ސްޓޮކްހޯލްމް، ސްވިޑެން (އޭޕްރީލް 16) - ސްވިޑަން ފޯވާޑް ޒްލަޓާން އިބްރަހިމޮވިޗްގެ ކުންފުންޏެއްގެ ހިއްސާއެއް ބެޓިން ކުންފުންޏެއްގައި އޮންނަ ކަމަށް ބުނެ، ޔުއެފާ އާއި ފީފާ އިން އޭނާގެ މައްސަލަ ބަލަމުން އަންނަ ކަމަށާއި މިކަމުގެ ސަބަބުން އިބްރަހިމޮވިޗަށް ތިން އަހަރުގެ ސަސްޕެންޝަނެއް އަތުވެދާނެ ކަމަށް ސްވިޑެންގެ މީޑިއާތަކުން ރިޕޯޓްކޮށްފި އެވެ.
ސްވިޑެންގެ މީޑިއާ އެއް ކަމަށްވާ އަފްޓޮންބްލަޑެޓް އިން ރިޕޯޓްކުރާ ގޮތުގައި ބެޓިން ވެބްސައިޓެއް ކަމަށްވާ ބެޓްހާޑް 10 ޕަސެންޓް ހިއްސާ އޮތީ އިބްރަހިމޮވިޗްގެ ކުންފުންޏެއް އަތުގަ އެވެ. ޔުއެފާ އާއި ފީފާގެ ގަވާއިދުގައިވާ ގޮތުން މުބާރާތެއްގައި ކުޅޭ ކުޅުންތެރިއަކަށް ބެޓް ކުރާ ކުންފުންޏަކުން މާލީ މަންފާ ލިބޭގޮތަށް ކޮންޓްރެކްޓެއް އޮތުމަކީ މަނާކަމެކެވެ.
އަފްޓޮންބްލަޑެޓް އިން ތުހުމަތުކުރާގޮތުގައި އުމުރުން 39 އަހަރުގެ އިބްރަހިމޮވިޗްގެ ކުންފުންޏެއް އަތުގައި ބެޓްހާޑްގެ ހިއްސާ އޮންނަތާ ތިން އަހަރެއްހާ ދުވަސް ވެއްޖެ އެވެ. އަދި ސްވިޑަން އިން 2018 ވަނަ އަހަރުގެ ވޯލްޑް ކަޕަށް އިބްރަހިމޮވިޗް ނުގެންދިޔައީ ވެސް އެހެންވެ ކަމަށް އަފްޓޮންބްލަޑެޓް އިން ރިޕޯޓްކުރެ އެވެ.
ބެޓްހާޑް އިން ވަނީ 2018 ވަނަ އަހަރު އިބްރަހިމޮވިޗް އެމްބަސަޑަރެއްގެ ގޮތުގައި މީޑިއާ އަށް ތައާރަފްކޮށްފަ އެވެ. އޭރު ވެސް އިބްރަހިމޮވިޗަކީ އެ ސައިޓްގެ ހިއްސާދާރެއް ކަމަށް ބުނެ މީޑިއާތަކުގައި ވަނީ ރިޕޯޓްކޮށްފަ އެވެ.
އިނގިރޭސި މީޑިއާ ރިޕޯޓްތައް ބުނާގޮތުގައި ބެޓްހާޑްގައި ހަތަރު ވަނަ އަށް އެންމެ ބޮޑު ހިއްސާއެއް އޮތީ އިބްރަހިމޮވިޗްގެ ކުންފުނި އަތުގަ އެވެ. ޔުއެފާ އާއި ފީފާ އިން މި މައްސަލައިގައި އަދި ވަކި އެއްޗެއް ބުނެފައިނުވި ނަމަވެސް ސްވިޑެންގެ މީޑިއާ ރިޕޯޓްތައް ބުނާގޮތުން އެ ދެ ފެޑެރޭޝަނުގެ ފައިނޭންޝިއަލް ކްރައިމް ޔުނިޓުން އަންނަނީ މި މައްސަލަ ބަލަމުންނެވެ. އިބްރަހިމޮވިޗްގެ މައްޗަށް ކުށް ސާބިތުވެއްޖެނަމަ އޭނާ ތިން އަހަރަށް ފުޓްބޯޅައިގެ ހަރަކާތްތަކުން ސަސްޕެންޑްކުރާނެ އެވެ.
ފްރާންސްގައި 2016 ވަނަ އަހަރު ބޭއްވި ޔޫރޯ ފުޓްބޯޅަ މުބާރާތަށް ފަހު އިބްރަހިމޮވިޗް ގައުމީ ޓީމުން ރިޓަޔާކުރީ 116 މެޗުން 62 ގޯލު އެ ޓީމަށް ޖަހައިދިނުމަށް ފަހު އެވެ. ފަސް ވަރަކަށް އަހަރުގެ މެދުކެނޑުމަކަށް ފަހު އިބްރަހިމޮވިޗް އަލުން ސްވިޑަން އަށް ކުޅެން ފެށީ މިދިޔަ މަހުގަ އެވެ. އޭނާ ގައުމީ ޓީމަށް އެނބުރި އަންނަން ނިންމިއިރު ޔޫރޯ ފުޓްބޯޅަ މުބާރާތް ފެށެން ވަނީ ތިން މަހަށް ވެފަ އެވެ.
ކުރިން ޔޫރަޕްގެ މަޝްހޫރު ގިނަ ކްލަބްތަކަށް ކުޅެފައިވާ އިބްރަހިމޮވިޗް މި ވަގުތު ކުޅެމުން އަންނަނީ އިޓަލީގެ ގަދަބާރު އޭސީ މިލާން އަށެވެ. މި ސީޒަނުގައި މިހާތަނަށް އޭނާ ވަނީ 17 ގޯލު ޖަހައިފަ އެވެ.
