އެންމެން ވަރަށް ހާލުގައި: ތަޅުދަނޑި ދިނަސް އުފަލެއް ނެތް!

ހިތްދަތި ދިރިއުޅުމުގެ ތެރެއިން ހަމަޖެހުމުގެ ނޭވާއެއްލާން ވީ ވަގުތެވެ؛ އަމިއްލަ ހިޔާވައްސަކަށް ކުރި ދިގު އިންތިޒާރެއްގެ ނިމުމެވެ. އެކަމަކު އެ އިހްސާސެއް އެ މީހުންނަކަށް ނުކުރެވެ އެވެ. އުފާވެރިކަމަށް ވުރެ ބޮޑަށް ވަށާލާފައި ވަނީ މާޔޫސްކަމެވެ.

މި ޖެއްސީ ކޮން ހާލެއް ހެއްޔެވެ؟ ކޮންކްރީޓް ވެއްޓެއްގެ ތެރެއަށް އަހަރެމެން ދޫކޮށްލުން މިއީ އިންސާފެއް ހެއްޔެވެ؟ ފްލެޓް ނިންމަންވީ އަމިއްލައަށެވެ!

ސިވިލް ސާވިސް ކެޓަގަރީން ހިޔާ ފްލެޓް ލިބުނު މައުމޫން އަލީ އާއި އެކަނިވެރި މައިންގެ ބައިން މަންމައަށް ލިބުނު ފްލެޓުގެ ކަންކަން ބަލަހައްޓަން ހުރި 19 އަހަރުގެ އަދުހަމް ހަސަންގެ އިތުރުން ދަފްތަރު ކެޓަގަރީގެ ފާތުމަތު ޝަބީނާގެ ވެސް ހުރީ މި ކަންބޮޑުވުމާއި ޝަކުވާތަކެވެ.

ހިޔާގެ އެޕާޓްމެންޓެއްގައި މީހަކު މިން އަޅަނީ: މިތަނުގައި މުށި ޖެހުމާއި ކުލަ ލުމާއި ދޮރުތަކާއި ދޮރުފަތް ހަރުކުރަން ޖެހެނީ ފްލެޓް ލިބޭ މީހާ އަމިއްލައަށް. -- ފޮޓޯ: ހުސެއިން ޝަޔާހް/ އަދަދު

ކުރީގެ ސަރުކާރުގައި ހުޅުވާލި ހިޔާ ފްލެޓްތައް ހަވާލުނުކޮށް ދިގު ދެންމުމެވެ. ކުރީގެ ލިސްޓަށް ލިބޭނެތޯ، ނޫންތޯ ކަނޑަނޭޅި ދުވަސްތަކެއް ދިއުމެވެ. މި މަޝްރޫއުގައި ކުރީގެ ސަރުކާރަށް އަމާޒުކުރި ފާޑުކިއުންތަކަށް ފަހު މި ވެރިކަމުގައި ލުޔެއް ހޯދައިދޭނެ ކަމަށް ދިން އުއްމީދުތަކުގައި ވެސް ކުލަ ނުޖެހުމެވެ. އެއާއެކު ކޮވިޑުގެ ދަތިކަމުގައި، ދިރިއުޅުމުގެ ހާލަތު އެންމެ ނިކަމެތިވި ވަގުތު އެ ތަންތަން ހަވާލުކުރަން ނިންމުމުން އެ މީހުންގެ ހިތްހަމަނުޖެހުންތަކެއް އެބަހުއްޓެވެ. އެތަނުގައި ހަމަޖެހިގެން ދިރިއުޅެން ފެށޭނެ ދުވަހެއް އަންދާޒާކޮށްލަން ވެސް އެ މީހުންނަށް ނޭނގޭތީ އެވެ.

