ކްލަބް ގްރީން ސްޓްރީޓްސް އިން މި ފަހަރުގެ ޕްރެޒިޑެންޓްސް ކަޕަށް ނުކުތް އެއް ޓާގެޓް ކާމިޔާބުވެފައިވާ ކަމަށާއި މިހާރު ބޭނުންވަނީ ކޮންމެ ގޮތެއް ހަދާފައިވިޔަސް މުބާރާތުގެ ފައިނަލަށް ދިއުމަށް ކަމަށް އެ ޓީމުގެ ކޯޗު އަލީ ނިސްތާރު މުހައްމަދު ބުނެފި އެވެ.
ފައިނަލުގެ ޖާގަ ހޯދަން ގްރީން ސްޓްރީޓްސް އިން މިއަދު ހަވީރު ކުޅޭ މެޗުގައި ބައްދަލުކުރާނީ ކްލަބް އީގަލްސްއާ ދެކޮޅަށެވެ. އެ މެޗުން ބަލިނުވެ، ފަރުޖައްސާލައިފިނަމަ، ރާއްޖޭގެ އެންމެ ޝަރަފްވެރި ފުޓްބޯޅަ މުބާރާތުގައި ގްރީން ސްޓްރީޓްސް އިން ކުޅޭ ފުރަތަމަ ފަހަރު ވެސް ފައިނަލުން ފުރުސަތު ލިބޭނެ އެވެ.
"އިންޝާﷲ. އަޅުގަނޑުމެންނަށް ވެވުނު އެންމެ ރަނގަޅަށް ތައްޔާރުވާނަން. ކޮންމެވެސް ވަރަކަށް އެބަ އުޅޭ އަނިޔާގެ މައްސަލަ އާއި ސަސްޕެންޝަނެއް ވެސް އެބައިން ކީ ޕްލޭޔަރެއްގެ،" އީގަލްސް މެޗުގެ ކުރިން ބޭއްވި ޕްރެކްޓިހެއްގެ ތެރެއިން ނިސްތާރު ބުންޏެވެ.
ނިސްތާރު ބުނީ މި ފަހަރު ޕްރެޒިޑެންޓްސް ކަޕަށް ކަނޑައެޅި އެއް ޓާގެޓް ހާސިލްވެފައިވާ ކަމަށާއި އެއް ޓާގެޓަށް ދެވުމުން ދެން ދާން ބޭނުންވާ ހިސާބެއް ކުރިއަށް ވުރެ ބޮޑުކޮށް ވިސްނާފައިވާ ކަމަށެވެ.
"އެހެންވެ، މިހާރު ޓާގެޓަކީ ފައިނަލް. ތި ވިދާޅުވިހެން މިއީ (ކްލަބްގެ) މާކެޓިން އާއި ހުރިހާ ކަމަކަށް ބަލާއިރު މިއީ ވަރަށް މުހިންމު މެޗެއް. އެހެންވެ، ހުރިހާ ކުޅުންތެރިން ވެސް ކޯޗިން ޓީމު ވެސް މެނޭޖްމަންޓުން ވެސް ވަރަށް މޯޓިވޭޓްވެފައި މިތިބީ،" ނިސްތާރު ބުންޏެވެ.
އީގަލްސް އަކީ ކުރިން ނިސްތާރު ވެސް މަސައްކަތްކޮށްފައިވާ ކްލަބެކެވެ. އީގަލްސްގައި މިހާރު ހުރި ކޯޗު މުހައްމަދު ޝާޒްލީ (ޝާޒް)ގެ އެސިސްޓަންޓް ކޯޗެއްގެ ގޮތުގައި ވެސް ނިސްތާރު ވަނީ މަސައްކަތް ކޮށްފަ އެވެ.
ފުރަތަމަ ޑިވިޝަނުގައި ހެޑް ކޯޗެއްގެ ގޮތުގައި ނިސްތާރު، އއ. މާޅޮހާއި ށ. ފޯކައިދޫ ޓީމަށް ކޯޗުކޮށްދިންއިރު، ވަނީ އީގަލްސްއާ ދެކޮޅަށް ކުޅެފަ އެވެ. އަދި ގްރީން ސްޓްރީޓްސްއާ ހަވާލުވެ، ނިސްތާރު ވަނީ އީގަލްސް އަތުން މީގެ ކުރިން މޮޅު ވެސް ވެފަ އެވެ.
