މާލޭގައި ޒުވާނުންނަށް ފަސޭހަކަމާއެކު މިޔުޒިކް އަޑުއަހާލައި، އެކުވެރީންނާ ބައްދަލުކޮށްލައި، ހާސްކަމުން ބޭރުގައި އުފާވެރި މާހައުލެއްގައި ހީނ ސަމާސާކޮށް މަޖާކޮށްލައި، އެއްވެ ތިބެވޭނޭ ފަދަ މަރުކަޒެއް ގާއިމުކޮށްދިނުމަށް ސަރުކާރަށް ގޮވާލައި ހުށަޅެފައިވާ ގަރާރު ރައްޔިތުންގެ މަޖިލީހުން މިއަދު ފާސްކޮށްފި އެވެ.
ޒުވާނުން މިއުޒިކް އަޑުއަހައި ވަގުތު ހޭދަކޮށްލާނެ މަރުކަޒެއް ހަދަން މަޖިލީހަށް ހުށަހެޅުއްވީ ހެންވޭރު ހުޅަނގު ދާއިރާގެ މަޖިލިސް މެމްބަރު ހަސަން ލަތީފެވެ.
ސަރުކާރު ހިންގާ ކޯލިޝަނުގެ މައި ޕާޓީ އެމްޑީޕީގެ ޗެއާޕާސަންގެ މަގާމު ވެސް ފުރުއްވާ ހަސަން ހުށަހެޅުއްވި ގަރާރުގައި އެދިވަޑައިގެންނެވީ ގާއިމުކުރެވޭ މަރުކަޒުގައި ރެކޯޑިން ސްޓޫޑިއޯއަކާއެކު މިއުޒިކް އުނގަންނައި ދިނުމާއި ޝޯތައް ވެސް ބޭއްވޭނެ ވަސީލަތްތައް ގާއިމު ކުރުމަށެވެ.
އެ ގަރާރު ދިރާސާ ކުރުމަށް ފުނުވުމުން، މަޖިލީހުގެ އިޖްތިމާއީ ކޮމެޓީން ނިންމާފައިވަނީ ސަރުކާރާއި ކަމާ ގުޅުން ހުރި ވުޒާރާތަކުގެ އެހީއާއެކު ހެރިޓޭޖް މިނިސްޓްރީން އިސްވެ އެ މަރުކަޒު ގާއިމުކުރުމަށް އެ މިނިސްޓްރީގައި އެދުމަށެވެ.
މިއަދުގެ ޖަލްސާގައި އެ ރިޕޯޓު ތަޅުމަށް ހުށަހަޅަން ފުރުސަތު ދެއްވަމުން ރިޔާސަތުގައި އިންނެވި މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވީ އެ ގަރާރާމެދު ރައްޔިތުންގެ އިތުރުން މީޑިޔާގައި ވެސް އޮޅުންތަކެއް އަރާފައިވާ ކަމަށެވެ.
އެ ގަރާރާ ގުޅޭ ގޮތުން މަޖިލީހުގެ ތަޅުމުގައި ކުރިއަށް ދިޔަ ބަހުސްގެ ތެރެއިން އިދިކޮޅު މެމްބަރުން ވަނީ އެމްޑީޕީ މެމްބަރުން ދެއްކެވި ވާހަކަތަކަށް ވަރަށް ބޮޑަށް ފާޑުވިދާޅުވެފަ އެވެ. އަދި އެ ގާރާރާ ގުޅިގެން ބައެއް ދީނީ އިލްމުވެރިން ވެސް ކަންބޮޑުވުންފާޅު ކުރައްވައިފަ އެވެ.
އެ ގަރާރާ ގުޅޭގޮތުން އިޖުތިމާއީ ކޮމިޓީން ނިންމި ގޮތަށް މަޖިލީހުގެ ތަޅުމުން މިއަދު ފާސްކޮށްފައިވަނީ އެ ވޯޓުގައި ބައިވެރިވެވަޑައިގެންނެވި 53 މެމްބަރުންގެ ތެރެއިން 46 މެމްބަރުންގެ ވޯޓާއެކު އެވެ.
އެ ގަރާރު ފާސްކުރުމާ ދެކޮޅަށް ފަސް މެމްބަރަކު ވޯޓު ދެއްވި އިރު، ވަކި ގޮތަކަށް ވޯޓު ނުދެއްވާ ދެ މެމްބަރަކު ވެސް ތިއްބެވި އެވެ.