އަންނަ މަހުގެ 14 ގައި ތަޅުދަނޑި ހަވާލުކުރަން ފެށިޔަސް ހިޔާގެ ޓަވަރުތައް ހުރީ ދިރިއުޅުން ފެށޭ ހާލަތެއްގައެއް ނޫނެވެ. ދެ ކޮޓަރީގެ އެޕާޓްމެންޓްތަކުގައި ޓައިލްސް ޖެހުމާއި ކޮޓަރިތަކާއި ފާހާނާގެ ދޮރުތަކާއި ކިޗަން ކެބިނެޓާއި ބޮކިތަކާއި ފަންކާތައް ހަރުކުރަން ޖެހެނީ އަމިއްލައަށެވެ. ފާރުތަކުގައި ކުލަލުން ވެސް އޮތީ އެވެ.

"އަތްމަތި ދަތި، ތިން މަހުން ތަނެއް ނުނިންމޭނެ"

ފިނިޝިންއަށް ތިން މަސް ދޭން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން އޮތީ ނިންމައިފަ އެވެ. އެކަމަކު އެންމެ ބޮޑު ކަންބޮޑުވުމަކީ އެ ހޭދަކުރެވޭވަރަށް ވުރެ އަތްމަތި ދަތިވެފައި ވުމެވެ.

"އަތުގައި ނެތް އެއްވެސް އެއްޗެއް. ކުރިން ވެސް ކުއްޔާއި ހަރަދުތައް ހަމަޖެއްސެނީ ކިރިޔާ. ކަރަންޓް ބިލް ނުދައްކައި އުޅެނީ ބައެއް މަސް މަހު. ކޮވިޑުގައި ފިރިމީހާގެ ވަޒީފާ ގެއްލި އަތްމަތި ދަތިވި ގޮތަށް ވަރަށް ހާލުގައި މިއުޅެނީ،" ޝަބީނާ ކިޔައިދިނެވެ.

ތިން ކުދިންގެ ހަރަދު ބަލަހައްޓަމުން އައީ ރިސޯޓު ވަޒީފާގައި އުޅޭ ފިރިމީހާއަށް ލިބޭ 750 ޑޮލަރު (11،565ރ.) އިންނެވެ. ކޮވިޑާ ހެދި ދުވަސްކޮޅަކަށް މުސާރަ ނުދޭގޮތަށް ފިރިމީހާ މާލެ ފޮނުވާލުންވީ ވަރަށް ބޮޑު ހިތްދަތި ކަމަކަށެވެ. އެކަމަކު ރިސޯޓުން އޭނާގެ ވަޒީފާ އިޔާދަކޮށް، އެނބުރި ދިޔަ ފަހުން އަށް މަސްވި އިރު ވެސް ދަރިންގެ ގާތަށް އާދެވޭނެ ގޮތެއް ނެތެވެ.

"އެހެންވިޔަސް ކެތްކޮށްލައިގެން މި ތިބެނީ އަމިއްލަ ހިޔާވަހިކަމަކަށް ވަދެވުނީމަ ރަނގަޅުވާނެ ކަމަށް ބަލައިގެން. މިހާރު ކަންދިމާވެފައި މިއޮތް ގޮތުން ފުރަތަމަ އެތަނަށް ވަދެވޭނެ ގޮތެއް ނެތް. ނުވިސްނޭ ފިނިޝިން ނިންމާނެ ގޮތެއް. އަނެއްކޮޅުން ހީކޮށްގެން ތިބި ވަރަށް ވުރެ ކުލި ބޮޑުވެފައި، މުޅި ފްލެޓަށް ދައްކަން ޖެހޭ އަގު ވެސް ބޮޑުވެއްޖެ،"

ހިޔާގެ ޓަވަރެއް: ދެ ވަނަ ފިޔަވަހީގައި 25 ބުރީގެ 16 ޓަވަރު އިމާރާތްކޮށްފައިވާ އިރު ފިނިޝިންއަށް މިހާރު ކަނޑައަޅާފައި ވަނީ ތިން މަސް ދުވަސް. -- ފޮޓޯ: ހުސެއިން ޝަޔާހް/ އަދަދު

ދެ ސަރުކާރުގެ އަރައިރުން ބޮޑުވި ހިސާބުތައް ހަދައި ނިންމި އިރު، ޖުމްލަ އަގު ދެ މިލިއަނަށް އަރާ ދެ ކޮޓަރީގެ ފްލެޓްތަކުގެ މަހު ކުލި ބޮޑުވުމުގެ ހާސްކަން އޮތީ ޝަބީނާއަށް އެކަންޏެއް ނޫނެވެ.

