އަންނަ މޭ މަހުން ފެށިގެން ތައުލީމީ ދާއިރާގެ މުވައްޒަފުންގެ މުސާރަ ބޮޑުކުރަން ނިންމުމާ އެކީ ތައުލީމީ ނިޒާމުގެ މުސްތަގުބަލާ މެދު އުއްމީދު އާވެގެން ގޮސްފި ކަމަށް ޓީޗަރުންގެ ޖަމިއްޔާއިން ބުނެފި އެވެ.
ޓީޗަރުންގެ މުސާރަ ބޮޑު ކުރުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދުފުޅެކެވެ.
އެ ވައުދުފުޅާ އެއްގޮތަށް ތައުލީމީ ދާއިރާގެ ހުރިހާ މުވައްޒަފުންގެ މުސާރަތައް ބޮޑުކުރައްވާނެ ކަން ރައީސް އިއުލާނުކުރެއްވީ، މިއަހަރަށް ރައްޔިތުންގެ މަޖިލިސް ހުޅުވުމަށް މިއަދު ރިޔާސީ ބަޔާން އިއްވަވަމުންނެވެ.
މި ބަދަލާއެކީ ޓީޗަރުންގެ މުސާރަތައް 56 ޕަސެންޓު ބޮޑުވާނެ އެވެ. އަދި ގްރެޖުއޭޓް ލެވެލްގެ ސެކަންޑްރީ ޓީޗަރަކަށް އިތުރުގަޑިއާ ނުލައި ހަމަ އެކަނި މުސާރައަށް 19،740ރ. ލިބޭނެ އެވެ.
މިކަމަށް މަރުހަބާ ކިޔަމުން ޓީޗަރުންގެ ޖަމިއްޔާއިން ކުރި ޓްވީޓެއްގައި ބުނި ގޮތުގައި މިއީ ގިނަ ދުވަސްތަކެއް ވަންދެން ޓީޗަރުން އިންތިޒާރުކުރަމުން އައި ބަދަލެކެވެ. އަދި، މި ބަދަލަކީ މިހާރަށް ވުރެ އިލްމީ ގައުމެއް ބިނާކުރުމަށް އެޅި އިތުރު ފިޔަވަޅެއް ކަމަށް އެ ޖަމިއްޔާއިން ބުންޏެވެ.
މިގޮތަށް ހުރިހާ ދާއިރާއަކަށް މުސާރަތައް ބޮޑުކުރަން ޖެހޭ ކަމަށް ދޭހަވާ މޭރުމަކުން، އެ ޖަމިއްޔާއިން އިތުރަށް ބުނީ ގައުމެއް ތަނަވަސްވެދަނީ ހުރިހާ މަސައްކަތްތެރިންނަށް އެއް އުސޫލަކުން ހަމަހަމަކަމާއެކީ އަމަލުކުރެވި، އަބުރުވެރި ދިރިއުޅުމެއް އުޅެވޭ ވަރުގެ އާމްދަނީއެއް ލިބިގެން ކަމަށެެވެ.
ތައުލީމީ ދާއިރާގެ މުވައްޒަފުންގެ މުސާރަތައް ބޮޑުވާނެކަން އިއުލާނުކުރި ނަމަވެސް އަދި ހުރިހާ ގިންތިއެއްގެ މުވައްޒަފުންގެ މުސާރައަށް އަންނާނެ ބަދަލުތައް ސާފެއް ނޫނެވެ.
އެކަމަކު އެޑިޔުކޭޝަން މިނިސްޓްރީ އާއި ރައީސް އޮފީސް ގުޅިގެން މި އޮނިގަނޑު ތައްޔާރުކޮށް ނިންމިތާ އަހަރަކަށް ވުރެ ގިނަ ދުވަސް ވެއްޖެ އެވެ. އަދި، މި އަހަރު ތަންފީޒުކުރަން ފަށާ މުސާރަތައް އެއްހަމަކުރުމުގެ (ޕޭ ހާމަނައިޒޭޝަން) ސިޔާސަތުގެ ދަށުން މިކަމަށް ބޭނުންވާ ފައިސާ ވަނީ ބަޖެޓުކުރެވިފަ އެވެ.
އެކަށީގެންވާ މުސާރައެއް ނުލިބުމަކީ ޓީޗަރުންގެ ގިނަ ދުވަސްތަކެއްގެ ކަންބޮޑުވުމެކެވެ. އަދި އެކި ސަރުކާރުތަކުން މިކަން ހައްލުކުރަން އެކިވަރުގެ މަސައްކަތްތަކެއް ކުރި ނަމަވެސް މިހާތަނަށް އެދެވޭ ވަރުގެ ހައްލެއް ނުލިބެ އެވެ.
