ކްލަބް އީގަލްސްގެ 31 އަހަރުވީ ތާރީހުގައި ފުރަތަމަ ފަހަރަށް އޭއެފްސީ ކަޕްގެ މެޗަކަށް އެ ޓީމު މިއަދު ނުކުންނައިރު, އެ މެޗުގައި ބޫޓާންގެ ޗެމްޕިއަން ތިމްޕޫ ސިޓީއާ ދެކޮޅަށް ކުޅެން ކްލަބް އީގަލްސް ކުޅުންތެރިން ތިބީ ތައްޔާރަށް ކަމަށް އެ ޓީމުގެ ކެޕްޓަން ހުސެއިން ސިފާއު ޔޫސުފް (ކުރޯ) ބުނެފި އެވެ.
ތިމްޕޫއާ ދެކޮޅަށް އީގަލްސް ކުޅޭ މެޗުގެ ކުރިން އިއްޔެ އޮތް ނޫސްވެރިންގެ ބައްދަލުވުމުގައި ކުރޯ ބުނީ މި މެޗު ވާނީ އީގަލްސް އަށް ހާއްސަ މެޗަކަށް ކަމަށެވެ.
"ދެން އީގަލްސް އަށް އެންމެ ހާއްސަ އެއް ދުވަހަށް ވާނެ ދޯ މާދަން (މިއަދު). އެއީ އަލަށް އީގަލްސް އޭއެފްސީ ކަޕް މެޗަކަށް ނުކުންނައިރުގައި ވަރަށް ހާއްސަ ދުވަހަކަށް ވާނީ އީގަލްސް ތާރީހުގައި. ހުރިހާ ކުޅުންތެރިން ވެސް މި މެޗު ނަގަން ފޯކަސް ކޮށްފައި ހުރީ. ދެން އެ މީހުން ކޮންމެ ގޮތަކަށް ދެކުނު ކަމުގައި ވިިޔަސް އީގަލްސް އިން ސީދާ މެޗު ނަގަން ފޯކަސް ކުރާނީ," ގައުމީ ޓީމަށް ވެސް ކުޅެމުން އަންނަ ކުރޯ ބުންޏެވެ.
ލ. ކުނަހަންދު އަށް އުފަން ކުރޯ އީގަލްސްއާ ގުޅުނީ 2013 ވަނަ އަހަރު އެވެ. ކުރޯ އަށް އީގަލްސްގައި އެންމެ ރަނގަޅަށް ފުރުސަތު ލިބެން ފެށީ 2014 ވަނަ އަހަރު އެވެ. އެ ފަހަރު އޭނާ ވަނީ އީގަލްސްގެ ފުރަތަމަ އެގާރައިގައި ހިމެނިގެން ގިނަ މެޗުތަކެއް ކުޅެފަ އެވެ. އޭގެ ފަހުން އޭނާ އަކީ ގަވާއިދުން އީގަލްސްގެ ފުރަތަމަ އެގާރައިގައި ހިމެނިގެން ކުޅެމުން އައި ކުޅުންތެރިޔެކެވެ. އަދި އީގަލްސް އިން 2015 ވަނަ އަހަރުގެ ޕްރެޒިޑެންޓްސް ކަޕް ކާމިޔާބުކުރި ޓީމުގައި ވެސް ތަފާތު ދެއްކި އެވެ.
ކުރޯ އަށް އީގަލްސް ކެޕްޓަންކަން ދިނީ މިދިޔަ އަހަރު އެވެ. އީގަލްސް އިން މި ފަަހަރުގެ އޭއެފްސީ ކަޕްގައި ކުޅެނީ މިދިޔަ ސީޒަނުގައި ރާއްޖޭގެ ލީގުގެ ރަނަރަޕްގެ ހައިސިއްޔަތުންނެވެ. އާންމު ގޮތެއްގައި ލީގު ޗެމްޕިއަންގެ އިތުރުން ދެން އޭއެފްސީ ކަޕްގެ ޖާގަ ލިބެނީ އެފްއޭ ކަޕް ޗެމްޕިއަނަށެވެ. އެކަމަކު ކޮވިޑާ ހެދި މިދިޔަ އަހަރުގެ އެފްއޭ ކަޕް ކެންސަލްކުރަން ޖެހުމުން ލީގުގެ ރަނަރަޕަށް މި ފަހަރުގެ އޭއެފްސީ ކަޕުން ފުރުސަތު ދިނީ އެވެ.