ޒުވާން އަދުހަމް ވެސް ހުރީ މަންމަ އެ ފްލެޓަށް ވައްދާނެ ގޮތަކާއި މިހާރު ކަނޑައަޅާފައިވާ މަހު ކުލި ދައްކަން ފަށާނެ ގޮތެއްގެ ހާސްކަމުގަ އެވެ.

ކުރީގެ ސަރުކާރުގައި މަންމައަށް ފްލެޓް ލިބުނުއިރު، އެއްބަނޑުއެއްބަފާ ދެބެއިންނާ އެކު އަދުހަމްގެ އާއިލާ އުޅުނީ މާލޭގައި ދިރިއުޅެން އެކަށީގެންވާ ތަނެއް ކުއްޔަށް ހިފައިގެންނެވެ. މަންމަގެ ޝަރުތު ހަމަވެ ފްލެޓް ލިބުމާ އެކު އެތަން ދޫކޮށްލައި އެއް ކޮޓަރީގެ ތަނަކަށް ބަދަލުވީ ފައިސާ ރައްކާކުރާށެވެ. އެއީ، ހިޔާ ފްލެޓަށް ބަދަލުވެ އަވަހަށް ތަނުގެ އަގު ދައްކައި ނިންމާށެވެ.

"އެކަމަކު ވަކި ހިސާބަކުން ވާނުވާއެއް ނޭނގުނީ. ތާރީހުތަކެއް ދީފައި ފްލެޓެއް ހަވާލެއް ނުކުރި. އެހެން ދުވަސްތައް ދިގުލައިގެންދާން ފެށީމަ އަހަރެން މާލޭގައި މަޑުކޮށްފައި މަންމައަށް ޖެހުނީ ރަށަށް ބަދަލުވާން،" އަދުހަމް ބުންޏެވެ.

ރައްކާކުރެވުނު ފައިސާކޮޅު ވެސް ކުއްޔަށް ހުސްކޮށް، ކޮވިޑާ ހެދި ކުލި ނުދެއްކިގެން އަދުހަމަށް ވެސް ޖެހުނީ ތަން ދޫކޮށްލާފައި މާލެއިން ފައިބާށެވެ. އެންމެ ދުވަހެއް ވެސް ބޭކާރުނުކޮށް އޭނާ މަސައްކަތް ކުރަމުން އަންނަނީ ކޮވިޑުގައި މި ދިމާވި ނަފްސާނީ އަދި މާލީ ދަތިކަމުން އަރައިގަތުމަށެވެ.

"ކުއްލިއަކަށް ދެން މި ބުނަނީ މިވެނި ވަރެކޭ ހިޔާގެ އަގަކީ. ފިނިޝިން ނިންމާށޭ އަމިއްލައަށް، މިއީކީ ފެއާގޮތެއް ކަމަކަށް ގަބޫލެއް ނުކުރެވޭ. ކިހިނެއް ފައިސާ ހޯދަނީ؟" އަދުހަމް ސުވާލުކުރި އެެވެ.

ފްލެޓަށް ވަދެވޭނެ ގޮތެއް ނެތުމުގެ އިތުރަށް އޭނާއަށް ލިބޭ 7،000ރ. އިން ހިޔާގެ ކުއްޔެއް ނުދެއްކޭނެ އެވެ. މެއިންޓަނަންސް ފީީއާ އެކު މަހު ކުއްޔަކީ 8،500ރ. އެވެ.

