މިދިޔަ ދެ އަހަރު ކުޑަކުދިން ލައްވާ ހަށި ވިއްކުމުގެ 334 މައްސަލައެއް ފުލުހުންނަށް ހުށަހަޅާފައިވާ ކަމަށް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް)އިން ހާމަކޮށްފި އެވެ.
މިނިސްޓްރީ އޮފް ޖެންޑާ ފެމިލީ އެންޑް ސޯޝަލް ސާވިސަސްގެ ތަފާސް ހިސާބުތަކަށް ބަލާއިރު ފާއިތުވި އަހަރުތަކުގެ ތެރޭގައި ކުޑަކުދިންގެ ނާޖާއިޒު ބޭނުންކޮށްފައިވާ މައްސަލަތައް ރިޕޯޓުކޮށްފައިވާ މިންވަރު އިތުރެވެ,
ޔޫއެސް ސްޓޭޓް ޑިޕާޓްމަންޓުން ޝާއިއުކޮށްފައިވާ "2019 ފައިޑިންގްސް އޮން ދަ ވާސްޓް ފޯމްސް އޮފް ޗައިލްޑް ލޭބާ މޯލްޑިވްސް" ގައި ފާހަގަކޮށްފައިވާ ގޮތުން 2019 ވަނަ އަހަރު އޮރިޔާންކާޑާއި ޖިންސީ ވިޔަފާރީގެ 80 މައްސަލައެއް ތަހުގީގު ކޮށްފައިވެ އެވެ.
މީގެ ތެރެއިން ހަތަރު މައްސަލައަކީ ކުޑަކުދިން ހަށިވިއްކުމުގެ ވިޔަފާރީގައި ބޭނުންކޮށްފައިވާ މައްސަލަ އެވެ.
ހަމަ އެހެންމެ، ޔޫއެސް ސްޓޭޓް ޑިޕާޓްމަންޓުން ޝާއިރު ކޮށްފައިވާ ޓްރެފިކިންގް އިން ޕާސަންސް ރިޕޯޓް 2021 ގައި ފާހަގަކޮށްފައިވާ ގޮތުން ޖިންސީ ވިޔަފާރި، ކުޑަކުދިން ބޭނުންކޮށްފައިވާ 115 މައްސަލައެއް 2020 ވަނަ އަހަރު ފުލުހަށް ހުށަހަޅާފައިވެ އެވެ.
އަހަރަކަށްވުރެ އަހަރެއް މައްސަލަތައް އިތުރުވެފައިވާއިރު މިދިޔަ އަހަރު ކުޑަކުދިން ބޭނުން ކޮށްގެން ޖިންސީ ވިޔަފާރި ކޮށްފައިވާ 291 މައްސަލައެއް ފުލުހަށް ހުށަހަޅާފައިވެ އެވެ.
އެޗްއާރްސީއެމްގެ އަހަރީ ރިޕޯޓުގައި ފާހަގަ ކޮށްފައިވާ ގޮތުގައި އެ މައްސަލަތައް ބަލާފައިވަނީ ޓްރެފިކިންގެ މައްސަލަތަކެއްގެ ގޮތުގައެއް ނޫނެވެ. އެހެންކަމުން ޖިންސީ ވިޔަފާރީގައި ކުޑަކުދިން ބޭނުންކޮށްފައިވާ ނިސްބަތް ބޮޑުކަމަށް ފާހަގަކުރެވޭއިރު، އެފަދަ މައްސަލަތައް މުޖުތަމައުން ނައްތާލުމަށްޓަކައި ގޮތް ނިންމާ ލެވެލްގައި ގިނަ މަސައްކަތްތަކެއް ކުރަންޖެހިފައިވާ ކަމަށް ކޮމިޝަނުން ދެކެ އެވެ.
މީގެ އިތުރުން އެޗްއާރްސީއެމްގެ ރިޕޯޓުގައި ޖިންސީ ވިޔަފާރީގައި ކުޑަކުދިން ބޭނުންކުރުމާއި މަސްތުވާތަކެތީގެ ވިޔަފާރީގައި ކުޑަކުދިން ބޭނުންކުރުމުގެ މައްސަލަތަކުގައި އިޖްތިމާއީ ޕްރޮގްރާމްތަކުގެ ތެރެއިން އެންމެ ފުރިހަމައަށް ސަމާލުކަން ދެވިފައިނުވާކަން ވަނީ ފާހަގަކޮށްފަ އެވެ.
އެޗްއާރްސީއެމުން ބުނީ ފުލުހުންނާއި އިޖްތިމާއީ ހިދުމަތް ފޯރުކޮށްދޭ ފަރާތްތަކުން ޖިންސީ ވަގުފާރި އަދި ޖިންސީ އަނިޔާގެ ފަރަގު އެންމެ ފުރިހަމައަށް ފަހުމްވެފައިނުވާކަން ފާހަގަވެފައިވާ ކަމަށެވެ. އެހެންކަމުން ޖިންސީ ވަގުފާރީގެ މައްސަލަތަކުގެ އަދަދު ދެނެގަނެވިފައިނުވާ ކަމަށް އެޗްއާރްސީއެމުން ބުނެ އެވެ.