ކޮވިޑް-19ގެ ސަބަބުން މި ފަހަރުގެ ލީގު ފެށިފަހުން ދެ މަހެއްހާ ދުވަަހަށް ލީގު މެދުކަނޑާލުމަށް ފަހު އަލުން ފެށީ މިދިޔަ މަަހު 26 ވަަނަ ދުވަހު އެވެ. އީގަލްސް އެންމެ ބޭނުން ވަރަށް އޭއެފްސީ ކަޕަށް ތައްޔާރުވާން މެޗު ނުލިބުނު ކަމުގައި ވިޔަސް އެ ޓީމުގެ ތައްޔާރީތަކާ މެދު ހިތްހަމަޖެހޭ ކަމަށް އީގަލްސްގެ ކޯޗު މުހައްމަދު ޝާޒްލީ (ޝާޒް) ވަނީ ބުނެފަ އެވެ. ކުރޯ ވެސް ބުނީ ހާލަތުގެ ގޮތަށް ބަލާއިރު ތައްޔާރީތަށް ދިޔައީ ރަނގަޅަށް ކަމަށެވެ.
"ބްރޭކަށް (ލީގު މެދުކަނޑާލި މުއްދަތް) ފަހު އައީ ޓީމު ވަރަށް ބޮޑަށް އޭއެފްސީ ކަޕް މެޗަށް ތައްޔާރުވެފައި މި އޮތީ. ވެވޭނެ އެންމެ ރަނގަޅަށް ތައްޔާރުވެފައި ޕްލޭޔަރުން ވެސް ވަރަށް ކިކްގައި ތިބީ. އެހެންވީމަ ވަރަށް ރަނގަޅަށް ތައްޔާރުވެވިފައި ކަމަށް މި ބަލަނީ," އީގަލްސްއާ އެކު ޔޫތު ގިނަ މުބާރާތްތަކެއް ކާމިޔާބުކުރި ކުރޯ ބުންޏެވެ.
އޭއެފްސީ ކަޕާ ދިމާކޮށް އީގަލްސް އިން ވަނީ މިދިޔަ މަހުގެ ޓްރާންސްފާ މާކެޓްގައި ޓީމު ވަރުގަދަކޮށްފަ އެވެ. އެ ގޮތުން ބިދޭސީ ތިން ކުޅުންތެރިން އެ ޓީމާ ގުޅުނެވެ. ގްރީން ސްޓްރީޓްސް އަށް ކުޅެމުން އައި މިސްރުގެ ޑިފެންޑަރު އެލްސައީދު އާއި ލެބަނަންގެ ކީޕަރު މުހައްމަދު ތޯހާ އަދި ރަޝިއާގެ ފޯވާޑް ކޮރްމިޝިން ވްލަޑިސްލާވް ވަނީ އެ ޓީމަށް ގެނެސްފަ އެވެ. ކުރޯ ބުނީ މި ކުޅުންތެރިންނާ އެކު ޓީމު އިތުރަށް ވަރުގަދަވެފައިވާ ކަމަށެވެ.
"އަލަށް ގުޅުނު ފޮރިން ޕްލޭޔަރުން ވަރަށް ރަނގަޅޭ ބުނެވޭނީ. ވަރަށް ބޮޑަށް ޓީމު ވެގެން އުޅެނީ. ދެން އެހެންވީމަ ވަރަށް ރަނގަޅު ޕާފޯމަންސެއް ލީގުގެ ދެ މެޗުގައި ވެސް ދައްކާފައި އިނީ," ކުރޯ ބުންޏެވެ.
އޭއެފްސީ ކަޕް މެޗުތަކުގައި މީގެ ކުރިން ރާއްޖޭގެ ކްލަބްތަކަށް ލިބޭ އެންމެ ބޮޑު ހިތްހަމަޖެހުމަކީ އާންމު ގޮތެއްގައި ލީގު މެޗެއްގައި ވަންނަ ވަރަށް ވުރެ ގިނަ ސަޕޯޓަރުން މެޗު ބަލަން ދަނޑަށް ވަނުމެވެ. އެކަމަކު ކޮވިޑް-19 ޕްރޮޓޮކޯލްގެ ތެރެއިން މި މެޗުތައް ކުޅޭއިރު ދަނޑަށް ސަޕޯޓަރުން ވަންނަން ހުއްދައެއް ނެތެވެ. އެހެން ނަަމަވެސް އީގަލްސް ކުޅުންތެރިންގެ އެދުމަކީ ޓީމަށް ސަޕޯޓް ދެވެން އޮތްގޮތަކަށް ދިނުމަށެވެ.
އީގަލްސް އާއި ތިމްޕޫ ކުޅޭ މެޗު ފަށާނީ މިއަދު ހަވީރު 4 ޖަހާއިރު އެވެ.
