އިވެންޓެއް ވަނީ ހިމަނައިފަ އެވެ. އެއީ މާޗް 20-30 އަށް އޮތް ބުރުނު ޝިކާރު ބޮޑީބޯޑިން ޗެލެންޖް، މެއި 26 އިން ޖޫން 4 އަށް އޮތް ލަބޭރާ ބޮޑީބޯޑިން ޗެލެންޖް، ޖުލައި 14-23 އަށް ބާއްވާ ގައުމީ ބަނޑުފިލާ ޗެލެންޖް، ސެޕްޓެމްބަރު 10 ގައި އޮންނަ ސުލްޓާން އޮފް ތަނބުރުދޫ، އޮކްޓޫބަރު 6-15 އަށް ބާއްވާ އަދަހުކުރު ގޮންޖެހުން އަދި އޮކްޓޫބަރު 6-15 އަށް ބާއްވާ މުލަ ބޮޑީބޯޑިން ޗެލެންޖް އެވެ.
މި އިވެންޓްތައް ރޭވިފައިވާ ގޮތަށް ބަލާއިރު، ފަސް މުބާރާތް އޮންނާނީ މާލޭ ރާޅުގަނޑު ސަރަހައްދުގަ އެވެ. އަދި އެއް އިވެންޓް، ކ.ތަނބުރުދޫގައި ކުރިއަށްދާނެ އެވެ. ބޮޑީބޯޑިންގެ ފޯރި އިތުރަށް ވަރުގަދަކޮށްލުުމުގެ ބޭނުމުގައި ފަށާ ގައުމީ ލީގުގައި ކުރިއަށްދާ އުސޫލަށް ބަލާއިރު، ކޮންމެ ލީގުގައި ހިމެނޭ ކޮންމެ އިވެންޓަކުން ނޫނީ މުބާރާތަކުން ޕޮއިންޓް ލިބޭނެ އެވެ. ޖުމްލަ ރޭންކިން ކަނޑައެޅޭނީ ހަ މުބާރާތް ނިމުމުންނެވެ.
ރާއްޖޭގެ މަޝްހޫރު ބޮޑީބޯޑަރު ޖާއްޓެ ރާޅުތެރޭގައި.-- ފޮޓޯ: އެމްބީބީއޭ/ ލިކުއިފައި މޯލްޑިވްސް
އަހަރު ނިމޭއިރު ރޭންކިންގެ އެންމެ ކުރީގައި އުޅޭނީ އަހަރުގެ އެއް ވަނަ ބޮޑީބޯޑަރެވެ. އަދި ރޭންކިންގެ ގަދަ ހަތަރެއްގައި އޮންނަ ބޮޑީބޯޑަރުންވާނީ ޖެހިގެން އަންނަ އަހަރުގެ ގައުމީ ބޮޑީބޯޑިން ޓީމަށެވެ. ގައުމީ ބޮޑީބޯޑިން ލީގު ހާއްސަވަނީ ހަމައެކަނި ސީނިއާ ކެޓަގަރީ އަކަށް ނޫނެވެ. ޖޫނިއާ ކެޓަގަރީން ވެސް އެންމެ ކުރިން ނިންމާ ހަތަރު ބޮޑީބޯޑަރުން ނަގައި، ޖޫނިއާ ޓީމެއް ނަގާ ގޮތަށް ވެސް ބޮޑީބޯޑިން އެސޯސިއޭޝަނުން ވަނީ ނިންމައިފަ އެވެ.
މިހާރު އޮތްގޮތުން ގައުމީ ބޮޑީބޯޑިން ލީގުގެ ފުރަތަމަ އިވެންޓް، އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖް އޮންނާނީ އަންނަ މަހުގެ 20-30 އަށެވެ. ގައުމީ ބޮޑީބޯޑިން ލީގުގެ އިވެންޓްތައް ހަމަޖައްސާފައިވަނީ ރޭޓިންއާ އެކުގަ އެވެ. އެ ގޮތުން ރޭޓިން ދީފައިވަނީ ދެ ތަރި، ތިން ތަރި އަދި ހަތަރު ތަރި ހިމެނޭ ގޮތަށެވެ. ރަނގަޅު ރޭޓިންގެ މުބާރާތްތައް ބޮޑުވާނެ އެވެ.
އެމްބީބީއޭ އިން އެންމެ ފުރަތަމަ ގައުމީ ލީގު ފަށާއިރު، މާލޭގައި ގިނަ އިވެންޓްތައް ބާއްވާ ގޮތަށް ހިމަނާފައިވީ ނަމަވެސް މުސްތަގުބަލުގައި އަތޮޅު ތެރޭގެ އެކި ހިސާބުތަކުގައި ގައުމީ ލީގުގެ އެކި އިވެންޓްތައް ހޯސްޓް ކުރުމުގެ ވިސްނުމެއް އެބައޮތެވެ.
