މެޑްރިޑް (އޭޕްރިލް 6) - ޗެމްޕިއަންސް ލީގުގެ ކުއާޓާ ފައިނަލުގެ ފުރަތަމަ ލެގުގައި މިރޭ ރެއާލް މެޑްރިޑާ ދެކޮޅަށް ނުކުންނައިރު, އެ ޓީމުގެ އަތުން މި މުބާރާތުގެ ފައިނަލުގައި 2018 ވަނަ އަހަރުވީ ބަލީގެ ބަދަލުހިފުމުގެ ވިސްނުމެއް ނެތް ކަމަށް ލިވަޕޫލްގެ ކޯޗު ޔާގެން ކްލޮޕް ބުނެފި އެވެ.
ލިވަޕޫލާއި ރެއާލް ވަނީ 2018 ވަނަ އަހަރު ޔޫކްރޭނުގެ ކިއޭވްގައި ޗެމްޕިއަންސް ލީގުގެ ފައިނަލުގައި ބައްދަލުކޮށްފަ އެވެ. އެ ފަހަރު ރެއާލުން ވަނީ 3-1 އިން ލިވަޕޫލް ބަލިކޮށްފަ އެވެ. އެ މެޗުގައި ލިވަޕޫލްގެ މިސްރު ފޯވާޑް މުހައްމަދު ސަލާހަށް ރެއާލްގެ ކެޕްޓަން ސާޖިއޯ ރާމޯސް ކުރި ފައުލުގެ ވާހަކަ ވަރަށް ގިނަ ދުވަސްތަކެއް ވަންދެން މީޑިއާ އާއި ފުޓްބޯޅައިގެ ތަޖުރިބާކާރުންގެ މެދުގައި ދެކެވުނެވެ. އެ މެޗުގައި ރެއާލުން ޖެހި ދެ ގޯލުގައި ލިވަޕޫލްގެ ކީޕަރު ލޮރިސް ކާރިއަސް ހެދި ގޯސްތަކާ މެދު ވެސް ގިނަ ވާހަކަތަކެއް ދެކެވުނެވެ.
މިރޭ ރެއާލް ދަނޑުގައި ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ސްޕެއިނުގެ ނޫސްވެރިއަކު ކްލޮޕް ގާތުގައި އެހީ 2018 ވަނަ އަހަރުގެ ފައިނަލުން ބަލިވުމުގެ ބަދަލުހިފަން މިއީ ލިވަޕޫލަށް ރަނގަޅު ފުރުސަތެއް ކަމަށާއި އެގޮތަށް މެޗަށް ތައްޔާރުވުމުގެ ވިސްނުން ނުގެންގުޅެންތޯ އެވެ. ކްލޮޕް ބުނީ އެއްވެސް ވަރަކަށް އެ ކަަހަލަ ގޮތަކަށް ނުވިސްނާ ކަމަށެވެ.
"މިއީ ރިވެންޖް (ބަދަލުހިފުމުގެ) ޓުއާއެއް ނޫން. އަހަރެންގެ ދިރިއުޅުމަކީ މިއީ މި ކަހަލަ ކަމެއް. ބަދަލުހިފާ ވާހަކަ ދައްކަން ބޭނުމެއް ނޫން. އެކަމަކު އަނެއް ބުރަށް ދިއުމަކީ ވަރަށް ބޮޑު ހިތްހަމަޖެހުމެއް ލިބޭނެ ކަމެއް," ކްލޮޕް ބުންޏެވެ.
ޗެމްޕިއަންސް ލީގުގައި ކޮންމެ ޓީމަކާ ދެކޮޅަށް ނުކުތްކަމުގައި ވިޔަސް ގިނަ ބަޔެއްގެ ނަޒަރުގައި ފޭވަރިޓުންނަށް ވާނީ ރެއާލް ކަމަށާއި މުބާރާތުގައި އެ ޓީމުގެ ތާރީހަށް ބެލިޔަސް އެކަން ޔަގީންވާނެ ކަމަށް ކްލޮޕް ބުންޏެވެ. އެހެން ނަމަވެސް މި ވަގުތު ލިވަޕޫލް އޮތް ފޯމަށް ބަލާއިރު ހިތްހަމަޖެހޭ ގިނަ ކަންތައްތަކެއް ހުރުމުން މިއީ ރެއާލަށް ފަސޭހަވާނެ މެޗެއް ނޫން ކަމަށް އޭނާ ބުންޏެވެ.
