ކޯލިޝަން ސަރުކާރުގެ ތެރޭގައި ހިމެނޭ އަދާލަތު ޕާޓީއަށް ގިނަ ބަޔަކު ވަދެ، ގާސިމް އިބްރާހިމް ލީޑްކުރައްވާ ޖުމްހޫރީ ޕާޓީއާ އަރާ ހަމަކުރާ ކަމަށް އިލެކްޝަން ކޮމިޝަންގެ ހިސާބުތަކުން ދައްކައިފި އެވެ.
އެ ކޮމިޝަނުން މި ނޫހާ މިއަދު ހިއްސާކުރި ސިޔާސީ ޕާޓީތަކުގެ ޖުމްލަ މެމްބަރުންގެ އަދަދު ދައްކުވައިދޭ ދަފްތަރުގައިވާ ގޮތުުން ޖުމްހޫރީ ޕާޓީ އާއި އަދާލަތު ޕާޓީއާ ދެމެދު ވަނީ 1441 މީހުންގެ ހަނި ތަފާތެކެެވެ.
ޖޭޕީގައި މިވަގުތު 12،747 މެމްބަރުން ތިބިއިރު، އެއީ މިހާރު ތިންވަނައަށް އެންމެ މެންބަރުން ގިނަ ޕާޓީ އެވެ.
އަދާލަތު އޮތީ 11306 މެންބަރުންނާއެކު ދަފްތަރުގެ ހަތަރު ވަނައިގަ އެވެ. ދެން އޮތީ އެންމެ ފަހުން އުފެއްދި އެމްއެންޕީ އެވެ. އެ ޕާޓީގައި 8570 މީހުން ތިބިއިރު، މި ތިން ޕާޓީގެ މެދުގައި ވެސް ވާދަވެރިކަން ވަރަށް ބޮޑެވެ.
ސިޔާސީ ޕާޓީތައް ވުޖޫދުވެ، މަލްޓި ޕާޓީ ޑިމޮކްރެޓިކް ނިޒާމެއް ރާއްޖޭ އައިފަހުން 2008 ވަނަ އަހަރުން ފެށިގެން އަބަދުވެސް އެންމެ މެންބަރުން ގިނަ ޕާޓީއެއްގެ ގޮތުގައި އޮންނަނީ އެމްޑީޕީ އެވެ. މިހާރު އެ ޕާޓީގައި 50,055 މެމްބަރުން އެބަތިބި އެވެ. ނަމަވެސް, ނިމިދިޔަ އަހަރުގެ އޮކްޓޯބަރު މަހު ބޭއްވި އެމްޑީޕީގެ އެތެރޭގެ އިންތިހާބުގައި ވޯޓުލުމުގެ ހައްގު ލިބޭ 90،000 އަށް ވުރެ ގިނަ މީހުން ތިބި ކަމަށާއި، އެ އިންތިހާބުގައި 47،100 މީހުން ބައިވެރިވެފައިވާ ކަމަށް އެ ޕާޓީން ފާހަގަކުރެ އެވެ.
ދެވަނައަށް އެންމެ މެންބަރުން ގިނައީ ޕީޕީއެމްގަ އެވެ. އެ ޕާޓީގައި މިވަގުތު 35،350 މީހުން ތިބި ކަމަށް އީސީގެ ހިސާބުތަކުން ދައްކަ އެވެ.
titledesc
ނިމިދިޔަ އަހަރު ހަތް ސިޔާސީ ޕާޓީއަކަށް ވަނުމަށް ޖުމްލަ 52،841 ފޯމް އިލެކްޝަނަށް ހުށަހަޅާފައިވާއިރު، މިހާތަނަށް ޕްރޮސެސް ނުކުރެވި 26،858 ފޯމެއް އެބަހުރި ކަމަށް އެ ކޮމިޝަނުން ފާހަގަކުރެ އެވެ. އެ ފޯމްތައް ގުނާ ނިމުމާއެކު މި އަދަދުތަކަށް ބަދަލެއް އަންނާނެ އެވެ.