"ހަމައެކަނި ނިދާލެވޭވަރު ކުރަން، އެތަނަށް އެބަ ހޭދަވޭ މަދުވެގެން 60،000 ރުފިޔާ. އެކަން ކުރަން އިތުރު ދަރަންޏެއް ބޮލުގައި އަޅާނީ ކިހިނެއް؟ ފަގީރުން ހައްތަހާ ފަގީރުވާ ގޮތަށް މިއޮތީ،" އޭނާ ބުންޏެވެ.

މާލޭގެ ގެތަކުގެ ބަދިގޭގައި ނިދައި، މިސްކިތްތަކުގައި ކިޔަވައި، މީހުންނަށް ފެން އުފުލައިދިނުން ފަދަ ބުރަ މަސައްކަތުން އަމިއްލަ ދިރިއުޅުމަކާ ހިސާބަށް އާދެވި ސަރުކާރުގެ ހިދުމަތުގައި ދެމިހުރި މައުމޫން، ބޯހިޔާވަހިކަމަށް ކުރި އުއްމީދަކީ "ތޮށިގަނޑެއް" ލިބުމެއް ނޫނެވެ. ހުޅުމާލެ 1997 ގައި ހިއްކަން ފެށުމާއެކު އުއްމީދަކަށް ވީ ދިރިއުޅެން ނޫނީ މަރުވާން އޮންނަން ވެސް ތަންކޮޅެއް ލިބުމެވެ.

ވަޒީފާ އިން އޭނާއަށް ލިބުނުހާ ފައިސާއެއް މިހާތަނަށް ހޭދަކުރީ ބަދަލުވާ ތަންތަނުގެ ކުއްޔާއި އެޑްވާންސަށެވެ. ލައްކަ ލަނޑު ވެސް އޭނާއަށް ލިބިއްޖެ އެވެ. އެޑްވާންސްގެ ގޮތުގައި އޭނާގެ އަތުން ނަގައި މިހާތަނަށް ނުލިބި ވެސް 128،000ރ. އެކި މީހުންގެ އަތުގައި އެބަހުއްޓެވެ.

ސަރުކާރުތަކުން ހިންގި ބޯހިޔާވަހިކަމުގެ މަޝްރޫއުތަކުގައި މިހާތަނަށް ފްލެޓް ދީފައި ހުރީ ދިރިއުޅެވޭވަރުކޮށްފަ އެވެ. މައުމޫން އުއްމީދުކޮށްގެން ހުރީ މި މަޝްރޫއުގައި ވެސް އެހެން ހަދާނެ ކަމަށެވެ. އެކަމަކު ފިނިޝިން ނުނިންމައި ހަވާލުކުރަން މި ސަރުކާރުން ނިންމިކަން އިއުލާންކުރުމާ އެކު ނޯޓު ފޮތެއް ހިފައިގެން އޭނާ މާލޭގެ ގިނަ ފިހާރަތަކަށް ހިނގައިފި އެވެ.

"ތޮށިގަނޑޭ ލިބެނީ، އެތަނަށް ވަންނަން އަމިއްލައަށް ކުރެވުނު ކަމެއް ކުރާށޭ ބުނި ހިސާބުން ބެލިއިރު ވެސް ލައްކައެއްހާ ރުފިޔާ އިން ވެސް އެތަނަކަށް ވަދެވޭކަށެއް ހަމަ ނެތް. އެއީ އެންމެ އަގު ދަށްކޮށް އާދައިގެ މުށި ޖެހީމަ ވެސް ވާވަރު،" މައުމޫން ބުންޏެވެ.

