އުއްތަމަފަނޑިޔާރުގެ ވަގުތީ ގެކޮޅުގެ ގޮތުގައި ރެހެންދި ފްލެޓުން ހަމަޖައްސާ އެޕާޓްމެންޓުގެ މަސައްކަތް ކުރިޔަށް އޮތް އެއް މަސް ދުވަހުގެ ތެރޭގައި ނިމޭނެ ކަމަށް މައުލޫމާތު ލިބިއްޖެ އެވެ.
އުއްތަމަފަނޑިޔާރުގެ ވަގުތީ ގެކޮޅުގެ ގޮތުގައި ހަމަޖައްސަނީ ރެހެންދި ފްލެޓުގެ 3 ގައި ހުންނަ ދައުލަތަށް ނަގާފައިވާ ދެ އެޕާޓްމެންޓެވެ. މައުލޫމާތު ލިބިފައިވާ ގޮތުގައި އެ ދެ އެޕާޓްމެންޓުގެ މަސައްކަތް ކުރިއަށްދާތާ ތިން ހަފްތާ ވެއްޖެ އެވެ.
އެ އެޕާޓްމަންޓުގައި މިހާރު ކުރަމުން އަންނަ މަސައްކަތްތަކުގެ ތެރޭގައި ތަނުގެ ސެކިއުރިޓީ ކަންކަން ބަލަހައްޓާ އެމްއެންޑީއެފްގެ ސިފައިން ތިބޭނެ ތަންތަން ހެދުމާއި ކެމެރާތައް ހަރުކުރުން ހިމެނެ އެވެ.
އެ ފްލެޓަށް ވަދެ ނިކުމެ އުޅުމަށް ހާއްސަ އިންތިޒާމެއް ހަމަޖައްސާއިރު، އުއްތަމަފަނޑިޔާރުގެ ކާރުކޮޅު އަދި ސަލާމަތީ ކަންކަން ބަލަހައްޓާ ފަރާތްތަކުގެ ވެހިކަލްތައް ޕާކުކުރާނެ ޖާގަތައް ތައްޔާރުކުރުމާއި، ރިނޮވޭޓްކުރުމުގެ މަސައްކަތް މިހާރު ކުރިއަށް އެބަ ދެއެވެ. އަދި އޭގެ އިތުރުން ވެސް އެ ދެ އެޕާޓްމެންޓުގެ އިންޓީރިއާ މަސައްކަތްތަކާއި، ކުލަލުމުގެ މަސައްކަތުގެ އިތުރުން އެ އެޕާޓްމެންޓްތަކުގެ ފާހަނާއަށް ގެންނަ ބަދަލުތަކުގެ މަސައްކަތްތައް ވެސް ކުރިއަށް ގެންދާކަމަށް މައުލޫމާތު ލިބިފައިވެ އެވެ.
ރެހެންދި ފްލެޓުގެ ތެރޭގައި ކުރިޔަށްދާ މަސައްކަތްތަކެއް. އެތަނުގެ އެތެރޭގައި ގިނަ އަދަެއްގެ މަސައްކަތްތަކެއް ކުރަމުން ދަނީ އުއްތަމަފަނޑިޔާރުގެ ވަގުތީ ގެކޮޅުގެ ގޮތުގައި އެތަނުގެ ދެ އެޕާޓްމެންޓެއް ހަމަޖެއްސުމުން ސަލާމަތީ ކަންކަމާ ގުޅިގެން. ފޮޓޯ: އަދަދު
އެ ހުރިހާ މަސައްކަތްތައް މިހާރު ނިމެން ކައިރިވެފައިވާއިރު، އެ މަސައްކަތްތަކަށް ޖުމްލަ ހޭދަވާނޭކަމަށް އަންދާޒާކޮށްފައި ވަނީ ފަސް މިލިއަނާއި އަށް މިލިއަން ރުފިޔާއާ ދެމެދުގެ އަގެކެވެ.
