ހުޅުމާލޭގެ ރަޖިސްޓްރީ ބާތިލުކުރަން މާލެ ސިޓީ ކައުންސިލުން ނިންމި ނިންމުމަށް އަމަލު ކުރަން ނުޖެހޭނެ ކަމަށް ކަނޑައަޅަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ހުށަހެޅުމުން ސިޓީ ކައުންސިލުގެ ނިންމުމަށް އަމަލުކުރުން ފަސްކުރަން ސިވިލް ކޯޓުން ވަގުތީ އަމުރެއް ނެރެފި އެވެ.
މާލެ ސިޓީ ކައުންސިލުން ހުޅުމާލޭގެ ރަޖިސްޓްރީ ބާތިލުކުރީ އިދިކޮޅު ޕީޕީއެމް/ޕީއެންސީ ކޯލިޝަނުގެ ޖަލްސާއެއް ހުޅުމާލެ ފޭސް ދޭއްގައި ނުބޭއްވިގެން އުފެދުނު މައްސަލަގަނޑެއްގެ ތެރޭގަ އެވެ.
އިދިކޮޅުގެ މެޖޯރިޓީ އޮންނަ ސިޓީ ކައުންސިލުން ވަނީ އެޗްޑީސީގެ ނަން މަތީގައި ރަޖިސްޓްރީކޮށްފައި އޮތް ހުޅުމާލޭ ބިންތަކުގެ ރަޖިސްޓްރީ ބާތިލުކޮށް، ސިޓީ ކައުންސިލަށް ބިންތައް ނަގަން ނިންމާފަ އެވެ. މި މައްސަލަ ހައްލުނުވެ، އެޗްޑީސީން ވަނީ ހުޅުމާލޭގައި ފޯރިމަރަން ފުލުހުންގެ އެހީތެރިކަން ހޯދާފަ އެވެ.
ސިޓީ ކައުންސިލުގެ ނިންމުން އެޗްޑީސީން ސިފަކުރީ ގާނޫނާ ހިލާފު ނާތަހުޒީބީ އަމަލެއްގެ ގޮތުގަ އެވެ. އަދި ކޯޓަށް މައްސަލަ ހުށަހެޅީ ސިޓީ ކައުންސިލުގެ ނިންމުމާ ގުޅިގެން ކުންފުނިން ހިންގަމުންދާ ޕްރޮޖެކްޓުތަކަށާއި ކުންފުނިން ނަގާފައިވާ ލޯނުތަކުގެ ޝަރުތުތަކާ ހިލާފު ކަމަށް ބުނެ، އިޔާދަ ނުކުރެވޭ ވަރުގެ ގެއްލުމެއް ލިބިދާނެ ކަމަށް ވެސް އެ ކޯޕަރޭޝަނުން ބުންޏެވެ.
އެޗްޑީސީން އެދުނު ގޮތަށް ނިންމުން ފަސްކުރަން ސިވިލް ކޯޓުން ނެރުނު ވަގުތީ އަމުރުގައި ވަނީ ސިޓީ ކައުންސިލުގެ ނިންމުން ތަންފީޒުކުރަން އެއްވެސް އިދާރާއަކުން ކަމެއް ނުކުރުމަށާއި، ހުޅޫމާލޭގައި އެޗްޑީސީން ކުރަމުންދާ އެއްވެސް މަސައްކަތަކަށް ހުރަސްއެޅޭނެ ކަމެއް ނުކުރުމަށް އަންގާފަ އެވެ.
