ބާލިން (ސެޕްޓެމްބަރު 19) - ޖަރުމަނު ލީގުގައި މިރޭ އާލިން ބްރައުޓް ހާލަންޑް ޖެހި ތަފާތު ގޯލާ އެކު 4-2 އިން ޔޫނިއަން ބާލިން ބަލިކޮށް ބޮރޫޝިއާ ޑޯޓްމަންޑުން މުހިއްމު ތިން ޕޮއިންޓް ހޯދައިފި އެވެ.
ލީގުގެ އެއް ވަނައިގައި އޮތީ ރޭ ބޯކުމް ކޮޅަށް ހަތް ގޯލު ޖެހި އެންމެ ފަހުގެ ޗެމްޕިއަން ބަޔާން މިއުނިކް އެވެ. ބަޔާން އެއް ވަނައިގައި އޮތީ ފަސް މެޗުން 13 ޕޮއިންޓާ އެކު އެވެ. މިރޭ އެއިންޓްރަކްޓް ފްރޭންކްފާޓާ 1-1 އިން އެއްވަރުކޮށް ވުލްފްސްބާގް ވެސް ވަނީ ފަސް މެޗުން 13 ޕޮއިންޓް ހަަމަކޮށްފަ އެވެ. ވުލްފްސްބާގް ދެ ވަަނައިގައި އޮތީ ލަނޑުގެ ތަފާތުންނެވެ. ޑޯޓްމަންޑް ތިން ވަނައިގައި އޮތީ ފަސް މެޗުން 12 ޕޮއިންޓް ހޯދައިގެންނެވެ.
ޑޯޓްމަންޑް ދަނޑުގައި ކުޅުނު މެޗުގެ 10 ވަނަ މިނިޓްގައި އެ ޓީމަށް ލީޑުނަގައިދިނީ ޕޯޗުގީސް ފުލްބެކް ރަފައެލް ގަރޭރޯ އެވެ. އޭރިއާތެރެއިން ގަރޭރޯ ޖެހި ބޯޅަ އަމާޒުވީ ގޯލުގެ މަތީ ކަނަށެވެ. މެޗުގެ 23 ވަނަ މިނިޓްގައި ތޯމަސް މޮނިއޭ ނެގި ހުރަހަކުން ހާލަންޑް ވަނީ ބޮލުން ގޯލެއް ޖަހައި ޑޯޓްމަންޑްގެ ލީޑުފުޅާކޮށްދީފަ އެވެ.
މެޗުގައި ޑޯޓްމަންޑުން ޖެހި ތިން ވަނަ ގޯލަކީ ޔޫނިއަން ބާލިންގެ މާވިން ފްރެޑްރިކް އަތުން 52 ވަނަ މިނިޓްގައި ބައިކޮޅަށް ވަން ގޯލެކެވެ. އޭގެ ފަސް މިނިޓް ފަހުން ޕެނަލްޓީ އަކުން މެކްސް ކްރޫސް ޖެހި ގޯލުން ޔޫނިއަން ބާލިން އަށް އުއްމީދެއް ލިބުނެވެ. އަދި މެޗުގެ 81 ވަނަ މިނިޓްގައި ކޯނަރަކުން ޔޫނިއަން ބާލިންގެ އަންދްރެއަސް ވޯލްސާމާ ބޮލުން ޖެހި ގޯލާ އެކު ޑޯޓްމަންޑްގެ ލީޑު ކުޑަވި އެވެ.
އަލުން ލީޑުފުޅާކުރަން ޑޯޓްމަންޑުން މާ ގިނައިރެއްނުނެގި އެވެ. މެޗުގެ 83 ވަނަ މިނިޓްގައި ހާލަންޑް ޖެހި މޮޅު ގޯލުން ޑޯޓްމަންޑުން އަނެއްކާ ލީޑުފުޅާކުރި އެވެ.
މެޓްސް ހަމެލްސް މަތިން ދިން ބޯޅަ ހާލަންޑް އޭރިއާ ރޮނގުކައިރިން ވެއްޓިގެންފައި ވޮލީއަކުން ޖެހި ބޯޅަ ގޯލުގެ ދުރު ކަނަށް ވަނީ ޔޫނިއަން ބާލިންގެ ގޯލްކީޕަރު އަންޑްރެއަސް ލެއުތު ބޯމަތިން ގޮހެވެ. ކީޕަރު ލެއުތު ކުރިއަށް ޖެހިލީ ހާލަންޑް އެ ބޯޅަ ގޯލަށް ޖެހިޔަނުދިނުމަށެވެ. އެކަމަކު، އަވަސް ހަރަކާތްތަކާ އެކު ހާލަންޑް ވަނީ ބޯޅަ ގޯލުގެ ތެރެއަށް ފޮނުވާލައިފަ އެވެ.
ނޯވޭ އަށް އުފަން ޒުވާން ފޯވާޑް، ހާލަންޑް ވަނީ މި ސީޒަނުގެ ހުރިހާ މުބާރާތެއްގައި ކުޅުނު އަށް މެޗުން 11 ގޯލު ޖަހައިފަ އެވެ.