ޗެމްޕިއަންސް ލީގުގެ ތާރީހުގައި ރެއާލާއި ލިވަޕޫލް ވަނީ ހަ ފަހަރު ބައްދަލުކޮށްފަ އެވެ. އެ މެޗުތަކުގައި ކޮންމެ ޓީމެއް ވަނީ ތިން މެޗުން މޮޅުވެފަ އެވެ. ލިވަޕޫލާއި ރެއާލް ޗެމްޕިއަންސް ލީގުގެ ނޮކައުޓް ބުރުގައި ކުޅުނު ހަމައެކަނި މެޗަކީ 2009 ވަނަ އަހަރުގެ ގަދަ 16 ޓީމުގެ ބުރުގަ އެވެ. އެ ފަހަރު ލިވަޕޫލް ވަނީ 5-0 ގެ އެގްރިގޭޓް ނަތީޖާއަކުން ކުރި ހޯދައިފަ އެވެ.
އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ރަށުންބޭރުގައި އާސެނަލް އަތުން މޮޅުވި މެޗު ބަދަލުކޮށްލީ ދެ ވަނަ ހާފްގައި ކުޅެން އެރި ޕޯޗުގީސް ވިންގް ޑިއޯގޯ ޖޮޓާ އެވެ. މިރޭ ރެއާލާ ދެކޮޅަށް މުހައްމަދު ސަލާހާއި ސަޑިއޯ މާނޭ އަދި ރޮބާޓޯ ފިރްމީނޯގެ އިތުރުން ޖޮޓާ ވެސް ލިވަޕޫލްގެ ފުރަތަމަ އެގާރައިގައި ހިމެނިދާނެތޯ ސުވާލުކުރުމުން ކްލޮޕް ދިނީ ތަފާތު ޖަވާބެކެވެ.
"ތި މީހުން ޖެހޭނީ ތީގެ ޖަވާބު ހޯދަން މަޑުކޮށްލަން. ޒިދާން ދިންތަ ޓީމުގެ ފުރަތަމަ އެގާރައިގެ މައުލޫމާތު؟ އެހެންވީމަ އެބަޖެހޭ މަޑުކޮށްލަން. އާސެނަލާ ދެކޮޅަށް އަހަރެމެންގެ ޓީމު ރަނގަޅު. ހަމަ ސިޓީއާ ދެކޮޅަށް ކުޅުނު މެޗުގައި ވެސް ޓީމު ރަނގަޅު," ކްލޮޕް ބުންޏެވެ.
ސްޕެއިނުގެ ކްލަބަކާ ހަވާލުވާނަމަ ކްލޮޕް އިހުތިޔާރުކުރާނީ ކޮން ކްލަބެއްތޯ ނޫސްވެރިއަކު ސުވާލުކުރުމުން އޭނާ ބުނީ ސްޕެއިނުގައި އޭނާ ޝައުގުވެރިވާ ތިން ކްލަބް ހިމެނޭ ކަމަށާއި އެކަމަކު އޭނާ ސްޕެއިން ބަހަށް ފަރިތަނުވާތީ އެއީ އެހެން މީހުން އެހާ ގަޔާވާނެ ކަމެއް ނޫން ކަމަށެވެ.
އަނިޔާގެ މައްސަލަތަކުގެ ސަބަބުން މުހިއްމު ކުޅުންތެރިންތަކެއް ނުލައި ރެއާލާއި ލިވަޕޫލުން ވެސް ކުޅޭއިރު, މިރޭގެ މެޗު ފަށާނީ ރާއްޖެ ގަޑިން 00:00 ގަ އެވެ.
