މެންޗެސްޓާ (މެއި 11) - މެންޗެސްޓާ ޔުނައިޓެޑަށް ކުޅޭ އުރުގުއޭ ގައުމީ ޓީމުގެ ފޯވާޑް އެޑިންސަން ކަވާނީ އެ ޓީމާ އެކު ހަދާފައިވާ އެއްބަސްވުން އިތުރު އަހަރަކަށް އާ ކޮށްފި އެވެ.
އުމުރުން 34 އަހަރުގެ ކަވާނީ މި ސީޒަނުގައި އެއް އަހަރުގެ ކޮންޓްރެކްޓެއްގެ ދަށުން ޔުނައިޓެޑާ ގުޅުނީ ސެޕްޓެމްބަރު މަހު އެވެ. އެ އެއްބަސްވުމުގައިވާ ގޮތުން އިތުރު އަހަރަކަށް ކޮންޓްރެކްޓް އާކުރުމުގެ ފުރުސަތު ޔުނައިޓެޑަށް އޮވެ އެވެ. ޔުނައިޓެޑުން ކޮންޓްރެކްޓް އާ ކުރީ އެ ފުރުސަތުގެ ބޭނުން ހިފައިގެންނެވެ.
"މި ކްލަބާ މެދު ވަރަށް ބޮޑު ގާތް ކަމެއް އުފެދިއްޖެ. ޓީމުގެ ކުޅުންތެރިންނާއި ކްލަބްގެ ފަރުދާގެ ފުރަގަހުގައި މަސައްކަތްކުރާ މީހުންނާ ވަރަށް ގާތް ގުޅުމެއް އުފެދިއްޖެ. އެހެންވެ އަހަރެން ބޭނުންވީ މަޑުކުރަން،" ކަވާނީ ބުންޏެވެ.
ދާދި ފަހުން ކަވާނީގެ ބައްޕަ ލުއިސް ބުނީ ކަވާނީ އިންގްލެންޑްގައި ހުރީ ހިތްހަމަނުޖެހިފައި ކަމަށާއި އޭނާ ހުރީ ދެކުނު އެމެރިކާ އަށް އަންނަން އޭނާ ބޭނުންވެފައި ކަމަށެވެ. އެހެންވެ ކަވާނީ ޔުނައިޓެޑާ އެކު އިތުރު އެއްބަސްވުމެއް ނަހަދައި އާޖެންޓީނާގެ ބޮކަ ޖޫނިއާސް އަށް ބަދަލުވެދާނެ ކަމަށް ބެލެވުނު ނަމަވެސް ޔުނައިޓެޑްގައި ލިބޭ ފުރުސަތުތަކުގެ ބޭނުން ރަނގަޅަށް ހިފުމުގެ ނަތީޖާ އަކަށްވީ އޭނާ އެ ޓީމުގައި މަޑުކުރުމެވެ.
ކުރިން ނަޕޯލީ އާއި ޕީއެސްޖީ އަށް ކުޅުނު ކަވާނީ މި ސީޒަނުގައި މިހާތަނަށް ކުޅުނު 35 މެޗުން ވަނީ 15 ގޯލު ޖަހައިފަ އެވެ. މީގެ ތެރެއިން އެންމެ ފަހުން ކުޅުނު ހަތް މެޗުގައި ޖެހި އަށް ގޯލު ހިމެނެ އެވެ.
ޔުނައިޓެޑުން ކަވާނީ މަޑުކުރުވީ އެ ޓީމުގެ ކޯޗު އޮލެ ގުނަ ސޯލްޝެއާ ވެސް އެކަމަށް ވަރަށް ބޮޑަށް ބާރުއެޅުމުންނެވެ.
