ނ. މާފަރުގެ އިހުތިސޯސުން ބޭރުކޮށްފައިވާ ފަޅާއި ފަޅުގެ ތެރޭގައި އޮންނަ ފަޅު ރަށްތައް އަލުން އެ ރަށުގެ އިހުތިސޯސުގެ ތެރޭގައި ހިމެނުމަށް ރައީސް އިބްރާހިމް މުހައްމަދު ސޯލިހަށް ދަންނަވަން ނ. އަތޮޅު ކައުންސިލުން ގަރާރެއް ފާސްކޮށްފި އެވެ.
ނ. އަތޮޅު ކައުންސިލުން މި ގަރާރު ފާސްކުރީ، ލާމަރުކަޒީ ގާނޫނުގެ ދަށުން އިހުތިސޯސް ކަނޑައެޅިއިރު މާފަރުގެ ބައެއްގެ ގޮތުގައި އޮތް މާފަރުގެ ފަޅުން ސަރަހައްދެއް ރައީސްގެ ގަރާރަކުން މާފަރުން ވަކިކުރުމާ ގުޅިގެންނެވެ. ރައީސް ގަރާރުގައި އިހުތިސޯސަށް ބަދަލު ގެނައުމުގެ ސަބަބުން ފަޅުން ގާތްގަނޑަކަށް 80 ހެކްޓަރުގެ ސަރަހައްދަކާއި، އެ ސަރަހައްދުގައި އޮންނަ ދެ ފަޅު ރަށް މާފުރުން ވަކިވީ އެވެ.
މި މައްސަލައިގައި މާފަރު ރައްޔިތުންގެ ހުރި ކަންބޮޑުވުންތައް އަތޮޅު ކައުންސިލަށް ހުށައެޅުއްވީ އެ ރަށު ކައުންސިލުގެ ރައީސް އަދި އަތޮޅު ކައުންސިލް މެމްބަރު މުހައްމަދު އަދުނާނެވެ. އަދި އޭނާގެ ގަރާރުގައި ބުނި ގޮތުގައި، ފަޅުން ބޮޑު ބަޔެއް ގެއްލުމަކީ ރައްޔިތުންގެ ކަންބޮޑުވުން އިންތިހާއަށް ހުރި މައްސަލައެއް ކަމުން އަލުން މާފަރުގެ އިހުތިސޯސުގައި ހިމަނަން އެދޭ ކަމަށެވެ.
މި ގަރާރާ ގުޅިގެން އަދުނާނު "އަދަދު"އަށް ވިދާޅުވީ، ގަރާރު ހުށައެޅީ މާފަރުގެ ރައްޔިތުންގެ އިތުރުން، އެ އަތޮޅުގެ ރައްޔިތުންނަށް ނޭނގި ނޫނީ ރުހުން ނެތި އެއްވެސް ކަމެއް ކުރަން ނޭދޭތީ ކަމަށެވެ. އަދި އެ ނޫން ގޮތަކަށް އެތަނުން މަންފާ ލިބެން ރައްޔިތުން ވެސް ބޭނުން ނުވާތީ ކަމަށެވެ. އަދި ގާރާރުގައި ބުނި ގޮތަށް މާޒީގައި ވެސް މިއިން ތަނަކުން މަންފާ ލިބިފައި ނުވާ ކަމަށް ވިދާޅުވި އެވެ.
މައުލޫމާތު ލިބިފައިވާ ގޮތުގައި މިހާރު ކުރަމުންދަނީ ގަރާރާ ގުޅިގެން ފުރިހަމަކުރަން ޖެހޭ އިދާރީ ކަންކަން ފުރިހަމަ ކުރުމެވެ. އަދި އެކަންކަން ފުރިހަމަވީހާ އަވަހަކަށް ރައީސަށް ހުށައަޅަން ވަނީ ނިންމާފަ އެވެ.
އިހުތިސޯސުގެ މައްސަލައިގައި މާފަރުގެ އިތުރުން، ހއ. ފިއްލަދޫއިން ވެސް ވަނީ އެ ރަށުގެ އިހުތިސޯސުން އެ ރަށާ އެއްފަސް ދައްޕަރު ވަކިކުރުން ބާތިލުކުރަން ސަރުކާރަށް ގޮވާލަމުންނެވެ. އަދި ރައްޔިތުންގެ ކަންބޮޑުވުންތަކާ ގުޅިގެން ސަރުކާރުން ވެސް ވަނީ މި މައްސަލައިގައި ދޫދޭނެ ކަމުގެ އިޝާރާތެއްކޮށްފަ އެވެ.
އެެހެން ނަމަވެސް، އަދި މިހާތަނަށް މި މައްސަލައާ ގުޅިގެން އެއްވެސް ރަށެއްގެ އިހުތިސޯސަށް ބަދަލެއް ގެނެސްފައެއް ނުވެ އެވެ.