ހިޔާ ފްލެޓްތައް ބަލާލަން ކުރި ޒިޔާރަތުގައި ދެ މީހަކު ފްލެޓެއްގެ ކައިރީގައި މަޑުކޮށްލައިގެން. -- ފޮޓޯ: ހުސެއިން ޝަޔާހް/ އަދަދު

އަގު ދައްކައި ނިމުމުން ދާއިމީ ހިޔާވައްސަކަށް ވާނެތީ ރަނގަޅު ފެންވަރަކަށް ހަދަން އެންމެން އުއްމީދުކުރާނެ އެވެ. އެ ވިސްނުމުގައި، ވެސް އޭނާގެ އަންދާޒާއަކީ ފަރުނީޗަރާ އެކު ތަން ނިންމަން 300،000ރ. ހޭދަވާނެ އެވެ. ފައިސާ ދައްކައިި ނިމުމުން އަމިއްލައަށް މިލްކުވާ ތަނެއް އެހާ އާދައިގެ ގޮތަކަށް ދޫކޮށްލަން ބޭނުމެއް ވެސް ނުވެ އެވެ.

އަނެއް ކަންބޮޑުވުމަކީ، އަބަދުވެސް ކޮންމެވެސް ބަޔަކު ކޮންކްރީޓް މަސައްކަތްކޮށް، އެތަންތަން ނިންމަން ދިގު މުއްދަތެއް ހޭދަވުމެވެ. މައުމޫންގެ ތިން ކުދިންނާ އެކު އެތަނަށް ބަދަލުވާއިރު، އަބަދު ކޮންކްރީޓް މަސައްކަތް ކުރާ ތަނެއްގެ ގޮތުގައި އޮންނާކަށް ވެސް ބޭނުމެއް ނުވެ އެވެ. އެކަމަކު އެއްފަހަރާ އެތައް ހާސް ބަޔަކު ޖަމާވާ ތަނެއް މި ހަވާލުކުރަނީ އެ މީހަކަށް ކުރެވެން އޮތް ދުވަހެއްގައި ކޮންކްރީޓް މަސައްކަތް ކުރާގޮތަށެވެ.

އެޗްޑީސީން ކަނޑައަޅާ ތިން މަސް ތެރޭގައި، ފިނިޝިން ނިންމޭހާ އެންމެންގެ ހާލަތު ރަނގަޅެއް ނޫން ކަން އެނގެނީ، ހިޔާ ލިބުނު ބައެއް މީހުންގެ އެކުވުމުން އިވޭ އަޑުތަކާއި ފާޅުކުރާ ޝުއޫރުތަކުން ކަމަށް މައުމޫން ބުންޏެވެ.

ކުންފުނިތަކުގެ އަގު: މަދުވެގެން ލައްކައެއް ހޭދަވާނެ!

ކޮންސްޓްރަކްޝަން ބައެއް ކުންފުނިތަކުން ބުނީ ހިޔާ އެޕާޓްމެންޓެއްގެ ފިނިޝިން އެންމެ އާދައިގެ ގޮތަކަށް ނިންމަން ވެސް މަދުވެގެން ލައްކައެއްހާ ރުފިޔާ ހޭދަވާނެ ކަމަށެވެ. އެތަނަށް ހާއްސަކޮށްގެން ބައެއް ކުންފުނިތަކުން މިހާރު ވަނީ ޕެކޭޖްތައް ހަދައިފަ އެވެ. އަގުތައް އުޅެނީ 35،000ރ. އިން ފެށިގެން 300،000ރ. އާ ދެމެދުގަ އެވެ.

ރެއިންބޯގެ އިން ހަތަރު ޕެކޭޖެއް ތައާރަފްކުރަން ނިންމާފައިވާއިރު، އަގު ފެށެނީ 35،000ރ. އިންނެވެ.

