ލޭގަނޑުވުމުގެ މައްސަލައިގައި ޑެންމާކުން، އޮކްސްފޯޑާއި އެސްޓްރަޒެނެކާގެ ކޮވިޑް ވެކްސިން ދިނުން ހުއްޓާލައިފި އެވެ.
މިއީ ޔޫރަޕުގެ ގައުމަކުން އެ ވެކްސިން ދިނުން ހުއްޓާލި ފުރަތަމަ ފަހަރެވެ. އެހެން ގައުމުތަކުން ނިންމީ އެއްކޮށް ހުއްޓާލުމުގެ ބަދަލުގައި ވަކި އުމުރެއްގެ މީހުންނަށް އެ ވެކްސިން ދިނުމަށެވެ.
ޑެންމާކުގެ ނިންމުމާ ގުޅިގެން އެ ގައުމުގެ ވެކްސިން ޕްރޮގްރާމް ވަރަށް ބޮޑަށް މަޑުޖެހޭނެ ކަމަށް ބެލެވެ އެވެ.
ޔޫރަޕިއަން މެޑިސިންސް އެޖެންސީން މިދިޔަ ހަފްތާގައި ބުނީ ލޭގަނޑުވުމާއި އޮކްސްފޯޑް ވެކްސިނާ ގުޅުމެއް ވުން އެކަށީގެންވާ ކަމަށެވެ. ނަމަވެސް އެކަން ކަށަވަރު ކުރެވިފައެއް ނުވެ އެވެ.
އެހެންކަމުން އެ އިދާރާއިން ބުނީ ވެކްސިނުގެ ސަބަބުން ލިބިދާނެ ނުރައްކަލަކަށް ވުރެ ވެކްސިން ނުޖަހާ ހުރުމުން ލިބިދާނެ ނުރައްކާ މާ ބޮޑު ކަމަށެވެ.
ޔޫރަޕުގެ އެހެން ގައުމުތަކުގެ އޮކްސްފޯޑް ވެކްސިން މިހާރު ގިނައިން ދެނީ އުމުރުން ދުވަސްވީ މީހުންނަށެވެ. އެއީ ލޭގަނޑުވުމުގެ މައްސަލަ ދިމާވަނީ ޒުވާނުންނަށް ކަމަށް ބެލެވިފައި ވާތީ އެވެ.
އޮކްސްފޯޑް ވެކްސިނުގެ އިތުރުން ޖޯންސަން އެންޑް ޖޯންސަން ވެކްސިނު ޖެހި ބައެއް މީހުންނަށް ވެސް ވަނީ ލޭގަނޑުވުމުގެ މައްސަލަ ދިމާވެފަ އެވެ.
އެކަމާ ގުޅިގެން އެމެރިކާ، ކެނެޑާ އަދި ޔޫރަޕިއަން ޔޫނިއަނުން ވަނީ އެ ވެކްސިން ވަގުތީ ގޮތުން މެދުކަނޑާލާފަ އެވެ. ދެކުނު އެފްރިކާއިން ވެސް އެގޮތަށް ނިންމާފައި ވާއިރު، އެ ގައުމުން ފެނުނު ހަލުވިކަމާއެކު ފެތުރޭ ވޭރިއެންޓާ ދެކޮޅަށް އެންމެ ރަނގަޅަށް މަސައްކަތް ކުރާ ވެކްސިނަކީ ޖޯންސަންގެ ވެކްސިނެވެ.
އޮކްސްފޯޑާއި ޖޯންސަން ވެކްސިން ޖެހި މީހުންގެ ތެރެއިން ލޭގަނޑުވުމުގެ މައްސަލަ ދިމާވީ ވަރަށް މަދު އަދަދެއްގެ މީހުންނަށެވެ.
