ޕްރެޒިޑެންޓްސް ކަޕް ފުޓްބޯޅަ މުބާރާތުގައި މާދަމާގެ މެޗަށް ނުކުންނައިރު، ޕްރެޝަރު އޮތީ މާޒިޔާ ސްޕޯޓްސް އެންޑް ރެކްރިއޭޝަނަށް ކަމަށް އެ ޓީމާ ދެކޮޅަށް ކުޅޭ ކްލަބް ގްރީން ސްޓްރީޓްސްގެ ކޯޗު އަލީ ނިސްތާރު މުހައްމަދު ބުނެފި އެވެ.
މި ފަހަރުގެ ޕްރެޒިޑެންޓްސް ކަޕް ކުރިއަށްދަނީ ފުރަތަމަ ޑިވިޝަނުގެ އަށް ކްލަބްގެ މެދުގައި ލީގު އުސޫލުން ކުޅެފައި އެންމެ ގިނަ ޕޮއިންޓް ހޯދާ ދެ ޓީމު ފައިނަލަށް ދާ ގޮތަށެވެ. ކޮންމެ ޓީމަކަށް މުބާރާތުގެ ލީގު ބުރުގައި ބާކީ ދެ މެޗު އޮތްއިރު، މިހާރު ފައިނަލުގެ ފުރުސަތު އޮތީ ތިން ޓީމަކަށެވެ. އެއީ އެއް ވަނައިގައި އޮތް މާޒިޔާ އާއި ދެ ވަނައިގައި އޮތް ކްލަބް ވެލެންސިއާ އާއި ތިން ވަނައިގައި އޮތް ކްލަބް ގްރީން ސްޓްރީޓްސް އަށެވެ.
މާޒިޔާ އެއް ވަނައިގައި އޮތީ ދެ ވަނައިގައި އޮތް ވެލެންސިއާއާ އެއްވަރަށް ފަސް މެޗުން 15 ޕޮއިންޓް ލިބިފައިވީ ނަމަވެސް ފައިދާ ގޯލުގެ ގޮތުން ކުރިލިބޭތީ އެވެ. ގްރީން ސްޓްރީޓްސް ތިން ވަނައިގައި އޮތީ 12 ޕޮއިންޓާ އެކު އެވެ.
މާދަމާ ހަވީރު މާޒިޔާއާ ދެކޮޅަށް ކުޅޭ މެޗުން މޮޅުވެގެން ނޫން ގޮތަކަށް ގްރީން ސްޓްރީޓްސް އަށް އަމިއްލަ ބާރުގައި ފައިނަލުގެ ޖާގަ ލިބެން ނެތެވެ. ގްރީން ސްޓްރީޓްސްގެ ކޯޗު ނިސްތާރު ބުނީ އޭނާ ދެކޭގޮތުގައި މެޗުގެ މުހިންމު ކަމަށް ބަލާއިރު، މާޒިޔާ އާއި ގްރީން ސްޓްރީޓްސް އަށް ވެސް ހަމަހަމަ ކަމަށެވެ.
"އަޅުގަނޑުމެންނަށް މުހިންމުހާ މުހިންމު އެ މީހުންނަށް ވެސް، ވަކި ކުޑައެއް ނުވާނެ. އަޅުގަނޑުމެންނަށް ވުރެ ޕްރެޝަރު ބޮޑުވާނީ މާޒިޔާ އަށް. އަޅުގަނޑުމެންގެ އެކްސްޕެކްޓޭޝަނަށް ވުރެ އެމީހުންގެ އެކްސްޕެކްޓޭޝަން ބޮޑުވާނެ،" މުބާރާތް ކާމިޔާބު ކުރުމުގެ ޕްރެޝަރު އޮތީ ގްރީން ސްޓްރީޓްސް އަށް ވުރެ ބޮޑަށް މާޒިޔާ އަށް ކަމަށް އިޝާރާތްކޮށް ނިސްތާރު ބުންޏެވެ.
މާޒިޔާގައި ގައުމީ ޓީމުގެ ގިނަ ކުޅުންތެރިން ތިބުމަކީ އެޑްވާންޓޭޖަކަށް ވާނެތޯ އެހުމުން ނިސްތާރު ބުނީ ދެ ޓީމުން ވެސް ދަނޑަށް އަރާނީ 11 ކުޅުންތެރިން ކަމަށާއި ނަތީޖާ ބިނާވާނީ ދަނޑު މައްޗަށް އެ އަރާ ކުޅުންތެރިން ކުރާ މަސައްކަތުން ކަމަށެވެ.