އުއްތަމަފަނޑިޔާރު ވަގުތީ ގޮތުން ދިރިއުޅުއްވަން ހަމަޖެހިފައިވަނީ، ރެހެންދި ފުލެޓުން ކުރީގެ ނައިބު ރައީސް އަބްދުﷲ ޖިހާދު ދިރިއުޅުއްވަން ހާއްސަކުރި އެޕާޓްމަންޓްގަ އެވެ. އޭރު ނައިބު ރައީސް ދިރިއުޅުއްވަން ވެސް އެ ދެ ތަނަށް ވަނީ ބޮޑެތި ހަރަދުތަކެއްކޮށް ރެނޮވޭޝަންތަކެއް ގެނެސްފަ އެވެ. އުއްތަމަ ފަނޑިޔާރުގެ ވަގުތީ ގެކޮޅުގެ ގޮތުގައި އެތަން ހަމަޖައްސާއިރު، ބޮޑު ހަރަދެއް ދަނީ އެތަނުގެ ސެކިއުރިޓީ އިންތިޒާމުތަކަށް ބޭނުންވާ ބަދަލުތައް ގެނައުމަށެވެ.
އުއްތަމަ ފަނޑިޔާރު މިހާރު ދިރިއުޅުއްވާ އެޕާޓްމަންޓަށް ވަދެގަންނަން މީހަކު މަސައްކަތްކުރި ކަމުގެ މައްސަލައެއް ފުލުހުން ގެންދަނީ ތަހުގީގުކުރަމުންނެވެ. އަދި އެއީ އެމަނިކުފާނުގެ ސެކިއުރިޓީ ބްރީޗްވުން ކަމަށް ވިދާޅުވެ ރައްޔިތުންގެ މަޖިލީހުންވެސް ގެންދަނީ އެ މައްސަލަ ތަހުގީގުކުރަމުންނެވެ.
އުއްތަމަފަނޑިޔާރުގެ ރަސްމީ ގެކޮޅު އަޅަން ހަމަޖެހިފައިވަނީ ކުރީގެ ސްކައުޓް އެސޯސިއޭޝަނުން ހިންގި ހ. ބަންޑާރަވިލާގަ އެވެ. އެތަނުގެ މަސައްކަތް އަދި ފަށާފައެއް ނުވެ އެވެ.
އުއްތަމަފަނޑިޔާރު ރެހެންދި ފްލެޓަށް ދިރިއުޅުއްވުން ވަގުތީކޮށް ބަދަލުކުރުމަށް ހަމަޖެހިފައިވާއިރު، އެތަނުގައި ދިރިއުޅޭ އާންމު ބައެއް ފަރާތްތަކުން ދަނީ އެތަނުގެ އެތެރޭގައި ކުރިޔަށް ގެންދާ މަސައްކަތްތަކާ ގުޅޭ ގޮތުން ކަންބޮޑުވުން ފާޅުކޮށް، އާންމުންނަށް އޭގެން ނެދެވޭ އަސަރުކުރާ ކަމަށް ބުނަމުންނެވެ.
އުއްތަމަފަނޑިޔާރުގެ މަގާމުގައި ހުންނަވާ ފަރާތަށް ދައުލަތުން ރަސްމީ ގެކޮޅު އަޅައިދީ ސެކިއުރިޓީ ދޭން ނިންމީ ދިވެހިރާއްޖޭގެ ފަނޑިޔާރުންގެ ގާނޫނަށް ގެނައި ހަ ވަނަ އިސްލާހު ތަސްދީގުކުރުމާއެކު މިދިޔަ ޖޫން މަހުގެ 30 ވަނަ ދުވަހު އެވެ.
އުއްތަމަފަނޑިޔާރާއެކު މަޖިލިސް ރައީސަށް ވެސް ދައުލަތުން ރަސްމީ ގެކޮޅާއި ސެކިއުރިޓީ ދޭން ވަނީ ގާނޫނަށް އިސްލާހު ގެނެސްފަ އެވެ. އެގޮތުން މަޖިލިސް ރައީސްގެ ވަގުތީ ގެކޮޅުގެ ގޮތުގައި ހަމަޖައްސާފައިވަނީ މުރައިދޫގެ އެވެ. ދާއިމީ ގެކޮޅު އަޅަން ނިންމާފައިވަނީ ސުޕްރީމް ކޯޓު ކުރިމަތިން އޮންނަ ދަންޑެހެލުގޭގަ އެވެ.
ދައުލަތުގެ ދެ ބާރުގެ ވެެރިންނަށް ރަސްމީ ގެކޮޅާއި ސެކިއުރިޓީ ދޭން ހަމަޖައްސާފައިވަނީ މޭ ހަ ވަނަ ދުވަހު މަޖިލިސް ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓު ހަމަލާއާ ގުޅިގެންނެވެ.
