ޕެރިސް (މެއި 29) - ޕީއެސްޖީގެ ކޯޗުކަން ދޫކޮށްލައި މައުރީސިއޯ ޕޮޗެޓީނޯ އޭނާގެ ކުރީގެ ކްލަބް ޓޮޓެންހަމް ހޮޓްސްޕާސްއާ ގުޅެން ނިންމައިފިނަމަ ޕީއެސްޖީގެ ކޯޗަކަށް ޒިނެދިން ޒިދާން ގެންނަން އެ ކްލަބުން މަސައްކަތް ކުރަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ސްކައި ސްޕޯޓްސް އިން ރިޕޯޓްކުރާ ގޮތުގައި ޓޮޓެންހަމް ކޯޗުކަމުން 2019 ވަަަނަ އަހަރުގެ ނޮވެމްބަރު މަހު ވަކިކުރި ޕޮޗެޓީނޯ އަންނަނީ އަލުން އެ ޓީމާ ހަވާލުވާން މަޝްވަރާ ކުރަމުންނެވެ. އަދި ޓޮޓެންހަމުން ވެސް އަންނަނީ ޕީއެސްޖީއާ އެކު ޕޮޗެޓީނޯ ހަދާފައިވާ އެއްބަސްވުން އުވާލެވޭނެ ގޮތަކާ މެދު އެ ކްލަބާ ވާހަކަ ދައްކަމުން ކަމަށް މީޑިއާ ރިޕޯޓްތައް ބުނެ އެވެ.
މިދިޔަ ޖެނުއަރީ މަހު ޕޮޗެޓީނޯ ޕީއެސްޖީއާ އެކު ސޮއިކުރީ ދެ އަހަރުގެ ކޮންޓްރެކްޓެއްގަ އެެވެ. އެ އެއްބަސްވުމުގެ ވަކި މާއްދާތަކަކަށް ބަލައި ކޮންޓްރެކްޓް އުވާލެވޭ ގޮތެއް އޮވެ އެވެ. ޕޮޗެޓީނޯ އަށް މި ފަހަރު ޕީއެސްޖީއާ އެކު ކާމިޔާބުކުރެވުނީ ދެ ކަޕް މުބާރާތެވެ. ލީގު ދިފާއުކުރަން ކުރި މަސައްކަތް ކާމިޔާބުނުވި އެވެ. ފްރާންސްގެ ޗެމްޕިއަންކަން ހޯދީ ލިލް އިންނެވެ.
ފްރާންސް ލީގުގެ ތަށި ޕީއެސްޖީ އަށް ގެއްލުމުން އެ ކްލަބްގެ ބޯޑު މެމްބަރުންގެ މެދުގައި ޕޮޗެޓީނޯ މަގާމުން ދުރުކުރަން މަޝްވަރާ ކުރެވުނު ކަމަށް ފްރާންސްގެ ބައެއް މީޑިއާތަކުން ރިޕޯޓްކޮށްފައިވެ އެވެ.
އިނގިރޭސި ނޫހެއް ކަމަށްވާ ދި ޓެލެގްރާފުން ރިޕޯޓްކުރާ ގޮތުގައި ޕޮޗެޓީނޯ ގޮސްފިނަމަ ޕީއެސްޖީގެ އެއް ވަނަ ޓާގެޓަކީ ޒިދާން އެވެ. މި ސީޒަނަށް ފަހު ޒިދާން ވަނީ ރެއާލް މެޑްރިޑްގެ ކޮންޓްރެކްޓްގައި ބާކީ އެއް އަހަރު އޮއްވައި އެ ޓީމުގެ ކޯޗުކަން ދޫކޮށްލައިފަ އެވެ.
