ރައްޔިތުންގެ މަޖިލީހުގެ ސާފު އަގުލަބިއްޔަތު އޮންނަ އެމްޑީޕީގެ ޕާލިމަންޓްރީ ގުރޫޕުގެ ބައްދަލުވުންތައް މީޑިއާއަށް ހުޅުވާލައިގެން ކުރިއަށް ގެންދިއުމަށް އެދި ގަރާރެއް ހުށަހަޅައިފި އެވެ.
ހެންވޭރު ހުޅަނގު ދާއިރާގެ މެމްބަރު ހަސަން ލަތީފު އެމްޑީޕީގެ ޕާލިމަންޓްރީ ގުރޫޕަށް ހުށަހެޅުއްވި ގަރާރުގައި ބުނެފައިވަނީ ޑިމޮކްރަސީގެ ހަމަތަކާ އެއްގޮތަށް ދެ ފުށް ފެންނަ، ހުޅުވާލެފައިވާ މާހައުލެއްގައި ނިންމުންތައް ނިންމުމަކީ އެމްޑީޕީން އަބަދުވެސް ގަބޫލުކުރާ ފަލްސަފާއެއް ކަމަށެވެ.
އަދި އެ މޭރުމުން ނިންމާ ނިންމުންތަކަށް ރައްޔިތުންގެ އިތުބާރު ލިބުމުގެ އިތުރުން ނިންމުންތަކުގެ ހަގީގަތް ސާފުވާނެކަމަށް އެ ގަރާރުގައި ބުނެފައިވެ އެވެ.
އެއާއެކު، އެމްޑީޕީގެ ޗެއާޕާސަންގެ މަގާމުވެސް ފުރުއްވާ ހަސަން ހުށަހެޅުއްވީ ޕީޖީގެ ބައްދަލުވުންތައް އުސޫލެއްގެ ގޮތުން މީޑިޔާތަކަށް ހުޅުވާލައިގެން ކުރިއަށް ގެންދާ ބައްދަލުވުންތަކެއް ކަމަށް ކަނޑައެޅުމަށެވެ.
ނަމަވެސް، ވަކި ބައްދަލުވުމެއް ނޫނީ ބައްދަލުވުމުގެ ބައެއް ސިއްރު ކުރަން ޕީޖީގެ ލީޑަޝިޕުން ބޭނުންވެއްޖެ ހިނދެއްގައި އެކަން ކުރުމަށް ހުރަހެއް ނެތް ނަމަވެސް، އެކަން ކުރެވޭ ސަބަބު ޕީޖީގެ މެމްބަރުން އަންގައިދޭންވާނެ ކަމަށް ވެސް އެ ގަރާރުގައި އިތުރަށް ހުށަހަޅާފައިވެ އެވެ.
އަދި ޕާލިމަންޓްރީ ގުރޫޕުގެ ޖުމްލަ މެމްބަރުންގެ ތިން ބައި ކުޅަ ދެ ބައިގެ ހުށަހެޅުމާއެކު ޕީޖީގެ ބައްދަލުވުމެއް ސިއްރު ކުރަންޖެހޭނެކަމަށް ހަސަން ހުށަހަޅުއްވާފައިވެ އެވެ.
ހަސަން ލަތީފު ހުށަހެޅުއްވި ގަރާރަށް ތާއީދު ކުރައްވާފައިވަނީ ތުޅާދޫ ދާއިރާގެ މެމްބަރު ހިސާން ހުސެއިން އެވެ.
