ނިކަމެތިންނަށް އެކަށީގެންވާ ބޯހިޔާވަހިކަމެއް ހޯދައި ދިނުމުގެ ބަދަލުގައި، ހުޅުމާލެއިން މުއްސަދިންނަށް ބިން ވިއްކަން އުޅުމަކީ ބަލައިގަނެވޭނެ ކަމެއް ނޫން ކަމަށާއި އެކަންކަން ރަނގަޅު ކުރުމަށް ކުރެވެން ހުރި މަސައްކަތެއް ކުރައްވާނެ ކަމަށް މާލޭގެ މޭޔަރު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
މުއިއްޒު "އަދަދު"އަށް ވިދާޅުވީ ސަރުކާރުން ގެދޮރުގެ މައްސަލަ ހައްލު ކުރަން އެކަށީގެންވާ މަސައްކަތެއް ކުރަމުން އަންނަ ކަމަށް ގަބޫލެއް ނުކުރެއްވޭ ކަމަށެވެ. އެއާއެކު، ބޮޑު އަގުގައި މުއްސަދިންނަށް ހުޅުމާލެއިން ބިން ވިއްކަން އުޅުމުން އެކަމުގައި ތަރުތީބު އޮޅިފައިވާ ކަން އެނގޭ ކަމަށް ވިދާޅުވި އެވެ.
"ބޮޑު އަގުގައި ބިން ވިއްކީމައި ޔަގީނުން ވެސް އެތަންތަން ނުލިބޭނެ ނިކަމެތިންނަކަށް. އެ ލިބޭނީ ވިޔަފާރިވެރިންނަށް މުއްސަދިންނަށް. ނިކަމެތިންނަށް ހައްލެއް ހޯދައިދީފައި ދެން އެކަމާ އުޅެންވީ. އެހެން ނޫނިއްޔާ އާދައިގެ ރައްޔިތުންނަށް މާބޮޑު އުއްމީދެއް ނެތް،" މުއިއްޒު ވިދާޅުވި އެވެ.
"ނިކަމެތިން ކައިރީގައި ބުނަނީ ނިމެނީއޭ. އަންނަނީއޭ. އެކަމަކު ދުވަހަކު ވެސް އެތަނެއް ނުއެއް ފެނޭ."
މުއިއްޒު "އަދަދު" އަށް ދެއްވި އިންޓަވިއޫއެއްގެ ތެރެއިން: ހުޅުމާލޭން މުއްސަދިންނަށް ބިން ވިއްކާތީ ކަންބޮޑުވުން ފާޅު ކުރެއްވި-- ފޮޓޯ: ހުސައިން ޝަޔާހު/ އަދަދު
މުއިއްޒު ވިދާޅުވި ގޮތުގައި ގޯތިދޫކޮށް ބޯހިޔާވަހިކަމުގެ އެކިއެކި މަޝްރޫތައް ހިންގާއިރު އިސްކަން ދޭން ޖެހޭނީ ނިކަމެތި ރައްޔިތުންނަށެވެ. އެކަން ކުރުމަށް ކުރެވެން ހުރި ހުރިހާ ކަމެއް ކުރާނެ ކަމަށް ވެސް މުއިއްޒު ވިދާޅުވި އެވެ.
"މިދެންނެވީކީ މަގުމައްޗަށް ނުކުންނަ ވާހަކައެއް ނޫން. ރީތި ގޮތުގައި ޕްރޮފެޝަނަލް ގޮތުގައި ކުރެވެން ހުރި ހުރިހާ މަސައްކަތެއް ކުރާނަން މާލޭ ރައްޔިތުންގެ ހައްގުގައި،" މުއިއްޒު ވިދާޅުވި އެވެ.