ބޮޑު ހަރަދުތަކެއްކޮށް ޕީއެސްޖީން ޗެމްޕިއަންސް ލީގު ހޯދަން ކުރާ މަސައްކަތުގައި އެ ޓީމަށް ބޭނުންވަނީ އެ މުބާރާތުގައި ފާހަގަކޮށްލެވޭ ކާމިޔާބެއް ހޯދާފައިވާ ކޯޗެކެވެ. ޒިދާން ވަނީ ރެއާލާ އެކު ޖެހިޖެހިގެން ތިން އަހަރު ޗެމްޕިއަންސް ލީގު ކާމިޔާބުކޮށްފަ އެވެ.
އަނެއްކޮޅުން ޕީއެސްޖީން އެ ޓީމުގެ ތަރި ކީިލިއަން އެމްބާޕޭ ކްލަބްގައި ބަހައްޓަން ކުރާ މަސައްކަތުގައި ވެސް އެންމެ ފައިދާ ބޮޑު ގޮތަކީ ޒިދާނާ އެ ޓީމު ހަވާލުކުރުމެވެ. ޕީއެސްޖީން އަންނަނީ އެ ޓީމު ވަރުގަދަ ކުރުމުގެ ގޮތުން ރެއާލްގެ ޑިފެންޑަރު ސާޖިއޯ ރާމޯސް ގެންނަން ވެސް މަސައްކަތް ކުރަމުންނެވެ.
ޒިދާން އޭނާގެ ކޯޗިން ކެރިއަރުގައި މިހާތަނަށް ފެނުނީ ރެއާލުން އެކަންޏެވެ. އެންމެ ފުރަތަމަ 2014 އިން 2016 އަށް ކޯޗުކޮށްދިނީ ރެއާލް ބީ ޓީމަށެވެ. އޭގެ ފަހުން 2016 ވަނަ އަހަރު ރެއާލްގެ ސީނިއާ ޓީމުގެ ހެޑް ކޯޗުކަމާ ހަވާލުވުމަށް ފަހު އެ ޓީމަށް ޖެހިޖެހިގެން ތިން އަހަރު ޗެމްޕިއަންސް ލީގު ކާމިޔާބުކޮށްދިނުމުގެ އިތުރުން ޔުއެފާ ސުޕަ ކަޕް އަދި ކްލަބް ވޯލްޑް ކަޕް ދެ ފަަހަރު ހޯދައިދިނެވެ. އަދި ސްޕެނިޝް ސުޕަ ކަޕް ކާމިޔާބުކުރިއިރު، 2018 ވަނަ އަހަރުގެ ޖޫން މަހު ރެއާލް ކޯޗުކަމުން ކުއްލިއަކަށް ޒިދާން ވަކިވި އެވެ.
އެ ފަހަރު ރެއާލުން ޒިދާންގެ ބަދަލުގައި ފުރަތަމަ ގެނައި ކޯޗު ހުލެން ލޮޕެޓެގީ ތިން މަސް ތެރޭ ވަކިކުރިއިރު ދެން އެ ޓީމާ ހަވާލުވި ސަންޓިއާގޯ ސޮލާރީ އަށް ވެސް މާ ރަނގަޅު މަސައްކަތެއް ނުކުރެވުނެވެ.
ޒިދާން އަލުން ރެއާލާ ހަވާލުވީ މަގާމު ދޫކޮށްލިތާ އަށް ވަރަކަށް މަސް ފަހުން 2019 ވަނަ އަހަރުގެ މާޗް މަހު އެވެ. އެ ޓީމާ ހަވާލުވެ ޒިދާނަށް ހޯދުނީ މިދިޔަ ސީޒަނުގެ ސްޕެނިޝް ލީގާއި ސުޕަ ކަޕް އެވެ. މި ސީޒަނުގައި ރެެއާލް ނިންމާލަން ޖެހުނީ ތަށްޓެއް ނުލިބި އެވެ. މިއީ 2011 ވަނަ އަހަރުގެ ފަހުން ރެއާލް ތަށްޓެއް ނުލިބި ސީޒަނެއް ނިންމާލި ފުރަތަމަ ފަހަރެވެ.
