ކޮވިޑު ޖެހި ރޭ މަރުވި 10 އަހަރުގެ ކުއްޖާއަށް ފަރުވާ ދިނުން ލަސްވި ކަމަށް ކުރާ ތުހުމަތާ ގުޅިގެން އެ މައްސަލަ ކުށްވެރިކޮށް، އެ ތަހުގީގުގެ ތެރެއަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ވެސް ވަދެއްޖެ އެވެ.
ކޮވިޑު ޖެހިގެން ރާއްޖެއިން އެންމެ ފުރަތަމަ މަރުވި، ހދ. ކުޅުދުއްފުށީ، ލާޖަހާގޭ، ފާތިމަތު މިޝްކާ މުހައްމަދުގެ ފަރުވާގައި އިހުމާލުތަކެއް އާއިލާ އިން ދަނީ ދައްކަމުންނެވެ. ކުއްލިއަކަށް ހާލު ގޯސްވެ، ނޭފަތުން ލޭ އައިސް ނޭވާލާން އުނދަގޫވާތީ އެމްބިއުލާންސެއް ފޮނުވައިދިނުމަށް އެދި ހެލްތު ޕްރޮޓެކްޝަން އެޖެންސީގެ އެމަޖެންސީ ނަންބަރުގައި އެދުމުން އެމްބިއުލެންސް ފޮނުވީ ދެ ގަޑިއިރާ 10 މިނެޓު ފަހުން ކަމަށް އާއިލާ އިން ބުނެ އެވެ.
އެމްބިއުލެންސް ފޮނުވި ވަގުތުގެ މައްސަލަ ބަލަން ފަށައި، ކުރިން އަމަލުކުރަމުން އަންނަ ގޮތަށް ބަދަލުތަކެއް ގެނެސްފައިވާ ކަމަށް ހެލްތު މިނިސްޓްރީން މިއަދު ބުނެފައިވެ އެވެ.
އެޗްއާރުސީއެމުން ބުނީ "ބަލި މީހާ އަށް ލިބެން ޖެހޭ ހިދުމަތް އަވަސްމިނެއްގައި ފޯރުކޮށްނުދެވިގެން ފުރާނައެއް ނެތިދިއުން" ކުށްވެރިކުރާ ކަމަށެވެ. އެ ކޮމިޝަނުން އިލްތިމާސްކުރީ ކޮވިޑް-19ގެ ހާލަތުގައި ސިއްހީ ފަރާތްތަކުން ދޭންޖެހޭ ފަރުވާ ވީހާވެސް އަވަހަކަށް ފޯރުކޮށްދެވޭނެ ގޮތްތަކެއް ހަމަޖެއްސުމަށެވެ.
އާއިލާ އިން ބުނެފައިވާ ގޮތުގައި މިޝްކާގެ ހާލު ދެރަވުމުން ތަކުރާރުކޮށް ގުޅީ އެޗްޕީއޭގެ 1676 އަށެވެ. މެޑިކަލް ޓީމު ދާނެ ކަމުގެ ޔަގީންކަން ދިން ނަމަވެސް ގިނައިރުތަކެއް ވި އިރު ވެސް އެމްބިއުލެންސް ނުފޮނުވާ ކަމުގެ ޝަކުވާ އާއިލާ އިން ކުރެ އެވެ.
އިމާދުއްދީން ސްކޫލްގައި ކިޔަވާ މިޝްކާ ކޮވިޑަށް ޕޮޒިޓިވްވީ މީގެ ހަފުތާއެއްހާ ދުވަަސްކުރިންނެވެ. އޭނާގެ އިތުރުން މަންމަ އާއި ބައްޕަ ވެސް ތިބީ ކޮވިޑަށް ޕޮޒިޓިވްވެ ކަރަންޓީންގަ އެވެ.
ކޮވިޑުގައި ކުޑަ ކުއްޖަކު މަރުވިއިރު ރާއްޖޭގެ މިހާރުގެ ހާލަތުން ގިނަ އަދަދެއްގެ ކުޑަކުދިންނަށް މި ބަލި ޖެހި ބޮޑުވަރުވަމުންދާ ކަމުގެ ކަންބޮޑުވުން ޑޮކްޓަރުންގެ އެބައޮތެވެ.
