މިއުނިކް (ސެޕްޓެމްބަރު 18) - ޖަރުމަނު ލީގުގައި މިރޭ ރެލިގޭޝަނުގައި އޮތް ވީއެފްއެލް ބޯކުމް އަތުން 7-0 އިން މޮޅުވެ، އެންމެ ފަހުގެ ޗެމްޕިއަން ބަޔާން މިއުނިކް ލީގުގެ އެއް ވަނަ އަށް ޖެހިލައިފި އެވެ.
ބަޔާން އެއް ވަނަައިގައި އޮތީ ފަސް މެޗުން 13 ޕޮއިންޓް ހޯދައިގެންނެވެ. ދެ ވަނައިގައި އޮތް ވުލްފްސްބާގަށް ހަތަރު މެޗުން 12 ޕޮއިންޓް ލިބިފައިވާއިރު، މާދަމާރޭ އެއިންޓްރަކްޓް ފްރޭންކްފާޓްގެ މައްޗަށް ކުރިހޯދައިގެން އަލުން އެއް ވަނަ އަށް އެރުމުގެ ފުރުސަތު ވުލްފްސްބާގަށް އޮތީ ހުޅުވިފަ އެވެ.
ޗެމްޕިއަންސް ލީގުގައި މި ހަފްތާގައި ބާސެލޯނާގެ މައްޗަށް ކުރިހޯދި ބަޔާންގެ ފުރަތަމަ އެގާރަ އަށް ތިން ބަދަލެއް ގެނެސްގެން މިރޭގެ މެޗަށް ނުކުތްއިރު، ބަޔާނުން ފުރަތަމަ ހާފު ވެސް ވަނީ ހަތަރު ގޯލު ޖަހައިފަ އެވެ.
ބަޔާން ދަނޑުގައި ކުޅުނު މެޗުގައި އެ ޓީމަށް ގޯލު ހުޅުވާލައިދިން ލަނޑު ޖަހައިދިނީ މެޗުގެ 17 ވަނަ މިނިޓްގައި ލެރޯއި ސާނޭ އެވެ. އޭގެ ފަހުން ބަޔާނުން ފުރަތަމަ ހާފު ނިމުމުގެ ކުރިން ލަނޑުތައް ޖެހީ ޔޯސުއާ ކިމިކާއި ސާޖް ގްނަބްރީ އަދި ބޯކުމްގެ ވަސިލިސް ލަމްޕްރޮޕޯލަސް އަތުން ބައިކޮޅަށް ވަން ގޯލެކެވެ.
މެޗުގެ 61 ވަަނަ މިނިޓްގައި ރޮބަޓް ލެވަންޑޯސްކީ ބަޔާންގެ ފަސް ވަނަ ގޯލު ޖެހިއިރު، މިއީ އޭނާ އަމިއްލަ ދަނޑުގައި ޖެހިޖެހިގެން ގޯލު ޖެހި 13 ވަނަ މެޗެވެ. މިއީ ރެކޯޑެކެވެ. ބަޔާންގެ އަނެއް ދެ ގޯލު ޖެހީ ކިމިކްގެ އިތުރުން ބަދަލެއްގެ ގޮތުގައި ކުޅެން އެރި އެރިކް މެކްސިމް ޗޮޕޫ-މޯޓިން އެވެ.
ބަޔާންގެ ކޯޗު ހޫލިއަން ނާގަލްސްމަން ބުނީ މެޗު ފަށައިގެން ބޯކުމް އިން ކޮންމެ ވެސް ވަރަކަށް ކުޅުނު ކަމަށެވެ. އެކަމަކު، ބަޔާނަށް ފުރަތަމަ ގޯލާ އެކު ލިބުނު ކޮންފިޑެންސަށް ފަހު ދެން ފެނުނީ ވަރަށް ތަފާތު ރޫހެއްގައި އެ ޓީމުން ކުޅެލިތަން ކަމަށް ނާގަލްސްމަން ވަނީ ބުނެފަ އެވެ.
ޖަރުމަނު ލީގުގައި މިރޭ އާރްބީ ލައިޕްޒިގާއި ކޮލޯން ކުޅުނު މެޗު ނިމުނީ 1-1 އިން އެއްވަރު ވެގެންނެވެ. އެންތަނީ މޮޑެސްޓޭގެ ގޯލުން ކޮލޯން ލީޑުނަގާފައިވަނިކޮށް ލައިޕްޒިގަށް އެއްވަރުކޮށްދިނީ އަމަދޫ ހައިޑާރާ އެވެ.