ހުޅުމާލެ ދެވަނަ ފިޔަވަހިން 400 ގޯތި ދޫކުރަން ރައީސް އަބްދުﷲ ޔާމީންގެ ވެރިކަމުގެ ފަހު ދުވަސްވަރު މުއިއްޒު ހައުސިން މިނިސްޓަރަކަށް ހުންނަވައިގެން މަސައްކަތް ކުރެއްވި އެވެ. އޭރު އެކަން ނުކުރެވުނީ އެންޓި ކޮރަޕްޝަން ކޮމިޝަން (އޭސީސީ) އިން އެކަން ހުއްޓުވައިގެންނެވެ.
އެކަމާ ގުޅޭގޮތުން ސުވާލު ކުރުމުން މުއިއްޒު ވިދާޅުވީ އޭރު މަސައްކަތް ކުރީ އަކަފޫޓެއް 300 ރުފިޔާ އާއި 400 ރުފިޔާއާ ދެމެދު އަގަކަށް ވިއްކުމަށް ކަމަށާއި އޭގެ ސަބަބުން އާދައިގެ ރައްޔިތުންނަށް ވެސް ބިން ގަތުމުގެ ފުރުސަތު އޮތް ކަމަށެވެ. ނަމަވެސް އެޗްޑީސީން މިހާރު މަސައްކަތް ކުރަނީ ބޮޑު އަގުގައި ބިން ވިއްކުމަށް ކަމަށް މުއިއްޒު ވިދާޅުވި އެވެ.
ހުޅުމާލެއަކީ ސިޓީ ކައުންސިލްގެ އިހުތިސޯސް ތެރޭގައި އޮތް ތަނަކަށް ވީނަމަވެސް އެއްވެސް ކަމެއްގައި އެޗްޑީސީން މަޝްވަރާ ނުކުރާ ކަމަށް ވެސް މުއިއްޒު ވިދާޅުވި އެވެ.
މުއިއްޒުގެ ކަންބޮޑުވުންތަކާ ގުޅޭގޮތުން އެޗްޑީސީގެ މެނޭޖިން ޑިރެކްޓާ ސުހައިލް އަހުމަދު "އަދަދު" އަށް ވިދާޅުވީ ހުޅުމާލޭ ދެވަނަ ފިޔަވަހީން ބިން ވިއްކުމަކީ އަބަދުވެސް ޕްލޭންގައި އޮތް ކަމެއް ކަމަށެވެ. ނަމަވެސް ބިން ވިއްކާނެ އަގުތަކާއި އިތުރު ކަންކަން ވެސް އަދި މުޅިން ފައިނަލް ނުވާ ކަމަށް ވިދާޅުވި އެވެ.
އެޗްޑީސީގެ މެނޭޖިން ޑިރެކްޓާ ސުހައިލް އަހުމަދު: ވިދާޅުވީ ހުޅުމާލޭން އެކި ފަންތީގެ މީހުންނަށް މަޝްރޫތައް ހިންގާ ކަމަށް-- ފޮޓޯ: ހުސައިން ވަހީދު/ އަދަދު
މުއްސަދިންނަށް ބިން ވިއްކަން އުޅެނީ ކަމަށް ކުރާ ތުހުމަތުތަކާ ގުޅިގެން ސުހައިލް ވިދާޅުވީ ހުޅުމާލޭގައި އެކި ފަންތީގެ މީހުންނަށް ބޯހިޔާވަހިކަމުގެ މަޝްރޫތައް ހިންގުމަށް ނިންމާފައިވާ ކަމަށެވެ.
"ސޯޝަލް ވެސް ވަކި ގިނަ ކަންކަން އެބަ ހިނގާ ދެއްތޯ؟ ހަމައެކަނި ގޯތި ވިއްކުމެއް ނޫން. ވަރަށް ފަހުން 1،000 ފްލެޓް އަޅަން ވެސް އަޅުގަނޑުމެން މި ބިންގާ އެޅީ. އެހެންވީމައި އެކި ފަންތީގެ ކަންކަން އެބަ ކުރިއަށް ދޭ،" ސުހައިލް ވިދާޅުވި އެވެ.
