ބާލިން (އޮގަސްޓް 8) - ޖަރުމަނު ކަޕްގެ ފުރަތަމަ ބުރުގައި ރޭ އާލިން ބްރައުޓް ހާލަންޑް 25 މިނިޓް ތެރޭ ހެދި ހެޓްރިކާ އެކު ޑޯޓްމަންޑުން 3-0 އިން ތިން ވަނަ ޑިވިޝަނުގެ ވަހެން ވިއެސްބަޑެން ބަލިކޮށްފި އެވެ.
ޖަރުމަނު ކަޕްގެ އެންމެ ފަހުގެ ޗެމްޕިއަން ޑޯޓްމަންޑް މި މެޗަށް ނުކުތްއިރު އެ ޓީމުގެ މުހިއްމު ދެ ކުޅުންތެރިއަކު ވަނީ ކޮވިޑަށް ޕޮޒިޓިވްވެފަ އެވެ. އެއީ ހޫލިއަން ބްރަންޑްޓް އާއި ތޯމަސް މޮނިއޭ އެވެ.
މި ފަހަރުގެ ޓްރާންސްފާ މާކެޓްގައި ހާލަންޑް، 21، ހޯދަން ގިނަ ހުށަހެޅުންތަކެއް ލިބުނު ނަމަވެސް ޑޯޓްމަންޑުން ނިންމީ އޭނާ ނުވިއްކާށެވެ. ރޭގެ މެޗުގައި ހާލަންޑް ފުރަތަމަ ގޯލު ޖެހީ 26 ވަނަ މިނިޓްގައި މާކޯ ރެއުސް ދިން ބޯޅައަކުންނެވެ. އޭގެ ހަތަރު މިނިޓް ފަހުން ހާލަންޑް ދެ ވަނަ ގޯލު ޖެހީ ޕެނަލްޓީ އަކުންނެވެ. މިއީ އޭނާ އަށް ކުރި ފައުލަކަށް ލިބުނު ޕެނަލްޓީ އެކެވެ.
ހާލަންޑް، އޭނާގެ ހެޓްރިކް ފުރިހަމަކުރީ މެޗުގެ 51 ވަަނަ މިނިޓްގަ އެވެ. މިއީ އެމެރިކާގެ މިޑްފީލްޑަރު ޖިއޮވާނީ ރޭނާ ދިން މޮޅު ޕާހަކުން ހާލަންޑް ޖެހި ގޯލެކެވެ.
މިދިޔަ އަހަރު ޖެނުއަރީ މަހު ޑޯޓްމަންޑަށް ސޮއިކުރި ފަހުން ހާލަންޑް ވަނީ މިހާތަނަށް އެ ޓީމަށް ކުޅެދިން 60 މެޗުން 60 ގޯލު ޖަހައި 15 ގޯލު ޖަހަން ފުރުސަތު ތަނަވަސްކޮށްދީފަ އެވެ.
ޖަރުމަނު ކަޕްގައި ރޭ ކުޅުނު ފާހަގަކޮށްލެވޭ އެހެން މެޗުތަކުގެ ނަތީޖާ އަށް ބަލާއިރު، އާ ކޯޗު ޖެސީ މާޝްގެ އިރުޝާދުގެ ދަށުން އާރްބީ ލައިޕްޒިގު ކުޅުނު ފުރަތަމަ މެޗުން ވަނީ ދެ ވަނަ ޑިވިޝަނުގެ ސޭންޑްހޯސެން އަތުން 4-0 އިން މޮޅުވެފަ އެވެ. ބަޔާ ލެވަކޫސަނުން ވަނީ ހަތަރު ވަނަ ޑިވިޝަނުގެ ލޮކޮމޯޓިވް ލައިޕްޒިގު އަތުން 3-0 އިން މޮޅުވެފަ އެވެ. އަދި ސްޓުޓްގާޓުން ވަނީ ހަތަރު ވަނަ ޑިވިޝަންގެ ޑިނަމޯ ބާލިން 6-0 އިން ބަލިކޮށްފަ އެވެ.
ޖަރުމަނު ކަޕްގައި ބަޔާން މިއުނިކް ކުޅެން ޖެހިފައި އޮތީ ފަސް ވަނަ ޑިވިޝަނުގެ ބްރެމާ އެސްވީއާ ދެކޮޅަށެވެ. ހުކުރު ދުވަހު ކުޅެން އޮތް އެ މެޗު ފަސްކުރަން ޖެހުނީ ބްރެމާ އެސްވީގެ ތިން ކުޅުންތެރިއަކު ކޮވިޑަށް ޕޮޒިޓިވް ވެގެންނެވެ.
