މާފަންނު ސްޓޭޑިއަމްގައި ކަޅުތުއްކަލާ ކޮއްޓާވީ ފަޅީގައި ތިން ޓެންޓު ޖަހާފައި އެބަހުއްޓެވެ. އާދައިގެ ދެ ޓެންޓާއެކު ދެން ޖަހާފައި ހުރީ ރާއްޖޭގައި މިހާތަނަށް ޖެހި އެންމެ ބޮޑު ޓެންޓެވެ. ވަރަށް އުސްކޮށް އަދި ފުޅާކޮށް ޖަހާފައިވާ އެ ޓެންޓުގެ ދެ އަރިމަތީގައި ފިނި ކުރުމަށް ގިނަ އޭސީތަކެއް ވަނީ ބަހައްޓާފަ އެވެ. އަދި ކޮންމެ ޓެންޓެއްގައި ފާހާނާ ވެސް ހުރެ އެވެ.
ވޯޓް ލުމަށް ހަދާ މި ޓެންޓުތައް ތިން ސަރަހައްދެއްގައި ޖެހުމުގެ މަސައްކަތް އެބަ ކުރެ އެވެ. އެއީ މާފަންނު ސްޓޭޑިއަމާއި ކުރީގެ ދަރުމަވަންތަ ސްކޫލް ހުރި ބިމާއި ކާނިވާ ސަރަހައްދެވެ.
އިލެކްޝަންސް ކޮމިޝަނުގެ އޮފިޝަލަކު މިއަދު "އަދަދު" އަށް ވިދާޅުވީ އޭގެ ތެރެއިން ސްޓޭޑިއަމްގައި ޖަހާ ޓެންޓްގައި އެއްފަހަރާ 12،000 މީހުންނަށް ތިބެވޭނެ ކަމަށެވެ. އެއީ މިހާތަނަށް ރާއްޖޭގައި ޖަހާ އެންމެ ބޮޑު ޓެންޓް ކަމަށް އީސީން ބުނެ އެވެ.
ދަރުމަވަންތަ ސްކޫލް ހުރި ބިމާއި ކާނިވަލުގައި ހަދަނީ 2،500 މީހުންގެ ޖާގައިގެ ޓެންޓެވެ.
ރަބަރުން ހަދާފައިވާ އެ ޓެންޓްތައް އޭސީ ކުރުމަށް ބަހައްޓާ ބޮޑެތި އޭސީތަކެއް ވަނީ ގެނެސްފަ އެވެ. އަދި ކޮންމެ ޓެންޓެއްގައި ޕްލާސްޓިކުން ފްލޯރިން ވެސް އަޅާފައިވެ އެވެ.
ސްޓޭޑިއަމްގައި ޖަހާ ބޮޑު ޓެންޓްގައި 40 ވޯޓް ފޮށި ބެހެއްޓުމަށް ވަނީ ނިންމައިފަ އެވެ. ދަރުމަވަންތަ އާއި ކާނިވާ ސަރަހައްދުގައި ޖަހާ ކޮންމެ ޓެންޓެއްގައި ފަސް ވޯޓް ފޮށި ބަހައްޓަން ވަނީ ނިންމައިފަ އެވެ.
އެ ޓެންޓުތައް ޖެހުމަށް ތިން މިލިއަނަށް ވުރެ ގިނަ ރުފިޔާ ހަރަދުވާ ކަމަށް އީސީން ބުނެ އެވެ. އަދި އެ ޓެންޓްތައް ޖަހައި މިއަދު ނިންމާލެވޭނެ ކަމަށް ވެސް އީސީން ބުނެ އެވެ.
މީގެ ކުރިން މާލެ އާއި އަތޮޅުތެރޭގައި ވެސް ވޯޓްލުން ބާއްވަމުން ދިޔައީ ސްކޫލްތަކާއި ޖާގަ ބޮޑު ދައުލަތުގެ އިމާރާތްތަކުގަ އެވެ. ނަމަވެސް ކޮވިޑްގެ ސަބަބުން ވޯޓްލާ މަރުކަޒުތައް މިފަހަރު ވަނީ އިތުރު ކުރަންޖެހިފަ އެވެ. އެއީ ގިނަ ބަޔަކު ތޮއްނުޖެހި ވޯޓް ލުމުގެ ފުރުސަތު ދިނުމުގެ ގޮތުންނެވެ.
އަންނަ ހޮނިހިރު ދުވަހު ބާއްވާ ލޯކަލް ކައުންސިލްތަކުގެ އިންތިހާބަކީ ހަރަދާއި ގޮންޖެހުންތައް ބޮޑު އިންތިހާބެއް ކަމަށް އީސީން ބުނެ އެވެ. މިދިޔަ އަހަރު ބާއްވަން ނިންމި އިންތިހާބު ލަސްވީ ކޮވިޑްގެ ސަބަބުންނެވެ.