"އީގަލްސް އަކީ ވަރަށް އުނދަގޫ ޓީމެއް. އަޅުގަނޑުމެންނަށް ވެސް ފަސޭހައެއް ނުވާނެ. އަޅުގަނޑުމެންނަށް ދެވެން އޮތް މެކްސިމަމް އެއް ދޭނެ. ދެން އައިޑިއާ އަކީ ނަތީޖާއެއްނެރެ އިންޝާﷲ ފައިނަލަށް ދިއުން،" ނިސްތާރު ބުންޏެވެ.
ގްރީން ސްޓްރީޓްސް މި ވަގުތު އޮތީ ޕްރެޒިޑެންޓްސް ކަޕްގެ ލީގު ބުރުގެ ދެ ވަނައިގަ އެވެ. ލީގު ބުރުގެ ފަހު މެޗުތަކާ މިއަދު ކުރިމަތިލާއިރު، ވެލެންސިއާ އެއް ވަނައިގައި އޮތީ 16 ޕޮއިންޓާ އެކު އެވެ. ދެ ވަނައިގައި އޮތް ގްރީން ސްޓްރީޓްސް އާއި ތިން ވަނައިގައި އޮތް މާޒިޔާ އަށް ވަނީ 15 ޕޮއިންޓް ލިބިފަ އެވެ.
ގްރީން ސްޓްރީޓްސް އަށް އީގަލްސް އަތުން ޕޮއިންޓެއް ހޯދައިގެން ފައިނަލަށް ދެވޭ ގޮތަށް އޮތްއިރު، ބަލިވެއްޖެނަމަ ގްރީން ސްޓްރީޓްސް އަށް ޖެހޭނީ ވެލެންސިއާ އާއި މާޒިޔާ މެޗުގެ ނަތީޖާ އަށް އިންތިޒާރު ކުރާށެވެ.
މިހާތަނަށް މި ފަހަރުގެ ޕްރެޒިޑެންޓްސް ކަޕްގައި ގްރީން ސްޓްރީޓްސް ކުޅުނު ހަ މެޗުގެ ތެރެއިން ބަލިވީ ވެލެންސިއާ އަތުން އެކަންޏެވެ. ކުޅެވުނު ހުރިހާ މެޗުތަކުގެ ތަޖުރިބާ އަށް ބަލައި، ނިސްތާރު ބުނީ މިއަދުގެ މެޗަށް ނުކުންނައިރު ވިސްނަން ޖެހޭ ކަންތައްތަކެއް އެބަހުރި ކަމަށެވެ.
"އެންމެ މުހިންމު އެއްޗަކީ ޓެކްޓިކަލް ޑިސިޕްލިން. ދެން، އެންމެންގެ މި އިންނަ ގުޅުން. އޭތި، އިންޝާﷲ ރަނގަޅަށް ބޭންދިއްޖިއްޔާ އިރާދަކުރެއްވިއްޔާ އަޅުގަނޑުމެންނަށް ފައިނަލް ކުޅެވޭނެ،" ކޯޗިން ކެރިއަރުގެ މުހިންމު މެޗެއްގެ ކުރިން ނިސްތާރު ފަހު ބަހަކަށް ބުންޏެވެ.
އަންނަ އާދިއްތަ ދުވަހު ޕްރެޒިޑެންޓްސް ކަޕް ފައިނަލް ކުޅޭނީ ރ. އަލިފުށީ ޓާފް ދަނޑުގަ އެވެ. ގްރީން ސްޓްރީޓްސް އާއި އީގަލްސް ކުޅޭ މެޗު ފަށާނީ މިއަދު ހަވީރު ހަތަރެއް ޖަހާއިރު އެވެ. އަދި މިރޭ ވެލެންސިއާ އާއި މާޒިޔާ ބައްދަލުކުރާނެ އެވެ.