އެތަނުގެ މާކެޓިން އެންޑް ސޭލްސް، ޒިޔާދު ވިދާޅުވީ ޕެކޭޖުތަކުގައި، ތަށިމުށި ޖެހުމާއި ކުލަ ލުމާއި ދޮރު ހަރުކުރުމާއި ފަންކާ އާއި ލައިޓު ހަރުކުރުން ފަދަ ހުރިހާ މަސައްކަތެއް ވެސް އެ ކުންފުނިން ކޮށްދޭނެ ކަމަށެވެ. އެކަމަކު އެއީ ވަކި އަދަދަކަށެވެ. ހިޔާގެ 16 ޓަވަރުގައި 6250 އެޕާޓްމަންޓް ހުރިއިރު، ބޮޑު ބަޔަކަށް އެކަން ކޮށްދިނުމުގެ ކެޕޭސިޓީއެއް އެހެން ކުންފުނިތަކެކޭ އެއްގޮތަށް ކުންފުނީގައި ވެސް ނެތް ކަމަށް އޭނާ ވިދާޅުވި އެވެ.

އާދައިގެ ފަރުނީޗަރާ އެކު 200،000ރ.ގެ ޕެކޭޖްތަައް ހުރިއިރު، ރަނގަޅު ކޮލިޓީގައި ފިނިޝިން ނިންމަން ގިނަ ކުންފުނިތަކުގެ އަގު އުޅެނީ 250،000-300،000ރ އާ ދެމެދުގަ އެވެ.

ކުރީގެ ސަރުކާރުން މިތަންތަން ހަވާލުކުރަން އެއްބަސްވެފައި އޮތީ، ފިނިޝިން ނުނިންމައި ކަމަށް ބުނެ މި ސަރުކާރުން 45 މިލިއަން ޑޮލަރު (695 މިލިއަން ރުފިޔާ)ގެ ލޯނެއް ނަގައިގެން އެކަން ކުރަން އުޅުނެވެ. އެކަމަކު ކޮވިޑުގެ ބަލިމަޑުކަމާ ހެދި ކުރިމަތިވި ގޮންޖެހުންތަކާއި ލޯނު ނަގައިގެން މަސައްކަތް ނިންމަން އިތުރު މުއްދަތެއް ހޭދަވާނެތީ ސަރުކާރުން ވިސްނުން ބަދަލުކުރީ ކަމަށް ބުނެފައިވެ އެވެ.

ފްލެޓް އިމާރާތްކުރި ޗައިނާގެ ކުންފުނިން ފިނިޝިން ނިންމަން ހުށަހެޅީ، ޔުނިޓަކަށް 6،462 ޔޫއެސް ޑޮލަރު (99،644ރ.) އެވެ.

"ލުއި ގޮތެއް ހޯދައިދޭން ޖެހޭ"

ހިޔާގެ 25 ބުރީގެ 16 ޓަވަރުގެ ފިނިޝިން ނިންމުމުގެ ގާބިލްކަން ރާއްޖޭގެ އެއްވެސް ކުންފުންޏެއްގައި ނެތެވެ. މިކަން ކުރަން ކުންފުނިތަކަށް ޖެހޭނީ ބޭރުން ސާމާނު އެތެރެކުރާށެވެ. ކޮވިޑުގެ ހާލަތުގައި، މުދާ ގެނައުމުގައި ކުރިމަތިވަމުންދާ ތަކުލީފަށް ބަލާ ނަމަ، ދޮރާއި ދޮރުފަތާއި ތަށިމުއްޓާއި އެ ނޫން ވެސް ސާމާނު ބޭރަށް އޯޑަރުކޮށްގެން ގެންނަން ވެސް މަަހަކަށް ވުރެން ގިނަ ދުވަސް ހޭދަވާނެ ކަމަށް ބެލެވެ އެވެ.

"މިވަރުގެ ކެޕޭސިޓީއެއް، ފައިނޭންސްގެ ގޮތުން ވެސް ސްޓޯރޭޖްގެ ގޮތުން ވެސް ކުންފުނިތަކުގައެއް ނުހުންނާނެ،" ކުންފުންޏެއްގެ އިސް ބޭފުޅަކު ވިދާޅުވި އެވެ.