"އަޅުގަނޑުމެންގެ (ގްރީން ސްޓްރީޓްސް)ގެ ކޮންމެ ކުޅުންތެރިއަކީ ވެސް ހަމަ ގައުމީ ޓީމުގެ ޑްރީމް ހުރި (ހުވަފެން ދެކޭ) ޕްލޭޔަރުން. އެހެންވީމަ އަޅުގަނޑު ދެކެނީ މިއީ އެ މީހުންނަށް ލިބޭ ވަރަށް ބޮޑު އޮޕޮޗިއުނިޓީއެއްގެ (ފުރުސަތެއްގެ) ގޮތުގައި،" ނިސްތާރު ބުންޏެވެ.
"ބޮޑު ޓީމު ބަލިކުރުމަކީ އާ ކަމެއް ނޫން. އެހެންވީމަ އަޅުގަނޑުމެންގެ މެކްސިމަމް އިންޝާﷲ ދޭނަން ހަމަ،"
މި ވަގުތު ކުރިމަތިވެފައި އޮތް ހާލަތަށް ބަލާއިރު، އޮތް ގޮންޖުހުމަކީ ކުޅުންތެރިން އެކި ރަށްރަށާއި އެކި ތަންތަނުގައި އޮންނަ މުބާރާތް ކުޅެފައި އައިސް މެޗު ކުޅެން ޖެހުމުން އެ ހުރި ގޮންޖެހުން ކަމަށް ނިސްތާރު ވަނީ ފާހަގަކޮށްފަ އެވެ.
މި ސީޒަނުގައި ގްރީން ސްޓްރީޓްސް އަށް ވުރެ ގިނައިން ގޯލު ޖެހި ޓީމަކީ މާޒިޔާ އެވެ. ޕްރެޒިޑެންޓްސް ކަޕްގެ އެކަނި ތަފާސްހިސާބުތަކަށް ބަލާއިރު، މާޒިޔާ އިން ގްރީން ސްޓްރީޓްސް އަށް ވުރެ އިތުރަށް ޖެހީ އެންމެ ގޯލެކެވެ.
ނިސްތާރު ބުނީ ގޯލު ޖެހުމުގެ އަދަދު ގިނަ ކުރުމަށް ހާއްސަކަމެއް ނުދޭ ކަމަށާއި ޓާގެޓަކީ އޭރަކު ވާދަކުރާ މެޗަކުން މޮޅެއް ހޯދުން ކަމަށެވެ.
"އަޅުގަނޑަށް އެންމެ މުހިންމު އެއްޗަކީ ވިން (މޮޅު). އެ ވިން (މޮޅު) އަންނަން އެންމެ އިމްޕޯޓަންޓް (މުހިންމު) ކަމަކީ އޮޕޯނެންޓަށް (އިދިކޮޅު ޓީމަށް) ވުރެ ގިނަ ގޯލު ޖެހުން،" ނިސްތާރު ބުންޏެވެ.
ނިސްތާރު ބުނީ މާދަމާ މެޗުގައި ފުރަތަމަ ގޯލު ޖަހާ ޓީމެއް ނޫނީ ރަނގަޅަށް ފަށާ ޓީމަކީ މޮޅުވާނެ ޓީމުކަން ޔަގީން ނުވާނެ ކަމަށެވެ. އެ ގޮތުން ނިސްތާރު މިސާލު ނެގީ ދާދި ފަހުން ދަ ގްރާންޑޭ ސްޕޯޓްސް ކްލަބުން ދެ ގޯލު ޖަހާފައި އޮއްވައި ކްލަބް އީގަލްސް އިން ފަހު 30 މިނިޓް ތެރޭ ނަތީޖާ އަނބުރާލި މެޗުގެ އެވެ.
"ދިވެހި ޕްލޭޔަރުންނަކީ އެހާ ފަސޭހައިން ގިވްއަފް ކުރާ ޕްލޭޔަރުންނެއް ނޫން. ފެށުން ގޯސް ވިޔަސް ކޮންމެ ބައެއް ވެސް ފަހުން ރަނގަޅު ވެދާނެ،" ނިސްތާރު ބުންޏެވެ.
މާޒިޔާ އާއި ގްރީން ސްޓްރީޓްސް ކުޅޭ މެޗު ފަށާނީ މާދަމާ ހަވީރު 16:00 ގަ އެވެ.
