ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހު ކޮވިޑް-19 އަށް މިއަދު ޕޮޒިޓިވް ވެއްޖެ އެވެ.
އެކަން ހާމަ ކުރައްވާ ސޯޝަލް މީޑިއާ ޕްލެޓްފޯމް ޓުވިޓާގައި ރައީސް ސޯލިހު ލިޔުއްވީ ބަލިޖެހިވަޑައިގެންފައި ހުންނެވިކަން އެނގިވަޑައިގެންނެވީ މިއަދު އަތޮޅުތެރެއަށް ދަތުރު ކުރެއްވުމަށް ޕީސީއާރް ޓެސްޓެއް ހެއްދެވުމުން ކަމަށެވެ. އެމަނިކުފާނުގެ ހާލުކޮޅު ރަނގަޅު ކަމަށް ވެސް ރައީސް ލިޔުއްވި އެވެ.
"އަޅުގަނޑު ކޮވިޑް 19 އަށް ޕޮޒިޓިވްވެއްޖެ. އެކަން އެނގުނީ އަތޮޅުތެރެއަށް ދަތުރުކުރުމަށް ރޭގަ ޕީސީއާރް ހެދުމުން. މާތް ﷲގެ ރަހްމަތްފުޅުން ހާލު ރަނގަޅު. މިވަގުތު މިހުރީ ގޭގައި އެކަހެރިވެގެން،" ރައީސް ވިދާޅުވެފައިވެ އެވެ.
މީގެ ކުރިން ރައީސް ސޯލިހަށް ކޮވިޑް ޖެހިވަޑައިގެންފައެއްނުވެ އެވެ. ނަމަވެސް އެމަނިކުފާނުގެ އަނބިކަނބަލުން ފަޒްނާ އަހުމަދު މީގެ ކުރިން ވަނީ އެ ބައްޔަށް ޕޮޒިޓިވްވެފަ އެވެ.
ރައީސް ކޮވިޑަށް ޕޮޒިޓިވް ވެފައި މި ވަނީ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަންގައި ވާދަކުރައްވާ އެމްޑީޕީގެ ކެންޑިޑޭޓް، މުހައްމަދު ރާޝިދުގެ ކެމްޕޭނަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދާ އެކު މިއަދު ފޯކައިދުއަށް ވަޑައިގަތުމަށް ހަމަޖެހިފައި އޮއްވަ އެވެ.
ރާޝިދުގެ ކެމްޕެއިން ފައްޓަވައި ދެއްވުމަށް ވެސް ރައީސް ސޯލިހު ކޮމަންޑޫ އަށް ވަޑައިގަތެވެ. އެއަށް ފަހު ނައިބު ރައީސް ފައިސަލް ނަސީމް އާއި ފޮރިން މިނިސްޓަރު އަދި އދ. އާންމު މަޖިލީހުގެ ރައީސް އަބްދުﷲ ޝާހިދު ވެސް އެ ދާއިރާގެ ރަށްތަކަށް ވަޑައިގެންނެވި އެވެ.