އެހެންކަމުން ތިން މަހުގެ ތެރޭގައި އެކަށީގެންވާ އަދަދަކަށް ވެސް އެޕާޓްމަންޓުތަކުގެ ފިނިޝިން ނިންމުމަކީ ނުވާނެ ކަމެއް ކަމަށް ބައެއް ކުންފުނިތަކުން ބުންޏެވެ.

ހިޔާގެ ޓަވަރެއް: ޖުމްލަ 6،250 އެޕާޓްމަންޓުގެ ފިނިޝިން ތިން މަސް ތެރޭގައި ނިންމުމުގެ ގާބިލްކަމެއް ރާއްޖޭގެ ކުންފުނިތަކުގައި ނެތް ކަމަށް ބައެއް މީހުން ބުނޭ. -- ފޮޓޯ: ހުސެއިން ޝަޔާހް/ އަދަދު

އެކަމަކު ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އަހްމަދު ސުހެއިލް ދެކެވަޑައިގަންނަވާ ގޮތުގައި އެޕާޓްމަންޓުތަކުގެ ފިނިޝިން ނިންމަން ތިން މަސް ދުވަހަކީ އެކަށީގެންވާ މުއްދަތެކެވެ. އެއާއެކު ވެސް އެއްފަހަރާ ގިނަ ބަޔަކު އެއް މަސައްކަތެއް ކުރަން ޖެހުމުން ތަކެތީގެ ދަތިތަކެއް ދިމާވެދާނެކަން އޭނާ ވެސް ގަބޫލުކުރައްވަ އެވެ.

އެކަމުގައި ގޮންޖެހުންތަކެއް ދިމާވެއްޖެ ނަމަ، އެކަމާ މެދު ވިސްނަވާނެ ކަމުގެ ޔަގީންކަން، ހިޔާ ފްލެޓްތައް އާއްމުންނަށް ދައްކާލަން ފެށުމުގެ ގޮތުން މީޑިއާތަކަށް ދެއްވި އިންޓަވިއުގައި ދެއްވި އެވެ.

މިކަން މިހާރަށް ވުރެ ފަސޭހަ އިން ކުރެވިދާނެ ގޮތްތަކެއް އިމާރާތްކުރުމުގެ ދާއިރާގެ ބައެއް މީހުންގެ ވިސްނުމުގައި ގެންގުޅެ އެވެ.

އޭގެތެރޭގައި ސަރުކާރުގެ ކުންފުންޏެއް މެދުވެރިވެގެން ސާމާނު ރާއްޖެ އެތެރެކުރުމާއި 16 ޓަވަރުގެ މަސައްކަތް ނިންމަން ޓެންޑަރަށް ހުޅުވާލުން ވެސް ހިމެނެ އެވެ.

"މިހާރަށް ވުރެން ލުއި ގޮތެއް ހޯދުނީސް މިކަމުގައި،" ކުރިން ވާހަަކަ ދެއްކެވި އިމާރާތްކުރުމުގެ ދާއިރާގެ ބޭފުޅާ ވިދާޅުވި އެވެ.

އެކަށީގެންވާ ހައްލަކަށް ނުވިސްނައި މިހާރު އޮތް ގޮތަށް ދޫކޮށްލައިފި ނަމަ އެތަންތަނުގައި ހަމަޖެހިގެން މީހުންނަށް ދިރިއުޅެން ފެށޭނެ ދުވަހެއް އަންދާޒާއެއް ނުކުރެވެ އެވެ.

މައުމޫނާއި ޝަބީނާ އަދި އަދުހަމްގެ ވެސް އާދޭހަކީ އެ މީހުން ފަދަ ނިކަމެތި ރައްޔިތުންނާ މެދު ސަރުކާރުން އަދި އެއްފަހަރު ވިސްނާލުމެވެ. ތަޅުދަނޑި ދިނަސް އަމިއްލަ ހިޔާވަހިކަމުގެ ދޮރު އެ މީހުންނަށް އަދި "ބަންދު" ވެފައި އުފުލަން ޖެހޭ ތަކުލީފު ވެސް ބޮޑުކަމުންނެވެ.