މިއުނިކް (ޖުލައި 13) - ޔޫރަޕްގެ ޗެމްޕިއަން ޗެލްސީ އިން ބޮޑު އަގުދީފައި ބޮރޫޝިއާ ޑޯޓްމަންޑްގެ ފޯވާޑް އާލިން ބްރައުޓް ހާލަންޑް ގެންނަން މަސައްކަތް ކުރަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ތޯމަސް ޓުޗެލްގެ ކޯޗުކަމުގައި ކުޅެމުން އަންނަ ޗެލްސީން މި ފަހަރުގެ ޓްރާންސްފާ މާކެޓްގައި ފޯވާޑެއް ގެންނަން ވަރަށް ބޮޑަށް ބޭނުންވެ އެވެ. އެ ޓީމުން ޝޯޓްލިސްޓު ކޮށްފައިވާ ފޯވާޑުންނަކީ ޓޮޓެންހަމްގެ ހެރީ ކޭން އާއި ކުރިން ޗެލްސީ އަށް ކުޅުނު އަދި މިހާރު އިންޓަ މިލާންގައި ހުރި ބެލްޖިއަމްގެ ރޮމެލޫ ލުކާކޫ އަދި ހާލަންޑް އެވެ. މީގެ ތެރެއިން ޗެލްސީގެ ވެރިޔާ ރޯމަން އަބްރަމޮވިޗް އެންމެ ގަޔާވަނީ ހާލަންޑް ގެންނަން ކަމަށް އިނގިރޭސި ނޫސްތަކުން ވަނީ ރިޕޯޓްކޮށްފަ އެވެ.
އަންނަ އަހަރު ހާލަންޑް ގަންނަނަމަ 70 މިލިއަން ޕައުން (96 މިލިއަން ޑޮލަރު) އަށް އެ ޑީލް ނިންމައިލެވޭނެ އެވެ. އެކަމަކު، މި ފަހަރުގެ ޓްރާންސްފާ މާކެޓްގައި އުމުރުން 20 އަހަރުގެ ހާލަންޑް ގަންނަނަމަ މަދުވެގެން 200 މިލިއަން ޑޮލަރުގެ ފީއަކަށް ޑޯޓްމަންޑުން ޑިމާންޑް ކުރާނެ އެވެ.
ރިޕޯޓްތައް ބުނާގޮތުން މި ފަހަރުގެ ޓްރާންސްފާ މާކެޓް ނިމުމުގެ ކުރިން ހާލަންޑްގެ ސޮއި ހޯދާ ކްލަބެއްގެ އަތުން އޭނާގެ އޭޖެންޓް މިނޯ ރައިއޯލާ މަދުވެގެން 20 މިލިއަން ޑޮލަރުގެ ފީއެއް ނަގާނެ އެވެ. މަޝްހޫރު ކްލަބްތަކުން ހާލަންޑްގެ ޑީލަށް މި ފަހަރު ނޫނެކޭ ބުނީ ވެސް އެ ސަބަބާ ހުރެ އެވެ. ރައިއޯލާ ވަނީ ހާލަންޑްގެ ޑީލްގެ މަޝްވަރާތަކެއް ރެއާލާއި ބާސެލޯނާއާ އެކު ކުރިއަށް ގެންގޮސްފަ އެވެ.
އިނގިރޭސި އަދި ޖަރުމަނުގެ ބައެއް މީޑިއާ ރިޕޯޓްތައް ބުނާގޮތުން ޗެލްސީން ވިސްނަމުން އަންނަނީ 100 މިލިއަން ޑޮލަރުގެ އިތުރުން ދެ ކުޅުންތެރިން ޑޯޓްމަންޑަށް ހުށަހަޅައިގެން އެ ޓްރާންސްފާ ކުރިއަށް ގެންދާށެވެ. އެކަމަކު، އެ ގޮތަށް ޑޯޓްމަންޑުން އެ ޑީލް އެއްބަސްވުމުގެ ފުރުސަތު ކުޑަ އެވެ.
ގިނަ ކްލަބްތަކަކުން ކިޔޫ ހަދައިގެން ހާލަންޑްގެ ސޮއި ހޯދަން ބުރަކޮށް މަސައްކަތް ކުރަމުން ދަނިކޮށް ޑޯޓްމަންޑުން އޭނާ ގެންދިޔައީ މިދިޔަ އަހަރުގެ ޖެނުއަރީ މަހު އެވެ. އެއީ އޭރު ހާލަންޑް ކުޅެމުން އައި އޮސްޓްރިއާގެ ރެޑްބުލް ސަލްޒްބާގަށް 20 މިލިއަން ޔޫރޯގެ ފީއެއް ދައްކާފައިފަ އެވެ. ނޯވޭ އަށް އުފަން ހާލަންޑް ޑޯޓްމަންޑާ އެކު ސޮއިކުރީ ހަތަރު އަހަރުގެ ކޮންޓްރެކްޓެއްގަ އެވެ.
ޑޯޓްމަންޑަށް ސޮއިކުރުމަށް ފަހު ހާލަންޑް ވަނީ މިހާތަނަށް އެ ޓީމަށް ކުޅެދިން 59 މެޗުން 57 ގޯލު ޖަހައި 15 ގޯލު ޖަހަން ފުރުސަތު ތަނަވަސްކޮށްދީފަ އެވެ. ހާލަންޑް ވަނީ މިދިޔަ ސީޒަނުގައި ޑޯޓްމަންޑާ އެކު ޖަރުމަނު ކަޕް ކާމިޔާބުކޮށްފަ އެވެ.
