މާލޭގައި އެންމެ ފަހުން އެމްޑީޕީން ބޭއްވި ޖަލްސާގައި ވެސް އެ ޕާޓީގެ އިސްވެރިން ވިދާޅުވީ މާލޭގެ ރައްޔިތުންނަށް ހުޅުމާލޭން ދޭން ޖެހޭނީ "ކަަޑަޖަހާފައި، ސީދާ ގޯތި" ކަމަށެވެ. އޭގެ ފަހުން ހަފުތާއެއް ނުވަނީސް، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން އިއްޔެ ހުޅުވައިލީ ހުޅުމާލޭގެ ދެވަނަ ފޭހުން 60 ގޯތި ބީލަން އުސޫލުން ވިއްކާށެވެ.
ސޯޝަލް މީޑިއާ ޕްލެޓްފޯމް ޓުވިޓާގައި މީހުން އެކަމާ ނުރުހުން ފާޅުކުރަމުން ދަނިކޮށް، ވެރިކަން ހިންގާ އެމްޑީޕީގެ ބައެއް އިސްވެރިން ވެސް ފާޅުކުރެއްވީ އެކަމުގެ ކަންބޮޑުވުމެވެ. އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި އެޕާޓީގެ ޗެއާޕާސަން ހަސަން ލަތީފު ވެސް އެ "ކަންބޮޑުވުމުގައި" ބައިވެރިވެވަޑައިގެންނެވި އެވެ.
"މާލެ ސަރަހައްދުގައި ދިރިއުޅޭ އާމްދަނީ މަދު މީހުންނަށް ބިން ލިބޭނެ ގޮތެއް ނެތި ހުޅުމާލޭން ބިން ވިއްކުމަކީ ބަލައިގަނެވޭނެ ކަމެއް ނޫން. މި ސިޔާސަތު ބަދަލުކުރުމަށް ސަރުކާރަށް ގޮވާލަން،" ނަޝީދު ޓްވީޓްކުރެއްވި އެވެ.
ހައުސިން މިނިސްޓްރީއާއި އެޗްޑީސީ އަދި އެމްޑީޕީ ވެސް ޓެގް ކުރައްވައި ހަސަން ކުރެއްވި ޓްވީޓެއްގައި ވިދާޅުވީ ހުޅުމާލޭން މާލޭގެ ރައްވެހިންނަށް ދިރިއުޅޭނެ ގޯތި ދިނުމުގެ މަސައްކަތް ނުކޮށް ހުޅުމާލޭގެ ބިން ބީލަމުގެ އުސޫލުން ވިއްކަން ފެށުމަކީ ބަލައިގަނެވޭނެކަމެއް ނޫން ކަމަށެވެ.
ސަރުކާރު ހިންގާ ކޯލިޝަންގެ މައިޕާޓީއަކީ އަދި ރައްޔިތުންގެ މަޖިލީހުގެ ސުޕަމެޖޯރިޓީ ވެސް އޮތީ އެމްޑީޕީއަށް ކަމަށް ވާތީ، ނަޝީދު އަދި ހަސަންގެ އެވާހަކައާ މެދު ޓްވިޓާގައި ގިނަ ބަޔަކު ނުރުހުން ފާޅުކުރި އެވެ. ބައެއް މީހުން ބުނީ އޭނާ އެ ދެއްކެވީ ދެކޮޅު ނުޖެހޭ، ދެފުށް ދެ ގޮތަށް ވާހަކައެއް ކަމަށެވެ.
"ސަރުކާރުގައި ތިބެ، އަމިއްލަ ސުޕަމެޖޯރިޓީ އޮވެ، ސަރުކާރުން ކުރާ ކަންކަމަށް އެއްބާރުލުންދީ، ދެން އެކަމާ އިދިކޮޅު ހަދާކަމަށް ތި ކުރާ ޓްވީޓަށް ހަމަ އައްސަރިބަހާ ސާބަސް،" ހަސަން ލަތީފަށް ރައްދުދިން މީހަކު ބުންޏެވެ.
އެހެން މީހަކު ބުނީ އެއީ "ރައްޔިތުން ހައްދަން" ދައްކާ ވާހަކައެއް ކަމަށާއި "އެއް އަތުން ކޮށްފައި އަނެއް އަތުން ހުއްޓުވަން އުޅެނީ" ކަމަށެވެ.
ސަރުކާރާއި މަޖިލީހުގެ ސުޕަ މެޖޯރިޓީ އޮވެ، އެޗްޑީސީއަށް ވެރިން ލީވެސް އެމްޑީޕީން ކަމަށާއި އެހެންވީމާ އެކަމާ ދެކޮޅު ކަމަށް ހަސަން ލަތީފް ވިދާޅުވަނީ ރުހިވަޑައިނުގަންނަވާކަން "މީހުންނަށް ދައްކަން ކަމަށް ވެސް ޓުވިޓާގައި އޭނާއަށް ރައްދު ދެމުން މީހުން ބުނެފައިވެ އެވެ.
ހުޅުމާލޭން ބިން ވިއްކުމާ ހަމަ ހަގީގަތުގައި ވެސް ދެކޮޅު ނަމަ "ސްޓަންޓް ނުޖައްސައި" އެކަން ހުއްޓުވަން ވެސް ބައެއް މީހުން ގޮވައިލި އެވެ.
ކުރީގެ ދެ ސަރުކާރުގައި ސްޓޭޓް މިނިސްޓަރަކަށް އުޅުއްވި އަބްދުލް މަތީން، މުހައްމަދު، ހަސަންގެ ޓުވީޓަށް ރައްދު ދެއްވަމުން ވިދާޅުވީ ސަރުކާރާއި މަޖިލީހުގެ ސުޕަ މެޖޯރިޓީ އެމްޑީޕީއަށް އޮއްވައި އެބާވަތުގެ ވާހަކަ ދައްކަވަނީ އިހުލާސްތެރިކަމެއް ނެތުމުން ކަމަށެވެ.
"ރައީސްކަމާއި މަޖިލީހުގެ ސުޕަމެޖޯރިޓީ އެމްޑީޕީއަށް އޮވެ ތިބާވަތުގެ ވާހަކަތައް ތިޔަ ދައްކަނީ އެއްވެސް އިހުލާސްތެރިކަމެއް ނެތި ރައްޔިތުން ޅޮސް އުނދޯއްޔަށް އެރުވުމުގެ ބޭނުމުގައި،" އޭނާ ވިދާޅުވި އެވެ.
އެމްޑީޕީގެ ވެރިންގެ އެފަދަ ޓުވީޓްތައް ދެކެފައި "ރައްޔިތުން ހީކުރަންވީ އެއީ އެމްޑީޕީއާ އެއްވެސް ގުޅުމެއް ނެތްކަމެއް ކަމަށްތޯ" ވެސް މީހަކު ސުވާލުކުރި އެވެ.
ގިނަ މީހުންގެ މެސެޖަކީ އެއީ އެމްޑީޕީން ބޭނުން ނަމަ ބަދަލުކުރެވޭނެ ނިންމުމެއް ކަމެވެ.
