ކޮވިޑް-19ގެ މެދުކެނޑުމަށް ފަހު ފުޓްބޯޅަ އަލުން ފެށިއިރު ދުނިޔޭގެ ގިނަ މުބާރާތްތަކުގައި އަމަލުކުރަމުން އަންނަ ގޮތަށް, މި ފަހަރުގެ އޭއެފްސީ ކަޕްގެ މެޗުތަކުގައި ފަސް ބަދަލުކުރެވޭ ގޮތަށް ހަމަޖައްސައިފި އެވެ.
އޭއެފްސީ ކަޕްގެ ކޮލިފައިންގައި މިއަދު ހަވީރު މާލޭގައި ރާއްޖޭގެ އީގަލްސް އާއި ބޫޓާންގެ ޗެމްޕިއަން ތިމްޕޫ ސިޓީ ކުޅޭނެ އެވެ. އެ މެޗުގައި ވެސް ފަސް ބަދަލުކުރެވޭނެ އެވެ.
ކޮވިޑް-19 އަށް ފަހު ދިވެހި ޕްރިމިއާ ލީގު ފެށުމުގެ ކުރިން ފަސް ބަދަލުކުރާ ގޮތަށް ހަދަން މުބާރާތުގައި ވާދަކުރާ އަށް ޓީމުގެ ވިސްނުން ހުރި ގޮތެއް އެފްއޭއެމުން އޭރު އޮޅުންފިލުވި އެވެ. އެކަމަކު ގިނަ ކްލަބްތަކުން ފަސް ބަދަލު ކުރެވޭ ގޮތް ހަދަން އެއްބަސްނުވުމުން ލޯކަލް ސީޒަނުގައި މެޗުތަކުގައި ކުރަނީ ތިން ބަދަލެވެ.
ކޮވިޑްގެ ހާއްސަ ހާލަތާ ގުޅިގެން ދުނިޔޭގެ ފުޓްބޯޅައިގައި އަމަލުކުރަމުން އަންނަ ފަސް ބަދަލު ގެންނަން ބޭނުންކުރަން ޖެހޭނީ ތިން ފުރުސަތެކެވެ. މި ގޮތަށް ނިންމި ސަބަބަކީ މެޗު ލަސްކުރުމުގެ ފުރުސަތު އެއްވެސް ޓީމަކަށް ނުދިނުމަށެވެ. ދެ ޓީމުން އެއްކޮށް އެއް ފަހަރާ ކުޅުންތެރިން ބަދަލުކުރި ކަމުގައި ވިޔަސް ގުނާނީ އެއް ފުރުސަތެއްގެ ގޮތުގަ އެވެ.
އޭއެފްސީ ކަޕްގައި ފަސް ބަދަލު ކުރެވުމަކީ މި މުބާރާތުގައި ގްރޫޕް ސްޓޭޖުގައި މި ވަގުތު އޮތް ރާއްޖޭގެ ޗެމްޕިއަން މާޒިޔާ އަށް ލިބޭނެ ވަރަށް ބޮޑު ހިތްހަމަޖެހުމެކެވެ. އަންނަ މަހު 14 އިން 21 ގެ ނިޔަލަށް އޭއެފްސީ ކަޕްގެ ދެކުނު އޭޝިއާ އަށް ހާއްސަ ގްރޫޕްގެ މެޗުތައް ހޯސްޓްކުރާނީ ރާއްޖޭގަ އެވެ. މާޒިޔާގެ އިތުރުން އެ ގްރޫޕްގައި އޮތީ ބަންގްލަދޭޝްގެ ޗެމްޕިއަން ބަޝުންދުރާ ކިންގްސް އާއި އިންޑިއާގެ ޗެމްޕިއަން އޭޓީކޭ މޯހަން ބަގާން އެވެ. ދެން އޮތް އެ ގްރޫޕްގެ ފަހު ޖާގަ ލިބޭނީ ކޮލިފައިން ކާމިޔާބުކުރާ ޓީމަކަށެވެ.
ކޮލިފައިންގައި ވާދަކުރަނީ އީގަލްސް އާއި ތިމްޕޫގެ އިތުރުން ނޭޕާލްގެ އާމީ ކްލަބާއި ސްރީލަންކާގެ ޕޮލިހާއި އިންޑިއާގެ ބެންގަލޫރު އެފްސީ އަދި ބަންގްލަދޭޝްގެ ޑާކާ އަަބަހާނީ އެވެ. އީގަލްސް އާއި ތިމްޕޫ ކުޅެގެން މޮޅުވާ ޓީމެއް ކޮލިފައިން ދެ ވަނަ ބުރުގައި ކުޅެން ޖެހޭނީ އަަބަހާނީ އެވެ. ނޭޕާލް އާމީ ކްލަބާއި ސްރީލަންކާ ޕޮލިސް ކުޅެގެން މޮޅުވާ ޓީމެއް ދެ ވަނަ ބުރުގައި ބައްދަލުކުރާނީ ބެންގަލޫރުއާ އެވެ. ކޮލިފައިން ދެ ވަނަ ބުރުގެ މެޗުން މޮޅުވާ ދެ ޓީމެއް ބައްދަލުކުރާނީ ޕްލޭއޮފްގަ އެވެ. ޕްލޭއޮފުން މޮޅުވާ ޓީމަކަށް ގްރޫޕް ސްޓޭޖުގެ ޖާގަ ލިބޭނެ އެވެ.
މިދިޔަ އަހަރުގެ އޭއެފްސީ ކަޕްގެ ފުރަތަމަ މެޗުތައް ކުޅުމަށް ފަހު ކޮވިޑް-19ގެ ކޭސްތައް މުޅި ދުނިޔޭގައި ފެތުރެންފެށުމާ އެކު އެ މުބާރާތް ހުއްޓާލި އެވެ. ފަހުން މުބާރާތް އަލުން ފަށަން ކުރެވުނު މަސައްކަތުގެ ތެރޭގައި ސެންޓްރަލައިޒްކޮށް އެކި ގައުމުތަކުގައި ވަކި ވަކި ގްރޫޕްގެ މެޗުތައް ކުޅެން ނިންމި އެވެ. އޭރު މެޗުތައް ފެށި ނަމަވެސް އޭއެފްސީގެ ވިސްނުމަކީ މެޗުތަކުގައި ފަސް ބަދަލުކުރެވޭ ގޮތް ހެދުމެވެ. އެކަމަކު ފަހުން ހުރިހާ ގްރޫޕްގެ މެޗުތައް ކުރިއަށްގެންދެވޭނެ ގޮތެއް ނެތިގެން އޭއެފްސީން މިދިޔަ އަހަރުގެ މުބާރާތް އެއްކޮށް ކެންސަލްކުރީ އެވެ.
