އަންނަ ހޮނިހިރު ދުވަހު ބާއްވާ ލޯކަލް ކައުންސިލްތަކުގެ އިންތިޚާބުގެ ރައްކާތެރިކަމަށް ދެ މިލިއަނަށް ވުރެ ގިނަ ރުފިޔާ ހަރަދުކޮށްފައިވާ ކަމަށް އިލެކްޝަންސް ކޮމިޝަން (އީސީ) އިން މިއަދު ބުނެފި އެވެ.
"އަދަދު" އަށް ދެއްވި އިންޓަވިއުއެއްގައި ޝަރީފް ވިދާޅުވީ ޕެންޑެމިކެއްގައި އިންތިހާބު ބާއްވަން ޖެހުމުން އެންމެ ބޮޑު ގޮންޖެހުމަކަށް ދިމާވީ ހަރަދުގެ ކަންތައް ކަމަށެވެ. އެގޮތުން ރައްކާތެރިކަމަށް ބޭނުން ކުރާ ސެނަޓައިޒާ އާއި ފޭސް ޝީލްޑާއި ހުންބަލާ ތަމޯމީޓާ ފަދަ ތަކެއްޗަށް ވެސް ދެ މިލިއަން ރުފިޔާ ހަރަދު ކުރަން ޖެހުނު ކަމަށް ޝަރީފް ވިދާޅުވި އެވެ.
މީގެން ގިނަ އެއްޗިއްސަކީ އެންމެ ފަހަރަކު ބޭނުން ކުރީމައި ދެން އިތުރަށް އިލެކްޝަންސް ކޮމިޝަނަކުން ބޭނުން ކުރާކަށް ނުޖެހޭނެ [އެއްޗެހި]،-- ޝަރީފް ވިދާޅުވި އެވެ.
ހަރަދު ބޮޑުވި ސަބަބުތަކުގެ ތެރޭގައި ވޯޓްލާ މަރުކަޒުތައް އެތައްތަނެއް އިތުރުވުން ވެސް ހިމެނެ އެވެ. ޝަރީފް ވިދާޅުވީ ކުރިން 532 ވޯޓްލާ މަރުކަޒެއް ހަދަން ނިންމިއިރު، ފަހުން އެ އަދަދު 700 އަށް ވުރެ އިތުރު ކުރަން ޖެހުނު ކަމަށެވެ.
"މުޅި ރާއްޖޭގައި މަރުކަޒުތައް އިތުރުވެގެން ދިޔައިރު މާލެ ސަރަހައްދުގައި އެންމެ ބޮޑަށް މި ގިނަ ވެގެން ދިޔައީ. ސަބަބަކީ ވޯޓްލާ މަރުކަޒަކަށް 500 އަށް ވުރެން ގިނައިން ހަމަޖެހިފައިވާ ގަޑީގެ ތެރޭގައި އެޗްޕީއޭގެ ގައިޑްލައިނާ އެއްގޮތަށް ވޯޓް ނުލެވޭނެ ކަމަށް ގަބޫލު ކުރެވޭތީ،" ޝަރީފް ވިދާޅުވި އެވެ.
ކުރިން އިންތިހާބުތައް ސްކޫލްތަކުގައި ގިނައިން ބޭއްވިއިރު މިފަހަރު 40 މަރުކަޒެއް، ޓެންޓު ޖަހައިގެން ހަދަން ޖެހުނު ކަމަށް ޝަރީފް ވިދާޅުވި އެވެ. އެ ޓެންޓުތަކަށް ތިން މިލިއަނަށް ވުރެ ގިނަ ރުފިޔާ ހަރަދުވާ ކަމަށް އޭނާ ވިދާޅުވި އެވެ.
"އެ ޓެންޓަކީ އޭގެ ޒާތުގައި ހޫނު މޫސުމުގެ ތެރޭގައި ބާއްވާތީވެ ފިނި ކުރުމާއި އަދި ވަކިކަންތައްތަކެއް ކުރަން ޖެހުމާއެކު އެކަމަށް ވެސް ވަރަށް ބޮޑެތި ހަރަދުތަކެއް އެބަ ދޭ. އާއްމު ހާލަތެއް ނަމަ އެއީ ދާނެ ހަރަދުތަކެއް ނޫން،" ޝަރީފް ވިދާޅުވި އެވެ.
އިންތިޚާބަށް އެންމެ ފުރަތަމަ 51 މިލިއަން ރުފިޔާގެ ބަޖެޓެއް ކަނޑައެޅި ނަމަވެސް، އެޗްޕީއޭގެ ގައިޑްލައިންތަކާ އެއްގޮތަށް އިންތިހާބު ބާއްވަން އީސީގެ އެދުމުގެ މަތިން އިތުރު 29 މިލިއަން ރުފިޔާ ވަނީ ހަމަޖއްސައިދީފަ އެވެ.
މިދިޔަ އަހަރުގެ އޭޕްރީލް މަހުގެ ކުރީކޮޅު ބާއްވަން އުޅުނު ލޯކަލް ކައުންސިލްތަކުގެ އިންތިހާބު ފަސް ކުރަން ޖެހުނީ ކޮވިޑްގެ ސަބަބުންނެވެ. އަންނަ ހޮނިހިރު ދުވަހު ހާއްސަ އިންތިޒާމުތަކެއްގެ ދަށުން އިންތިހާބު ބާއްވަނީ އެތައް ތާރީހެއް ކުރިން ކަނޑައަޅައި ފަސްކުރުމަށް ފަހުގަ އެވެ.
މި އިންތިހާބުގައި 273،128 މީހުންނަށް ވޯޓްލުމުގެ ހައްގު ލިބިގެންވެ އެވެ. އޭގެ ތެރެއިން 5،134 މީހުންނަކީ އިންތިހާބު އަހަރަކަށް ފަސްކުރުމުން އެ މުއްދަތުގެ ތެރޭގައި 18 އަހަރު ފުރުނު މީހުންނެވެ.
