ޒިއުރިކް (އޭޕްރީލް 10) - މި އަހަރު ޔޫރަޕްގެ 12 ގައުމެއްގައި ބާއްވާ ޔޫރޯ ފުޓްބޯޅަ މުބާރާތުގެ އަށް ދަނޑެއްގައި މެޗުތައް ކުޅޭނީ ސަޕޯޓަރުން ވައްދައިގެން ކަމަށް ޔުއެފާ އިން ބުނެފި އެވެ.
ޔޫރޯ މެޗުތައް ބާއްވަން ނިންމާފައިވަނީ އިންގްލެންޑްގެ ވެމްބްލީ ސްޓޭޑިއަމް، ޖަރުމަނުގެ އަލިއާންޒް އެރީނާ، އިޓަލީގެ އޮލިމްޕިކް ސްޓޭޑިއަމް، އަޒަރުބައިޖާންގެ ބަކޫ، ރަޝިއާގެ ކްރެސްޓޯވްސްކީ ސްޓޭޑިއަމް، ހަންގޭރީގެ ޕުސްކަސް އެރީނާ، ރުމޭނިއާގެ ނެޝަނަލް އެރީނާ، ނެދަލެންޑްސްގެ ޔޯހަން ކްރައިފް އެރީނާ، ސްޕެއިންގެ ސޭން މެމްސް، ސްކޮޓްލެންޑްގެ ހެމްޕްޑަން ޕާކް، އަޔަލެންޑްގެ އަވީވާ ސްޓޭޑިއަމްގެ އިތުރުން ޑެންމާކުގެ ޕާކެން ސްޓޭޑިއަމްގަ އެެވެ.
ކޮވިޑް-19ގެ ސަލާމަތީ ފިޔަވަޅުތަކުގެ ސަބަބުން މިދިޔަ އަހަރުގެ ޔޫރޯ މި އަހަރަށް ފަސްކޮށް ޝެޑިއުލާ އެއްގޮތަށް ބޭއްވިޔަސް ސަޕޯޓަރުން ވައްދައިގެން މެޗުތައް ބޭއްވިދާނެތޯ ކުރިން ވަނީ ސުވާލު އުފެދިފަ އެވެ. އެކަމަކު ޔުއެފާ އިން އެންމެ ފުރަަތަމަ ދުވަހުން ފެށިގެން ބުނަމުން އައީ ސަޕޯޓަރުން އެއްވެސް ވަރަކަށް ނުވައްދައި ފަޅަށް އޮންނަ ދަނޑުތަކެއްގައި މެޗުތައް ނުކުޅޭނެ ކަމަށެވެ.
ޔުއެފާ އިން ބުނީ މިހާރު އަންނަ ޖޫން 11 ގައި ފަށަން ނިންމާފައިވާ މުބާރާތުގައި ސަޕޯޓަރުން ވައްދަން އަދި ހުއްދަ ނުލިބި އޮތީ ޖަރުމަނާއި އިޓަލީ، ސްޕެއިން އަދި އަޔަލެންޑްގަ އެވެ. އެ ގައުމުގައި ސަޕޯޓަރުން ވައްދައިގެން މެޗު ކުޅެވޭނެތޯ ނޫންތޯ އެންމެ ފަހުގެ ޖަވާބެއް ދޭން ޔުއެފާ އިން ވަނީ މި މަހުގެ 19 އާ ހަމައަށް މުހުލަތެއް ދީފަ އެވެ.
ފުލް ސްޓޭޑިއަމެއްގައި މެޗު ކުޅެވޭނެ ކަމުގެ ޔަގީންކަން ދީފައިވަނީ ހަންގޭރީންނެވެ. ރަޝިއާ އާއި އަޒަރުބައިޖާން އިން ވަނީ 50 ޕަސެންޓް ސަޕޯޓަރުން ވައްދައިގެން މެޗުތައް ބޭއްވޭނެ ކަމަށް ބުނެފަ އެވެ. އެހެން ހުރިހާ ގައުމެއްގެ ވިސްނުން ހުރީ 30 ޕަސެންޓަށް ވުރެން ދަށްކޮށް ސަޕޯޓަރުން ވެއްދުމަށެވެ. އިންގްލެންޑުން ހުށަހެޅީ 25 ޕަސެންޓް ސަޕޯޓަރުން ވައްދައިގެން މެޗު ކުޅޭށެވެ.
ޔުއެފާ އިން އެދެނީ ފުރުސަތު ލިބޭ ވަރަކަށް ކޮންމެ ގައުމަކުން ވެސް ވީ އެންމެ ގިނައިން ސަޕޯޓަރުން ވައްދައިގެން މެޗުތައް ކުޅެވޭނެ ގޮތް ވުމެވެ.
