ކޮވިޑުގައި އަންގާރަ ދުވަހުގެ ރޭ މަރުވި 10 އަހަރުގެ ކުއްޖާއަށް ފަރުވާ ދިނުން ލަސްވުމުގައި އިހުމާލު އޮތް ކަމަށް ހެލްތު މިނިސްޓްރީން ވެސް އެއްބަސްވެފައިވާއިރު، އެކަމާ ގުޅިގެން އިއްޔެ ނެރޭނެކަމަށް ބުނި ރިޕޯޓު ލަސްވަނީ އެ މައްސަލައިގައި ގިނަ މަސައްކަތްތަކެއް ކުރަމުންދާތީ ކަމަށް އެ މިނިސްޓްރީން ބުނެފި އެވެ.
ކޮވިޑު ޖެހިގެން ރާއްޖެއިން އެންމެ ފުރަތަމަ މަރުވި ކުޑަކުއްޖާ، ހދ. ކުޅުދުއްފުށީ، ލާޖަހާގޭ، ފާތިމަތު މިޝްކާ މުހައްމަދުގެ ފަރުވާގައި އިހުމާލުތަކެއް އާއިލާ އިން ދަނީ ދައްކަމުންނެވެ. ކުއްލިއަކަށް ހާލު ގޯސްވެ، ނޭފަތުން ލޭ އައިސް ނޭވާލާން އުނދަގޫވާތީ އެމްބިއުލާންސެއް ފޮނުވައިދިނުމަށް އެދި ހެލްތު ޕްރޮޓެކްޝަން އެޖެންސީގެ އެމަޖެންސީ ނަންބަރުގައި އެދުމުން އެމްބިއުލެންސް ފޮނުވީ ދެ ގަޑިއިރާ 10 މިނެޓު ފަހުން ކަމަށް އާއިލާ އިން ބުނެ އެވެ.
މިކަން ހިނގައިދިއުމުގައި އިހުމާލުތަކެއް ހުރި ކަމަށް ހެލްތު މިނިސްޓަރު މުހައްމަދު ނަސީމް ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވަނީ ވިދާޅުވެފަ އެވެ.
އެކަމާ ގުޅޭ ގޮތުން ހިންގި ތަހުގީގު ބުދަ ދުވަހުގެ ރޭގެ ދަންވަރު ނިންމައި، އިއްޔެ އާއްމުކުރާނެ ކަމަށް ވެސް ވިދާޅުވި އެވެ.
"އަދަދު"އަށް އެނގުނު ގޮތުގައި، އެ ރިޕޯޓުގައި ހުރި މައުލޫމާތުތައް ހިއްސާކުރަން އިއްޔެގެ ހަވީރު ނޫސްވެރިންގެ ބައްދަލުވުމެއް ބާއްވަން ވެސް ތައްޔާރުވި އެވެ.
ނަމަވެސް، އެކަމުގެ އެއްވެސް ހަބަރެއް ނުވެގެން ނޫސްވެރިންގެ އިތުރުން އާއްމުންގެ ގިނަ ބަޔަކު ވެސް ސުވާލު އުފައްދަމުން ދަނިކޮށް، މިއަދު ހެނދުނު ހެލްތު މިނިސްޓްރީން ކުރި ޓްވީޓެއްގައި ބުނީ މިޝްކާގެ މަރާ ގުޅިގެން ހަދަމުންގެންދާ ކޭސް ރިވިއުގެ ގިނަ މަސައްކަތްތަކެއް ކުރަމުން އަންނަ ކަމަށެވެ.
"މި މައްސަލައިގައި ގިނަކަންކަން ބަލަން ޖެހުމުން މިކަމަށް އިތުރު ވަގުތުނަގާ،" މިނިސްޓްރީން ބުންޏެވެ.
އަދި މަސައްކަތް ކުރަމުންމިދަނީ ވީއެންމެ އަވަހަށް މި މަސައްކަތް ނިންމުމަށް ކަމަށް އެ ޓްވީޓުގައި ބުނެފައިވެ އެވެ.
މިނިސްޓަރު ނަސީމް ނޫސްވެރިންގެ ބައްދަލުވުމުގައި ވިދާޅުވީ ތަހުގީގު ނިމުމުން ހުރިހާ މައުލޫމާތެއް އާއްމުކޮށް ފިޔަވަޅު އަޅަން ޖެހޭ މީހުންނާ މެދު ފިޔަވަޅު އަޅާނެ ކަމަށެވެ.
އާއިލާ އިން ބުނެފައިވާ ގޮތުގައި މިޝްކާގެ ހާލު ދެރަވުމުން ތަކުރާރުކޮށް ގުޅީ އެޗްޕީއޭގެ 1676 އަށެވެ. މެޑިކަލް ޓީމު ދާނެ ކަމުގެ ޔަގީންކަން ދިން ނަމަވެސް ގިނައިރުތަކެއް ވި އިރު ވެސް އެމްބިއުލެންސް ނުފޮނުވާ ކަމުގެ ޝަކުވާ އާއިލާ އިން ކުރެ އެވެ.
އިމާދުއްދީން ސްކޫލްގައި ކިޔަވާ މިޝްކާ ކޮވިޑަށް ޕޮޒިޓިވްވީ މީގެ ހަފުތާއެއްހާ ދުވަަސްކުރިންނެވެ. އޭނާގެ އިތުރުން މަންމަ އާއި ބައްޕަ ވެސް ތިބީ ކޮވިޑަށް ޕޮޒިޓިވްވެ ކަރަންޓީންގަ އެވެ.
މިޝްކާގެ މަރުގައި އިހުމާލެއްވޭތޯ ހިއުމަން ރައިޓްސް ކޮމިޝަން (އެޗްއާރުސީއެމް) އިން ވެސް ތަހުގީގު ކުރަމުން އަންނައިރު، ރައްޔިތުންގެ މަޖިލީހުގެ ކަމާ ގުޅޭ ކޮމިޓީން ވެސް ވަނީ އެ މައްސަލަ ބަލަން ނިންމައިފަ އެވެ.
