ކޮވިޑުގެ މިހާލަތުގައި ސަރުކާރުގެ އިހުމާލުން މީހުން މަރުވަމުންދާކަމަށް ތުހުމަތުކޮށް، އެ މައްސަލަތައް ތަހުގީގުކޮށް އަދަބު ދިނުމަށް އިދިކޮޅު ކޯލިޝަނުން މިއަދު ގޮވާލައިފި އެވެ.
ކޮވިޑު ޖެހިގެން ރޭ މަރުވި 10 އަހަރުގެ ކުއްޖާއަށް ފަރުވާ ދިނުން ލަސްވި ކަމަށް ކުރާ ތުހުމަތާ ގުޅިގެން އިދިކޮޅު ކޯލިޝަނުން މިއަދު ނެރުނު ބަޔާނުގައި ވަނީ ބޮޑެތި ތުހުމަތުތަކެއް ކޮށްފަ އެވެ.
ކޮވިޑު ޖެހިގެން ރާއްޖެއިން އެންމެ ފުރަތަމަ މަރުވި ކުޑަކުއްޖާ، ހދ. ކުޅުދުއްފުށީ، ލާޖަހާގޭ، ފާތިމަތު މިޝްކާ މުހައްމަދުގެ ފަރުވާގައި އިހުމާލުތަކެއް އާއިލާ އިން ދަނީ ދައްކަމުންނެވެ.
ކުއްލިއަކަށް ހާލު ގޯސްވެ، ނޭފަތުން ލޭ އައިސް ނޭވާލާން އުނދަގޫވާތީ އެމްބިއުލަންސެއް ފޮނުވައިދިނުމަށް އެދި ހެލްތު ޕްރޮޓެކްޝަން އެޖެންސީގެ އެމަޖެންސީ ނަންބަރުގައި އެދުމުން އެމްބިއުލެންސް ފޮނުވީ ދެ ގަޑިއިރަށް ވުރެ ގިނަ އިރުވި ފަހުން ކަމަށް އާއިލާ އިން ބުނެ އެވެ.
އެކަމާ ގުޅިގެން، ޕީޕީއެމް/ޕީއެންސީ ކޯލިޝަނުން ނެރުނު ބަޔާނުގައި ބުނީ ކޮވިޑް މެނޭޖުކުރުމުގައި ސަރުކާރު ފެއިލްވެ، ހެލްތު މިނިސްޓްރީ އާއި އެ މިނިސްޓްރީގެ ދަށުން މަސައްކަތް ކުރާ މުއައްސަސާތަކުގެ އިހުމާލުން އެތައް ބައެއް މަރުވުމަކީ ބަލައިގަނެވޭނެ ކަމެއް ނޫން ކަމަށެވެ.
އެއާއެކު ހެލްތު މިނިސްޓަރު އަހުމަދު ނަސީމު މިހާރުން މިހާރަށް އިސްތިއުފާ ދިނުމަށް ވެސް ވަނީ ގޮވާލައިފަ އެވެ.
ރޭގެ މަރާ ގުޅިގެން މިނިސްޓަރު މައާފަށް އެދިވަޑައިގެންފައިވާއިރު، ބަޔާނުގައި ބުނީ ފުރާނައެއް ގެއްލިގެން ދިއުމުން މައާފަށް އެދި ނިންމާލުމަކީ ބަލައި ގަނެވޭނެ ކަމެއް ނޫން ކަމަށެވެ.
"މިފަދަ މައްސަލަތައް އިންސާފުވެރިކަމާއެކު ވީ އެންމެ އަވަހަށް ތަހުގީގުކޮށް މިކަމުގައި އިހުމާލުވާ ފަރާތްތަކަށް ހައްގު އަދަބު ދިނުމަށް މި ކޯލިޝަނުން ހަރުއަޑުން ގޮވާލަން،" ބަޔާނުގައިވެ އެވެ.
ބަޔާނުގައި ބުނެފައިވަނީ ކޮވިޑް ކޮންޓްރޯލް ކުރުމަށް ސަރުކާރުން 3.5 ބިލިއަނަށް ވުރެ ގިނަ ރުފިޔާ ހަރަދު ކޮށްފައިވާއިރު އެ ފައިސާ ހޭދަ ކޮށްފައިވަނީ ރައްޔިތުންނަށް ފައިދާވާ ގޮތަކަށް ނޫން ކަމަށެވެ.
ކޮވިޑް ފެސިލިޓީތަކާއި ޓެސްޓް ކުރެވޭނެ ނިޒާމާއި އިތުރު ވަސީލަތްތައް އެންމެ ނުރައްކާތެރި ހާލަތަށް ރިއާޔަތްކޮށް ގާއިމް ކުރެވިފައި ނުވެ އެވެ.،-- ބަޔާން
ކޮވިޑް ކޮންޓްރޯލް ކުރުމުގައި މުޅި ސަރުކާރު ފެއިލް ވެފައިވާ ކަމަށް ވެސް ބަޔާނުގައި ބުނެފައިވެ އެވެ. އަދި ކޮވިޑް މެނޭޖު ކުރުމުގެ ކަންކަން ހަރުދަނާ ކުރުމަށް ރައީސް އިބްރާހިމް މުހައްމަދު ސޯލިހަށް އެ ކޯލިޝަނުން ގޮވައިލި އެވެ.
ކުޑަކުއްޖާ މަރުވި ހާދިސާގައި އިހުމާލުވާ ކަމަށް ތުހުމަތު ކުރާތީ ހެލްތު މިނިސްޓްރީންނާއި ހިއުމަން ރައިޓްސް ކޮމިޝަނުން އެ މައްސަލަ ވަނީ ބަލަން ފަށައިފަ އެވެ.
ކޮވިޑް ރާއްޖޭގައި ފެތުރުން އިތުރުވެ ބަލީގައި މަރުވާ މީހުންގެ އަދަދު ވަނީ އިތުރުވާން ފަށައިފަ އެވެ.
